Joshua 4

Chinese TTVR (現代台語譯本羅馬字版)

← Chapter 3 Jump to: Chapter 5 →

1Choân-thé jîn-bîn í-keng kè Iok-tàn-hô, Siōng Chú hoan-hù Iok-su-a, kóng,

2“Tio̍h tùi jîn-bîn ê tiong-kan kéng cha̍p-jī lâng, múi chi-cho̍k chi̍t ê lâng;

3bēng-lēng in tùi Iok-tàn hô-tiong, chè-si khiā ê só͘-chāi, chhú cha̍p-jī tè chio̍h, tòa--kè-khì, hē tī lín kim-mî beh hioh-khùn ê só͘-chāi.”

4Iok-su-a chiū chiong i tùi Í-sek-lia̍t -lâng só͘ soán-chhut hit cha̍p-jī lâng, múi chi-cho̍k chi̍t ê, lóng tiàu-chi̍p óa--lâi.

5Iok-su-a kā in kóng, “Lín khì Iok-tàn hô-tiong, kàu Siōng Chú — lín ê Siōng-tè iok-kūi ê thâu-chêng, chiàu Í-sek-lia̍t chi-cho̍k ê sò͘-bo̍k, ta̍k-ê lâng chhú chi̍t tè chio̍h-thâu giâ tī keng-thâu téng;

6chiah-ê chio̍h-thâu thang tī lín tiong-kan chòe kì-hō; chiong-lâi lín ê kiáⁿ-sun nā mn̄g lín, ‘Chiah-ê chio̍h-thâu tùi lín ū sím-mi̍h ì-sù?’

7Lín thang tùi in kóng, ‘Sī in-ūi í-chêng Iok-tàn-hô ê chúi tī Siōng Chú ê iok-kūi chêng chia̍t-tn̄g; iok-kūi kè Iok-tàn-hô ê sî, Iok-tàn-hô ê chúi bô koh lâu; chiah-ê chio̍h-thâu beh chòe Í-sek-lia̍t -lâng éng-oán ê kì-liām.’”

8Í-sek-lia̍t -lâng thiaⁿ Iok-su-a ê bēng-lēng, chiàu Í-sek-lia̍t -lâng chi-cho̍k ê sò͘-bo̍k, tùi Iok-tàn hô-tiong chhú cha̍p-jī tè chio̍h-thâu. In chiàu Siōng Chú tùi Iok-su-a ê hoan-hù, tòa hiah-ê chio̍h-thâu kè-hô, hē tī in hioh-khùn ê só͘-chāi.

9Iok-su-a lēng-gōa ēng cha̍p-jī tè chio̍h-thâu thia̍p tī Iok-tàn hô-tiong, tī kng iok-kūi ê chè-si khiā--teh ê só͘-chāi; kàu kin-á-ji̍t, hiah-ê chio̍h-thâu iáu tī hia.

10Kng iok-kūi ê chè-si khiā tī Iok-tàn hô-tiong, it-ti̍t kàu Siōng Chú thong-kè Iok-su-a tùi jîn-bîn ê bēng-lēng lóng oân-sêng, tú chiàu Mô͘-se hoan-hù Iok-su-a ê ōe. Jîn-bîn chin kín kè--khì.

11Choân-thé jîn-bîn chi̍t-ē kè-hô, Siōng Chú ê iok-kūi kap chè-si chiū tī jîn-bîn ê bīn-chêng kè--khì.

12Lū-piān -lâng, Ka-tek -lâng, Má-ná-se pòaⁿ chi-cho̍k ê lâng, lóng chiàu Mô͘-se tùi in kóng ê ōe, tòa kun-khì tī Í-sek-lia̍t -lâng ê thâu-chêng kè--khì;

13in iok-lio̍k ū sì-bān lâng tòa kun-khì tī Siōng Chú ê bīn-chêng kè--khì, kàu Iâ-lī-ko pêng-goân, chún-pī hó-sè beh kau-chiàn.

14Hit-ji̍t, Siōng Chú hō͘ Í-sek-lia̍t chèng-lâng chun Iok-su-a chòe tōa; i it-seng siū jîn-bîn kèng-ùi, chhin-chhiūⁿ in kèng-ùi Mô͘-se án-ni.

15Siōng Chú hoan-hù Iok-su-a, kóng,

16“Lí bēng-lēng kng iok-kūi ê chè-si tùi Iok-tàn-hô khí--lâi.”

17Iok-su-a chiū án-ni bēng-lēng chè-si.

18Kng Siōng Chú iok-kūi ê chè-si tùi Iok-tàn-hô khí--lâi; chè-si ê kha chi̍t-ē ta̍h chiūⁿ-hōaⁿ, Iok-tàn-hô ê chúi chiū hôe-ho̍k goân-chōng, chhin-chhiūⁿ í-chêng tiòng-móa siang-pêng hōaⁿ.

19Chiaⁿ-ge̍h chhoe-cha̍p, Í-sek-lia̍t jîn-bîn tùi Iok-tàn-hô chiūⁿ--lâi, tī Iâ-lī-ko tang-pêng ê Kiat-kah chat-iâⁿ.

20Iok-su-a chiong in tùi Iok-tàn-hô chhú--lâi hit cha̍p-jī tè chio̍h-thâu, thia̍p tī Kiat-kah,

21jiân-āu tùi Í-sek-lia̍t -lâng kóng, “Chiong-lâi lín ê kiáⁿ-sun nā mn̄g in ê lāu-pē, ‘Chiah-ê chio̍h-thâu sī sím-mi̍h ì-sù?’

22Hit-sî tio̍h hō͘ lín ê kiáⁿ-sun chai, kóng, ‘ Í-sek-lia̍t -lâng bat kiâⁿ ta-tōe, kè chit-ê Iok-tàn-hô.’

23Siōng Chú — lín ê Siōng-tè tī lín ê thâu-chêng hō͘ Iok-tàn-hô ê chúi ta--khì, thèng-hāu lín kè hô, chhin-chhiūⁿ I chá-chêng tī Âng-hái chòe--ê chi̍t-iūⁿ, chiū-sī hō͘ hô tī goán ê thâu-chêng ta--khì, thèng-hāu goán kè--lâi;

24beh hō͘ choân jîn-lūi lóng chai, Siōng Chú ê chhiú ū tōa lêng-le̍k; mā beh hō͘ lín éng-oán kèng-ùi Siōng Chú — lín ê Siōng-tè.”

← Chapter 3 Jump to: Chapter 5 →