Joshua 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Lūn ê kiáⁿ Iok-su-a tùi Si̍p-têng àm-tiong phài nn̄g ê cheng-thàm, kā in kóng, “Lín khì thàm-cha hit-ê tōe, te̍k-pia̍t sī Iâ-lī-ko.” In chiū khì, kàu chi̍t ê chhiong-ki Lat-ha̍p ê chhù, chiū hioh tī hia.

2Ū lâng khì kā Iâ-lī-ko -ông thong-pò kóng, “Kim-àm ū Í-sek-lia̍t -lâng lâi thàm-cha lán chit-ê tōe.”

3Iâ-lī-ko -ông chiū phài lâng khì Lat-ha̍p hia, kóng, “Hiah-ê lâi lín chhù ê lâng, lí tio̍h kā in kau--chhut-lâi; in lâi sī beh thàm-cha lán ê thó͘-tōe.”

4Lat-ha̍p chiong hit nn̄g ê lâng chhàng--khí-lâi, chiū ìn kóng, “Khak-si̍t ū lâng lâi góa chia, m̄-kú in tùi tó-ūi lâi, góa m̄ chai;

5ji̍t àm beh koaiⁿ siâⁿ-mn̂g ê sî, in chhut--khì, khì tó-ūi góa mā m̄ chai. Lín kóaⁿ-kín khì jip, chiū ōe jip--tio̍h.”

6M̄-kú, hū-jîn-lâng í-keng kā hit nn̄g ê lâng chhōa-chiūⁿ chhù-téng, ēng pâi tī chhù-téng ê môa-kó kā in khàm--teh.

7Hiah-ê lâng chiū tùi beh khì Iok-tàn-hô hit-tiâu lō͘ jip in, jip kàu tō͘-kháu; jip in ê lâng chi̍t-ē chhut--khì, siâⁿ-mn̂g chiū koaiⁿ--khí-lâi.

8Hit nn̄g ê lâng iáu-bē khì khùn, hū-jîn-lâng chiūⁿ chhù-téng khì chhē in,

9tùi in kóng, “Góa chai Siōng Chú í-keng chiong chit-ê tōe siúⁿ-sù lín, goán kap chit só͘-chāi ê chū-bîn chi̍t-ē thiaⁿ-tio̍h lín, lóng kiaⁿ kah phòa-táⁿ.

10In-ūi goán ū thiaⁿ-tio̍h lín chhut Ai-ki̍p ê sî, Siōng Chú án-chóaⁿ ūi-tio̍h lín hō͘ Âng-hái ê chúi ta--khì; koh lín án-chóaⁿ tùi-hù Iok-tàn-hô tang-pêng nn̄g ê A-mô͘-lī -ông, Se-hông kap Go̍k, kā in húi-bia̍t.

11Goán chi̍t-ē thiaⁿ-tio̍h chiah-ê tāi-chì chiū sit-táⁿ, in-ūi lín ê iân-kò͘ kiaⁿ kah sîn-put-hū-thé; in-ūi Siōng Chú — lín ê Siōng-tè sī thiⁿ-téng tōe-ē ê Siōng-tè.

12Taⁿ, góa ū hó khoán-thāi lín, chhiáⁿ lín kí Siōng Chú tùi góa chiù-chōa, beh hó khoán-thāi goán lāu-pē ê ke; koh hō͘ góa chi̍t ê khak-si̍t ê pó-chèng,

13thang pó-hō͘ góa ê lāu-pē lāu-bú, góa ê hiaⁿ-tī chí-bē, kap goán ka-cho̍k ê sìⁿ-miā, hō͘ goán bián sí.”

14Hit nn̄g ê lâng ìn i kóng, “Goán ēng goán ê sìⁿ-miā pó-chèng. Lí nā bô lāu-sia̍p goán ê hêng-chong, kàu Siōng Chú chiong chit-ê tōe siúⁿ-sù goán ê sî, goán beh ēng chin-sêng jîn-chû khoán-thāi lí.”

15Lat-ha̍p chiū ēng soh-á kā in tùi thang-á lūi--lo̍h-khì; in-ūi i ê chhù khí tī siâⁿ-chhiûⁿ, i mā tòa tī siâⁿ-chhiûⁿ téng.

16I tùi in kóng, “Lín tio̍h ǹg soaⁿ hit-pêng khì, chiah bián hō͘ tui-jip ê lâng tú--tio̍h; tī hia bih saⁿ ji̍t, thèng-hāu tui-jip ê lâng tò--lâi, chiah thang tò-tńg--khì.”

17Hit nn̄g ê lâng tùi i kóng, “Goán it-tēng ōe chiàu lí kah goán chiù-chōa--ê khì chòe, m̄-kú lí tio̍h chiàu goán ê ōe chòe.

18Goán lâi kong-kek chit só͘-chāi ê sî, lí tio̍h chiong chit-tiâu chu-âng-sek ê soh pa̍k tī lí kā goán lūi--lo̍h-khì ê thang-á, mā tio̍h kiò lí ê lāu-pē lāu-bú, hiaⁿ-tī chí-bē, kap lí ê ka-cho̍k lóng chū-chi̍p lâi lí ê chhù-lāi.

19Nā ū lâng tùi lí ê chhù chhut-khì koe-lō͘, hō͘ lâng thâi-sí, sī i ka-kī chòe-tit-lâi--ê, bô goán ê chek-jīm; m̄-kú, tī lí ê chhù-lāi nā ū lâng hō͘ lâng thâi-sí, chit-ê chōe chiū kui tī goán.

20Chóng-sī lí nā lāu-sia̍p goán ê hêng-chong, lí kah goán chiù-chōa--ê chiū kap goán bô koan-hē.”

21Lat-ha̍p tah-èng in, jiân-āu sàng in lī-khui. I chiū ēng chu-âng-sek ê soh pa̍k tī thang-á.

22Hit nn̄g ê lâng khì kàu soaⁿ--ni̍h, tī hia bih saⁿ ji̍t, thèng-hāu tui-jip ê lâng tò--khì; tui-jip ê lâng iân-lō͘ chhē in, mā chhē bô.

23Hit nn̄g ê lâng lo̍h-soaⁿ, kè-hô, kàu Lūn ê kiáⁿ Iok-su-a hia, tùi i pò-kò in só͘ tú-tio̍h it-chhè ê sū.

24In koh tùi Iok-su-a kóng, “Siōng Chú chin-chiàⁿ chiong hit-ê tōe lóng kau tī lán ê chhiú; hit só͘-chāi só͘-ū ê chū-bîn, chi̍t-ē thiaⁿ-tio̍h lán, lóng kiaⁿ kah phòa-táⁿ.”

← Chapter 1 Jump to: Chapter 3 →