Joshua 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Iok-su-a í-keng chin lāu, Siōng Chú tùi i kóng, “Lí í-keng nî-lāu, eng-kai cheng-ho̍k ê tōe iáu chin chōe,

2chiū-sī Hui-lī-sū -lâng kap Ki-su̍t -lâng ê choân tōe-khu;

3tùi Ai-ki̍p pian-kài ê Se-hat-hô, ǹg pak kàu Í-kek-lûn ê pian-kài, che goân-lâi sī Ka-lâm -lâng ê tōe; tī hia ū Hui-lī-sū -lâng gō͘ ê siú-léng koán-hat ê Ka-sat -lâng, A-si̍t-tu̍t -lâng, A-si̍t-ki-lûn -lâng, Ka-te̍k -lâng, Í-kek-lûn -lâng; koh ū lâm-pêng sio̍k A-ōe -cho̍k ê lâng,

4Ka-lâm -lâng ê choân-tōe, Se-tùn -lâng ê Bí-a-la, kàu A-hut, ti̍t-kàu A-mô͘-lī -lâng ê pian-kài;

5koh ū Ka-pa-le̍k -lâng ê tōe, í-ki̍p Lê-pa-lūn ê tang-pêng choân-tōe, tùi Hek-bûn soaⁿ-kha ê Pa-le̍k Ka-tek, ti̍t-kàu Hap-má ài-kháu;

6tùi Lê-pa-lūn-soaⁿ kàu Bí-su-lī-hut Má-im só͘-ū tòa tī soaⁿ-khu ê Se-tùn -lâng, góa beh tī Í-sek-lia̍t -lâng ê bīn-chêng kā in kóaⁿ--chhut-khì; lí thang chiàu góa ê bēng-lēng, chiong hiah-ê tōe thiu-chhiam pun hō͘ Í-sek-lia̍t -lâng chòe ke-gia̍p.

7Taⁿ lí tio̍h chiong chit-ê tōe pun hō͘ kî-tha káu ê chi-cho̍k kap Má-ná-se pòaⁿ chi-cho̍k chòe ke-gia̍p.”

8Siōng Chú ê po̍k-jîn Mô͘-se í-keng chiong Iok-tàn-hô tang-pêng ê thó͘-tōe pun hō͘ Lū-piān kap Ka-tek nn̄g chi-cho̍k, í-ki̍p Má-ná-se pòaⁿ chi-cho̍k chòe ke-gia̍p.

9Chiah-ê tōe chiū-sī tùi A-lūn Soaⁿ-kok piⁿ ê A-lô-ní, kap soaⁿ-kok tiong ê siâⁿ-chhī, í-ki̍p Bí-tí-pa pêng-goân, ti̍t-kàu Tí-pún;

10koh ū tī Hi-si̍t-pún chòe ông ê A-mô͘-lī -ông Se-hông koán-hat ê siâⁿ-chhī, ti̍t-kàu A-bûn -lâng ê kau-kài;

11koh ū Ki-lia̍t tōe-khu, Ki-su̍t -lâng kap Má-ka -lâng ê tōe-khu, kap Hek-bûn-soaⁿ choân-pō͘, í-ki̍p Pa-san choân tōe-khu, ti̍t-kàu Sat-ka;

12koh ū tī A-su-tha-lio̍k kap Í-tek-lâi chòe ông ê Pa-san -ông Go̍k choân-kok; Go̍k sī chhun--lo̍h-lâi ê Lī-hoa̍t-im -lâng. Chiah-ê lóng hō͘ Mô͘-se phah-pāi, kóaⁿ--chhut-khì.

13M̄-kú Í-sek-lia̍t -lâng bô chiong Ki-su̍t -lâng kap Má-ka -lâng kóaⁿ--chhut-khì; kàu kin-á-ji̍t in iáu tòa tī Í-sek-lia̍t -lâng ê tiong-kan.

14Mô͘-se bô pun ke-gia̍p hō͘ Lī-bī chi-cho̍k; chiàu Siōng Chú tùi Mô͘-se só͘ kóng--ê, in ê ke-gia̍p chiū-sī Í-sek-lia̍t -lâng ēng hé sio hiàn hō͘ Siōng Chú — in ê Siōng-tè ê chè-mi̍h.

15Mô͘-se chiàu Lū-piān chi-cho̍k ê ta̍k chong-cho̍k pun ke-gia̍p hō͘ in.

16In ê kéng-kài sī A-lūn Soaⁿ-kok piⁿ ê A-lô-ní kap soaⁿ-kok tiong ê siâⁿ-chhī, í-ki̍p Bí-tí-pa hù-kūn choân-pō͘ ê pêng-goân,

17koh ū Hi-si̍t-pún kap só͘ sio̍k ê pêng-goân hiah-ê siâⁿ-chhī, Tí-pún, Pa-boa̍t Pa-le̍k, Pek Pa-le̍k Bián,

18Ngá-cha̍p, Ki-tí-bo̍k, Bí-hoat-ap,

19Ki-lia̍t-têng, Se-pí-má, kap soaⁿ-kok tiong soaⁿ-lûn-á ê Sè-lia̍t Sa-hat,

20Pek Pí-ní, Pí-su-ka ê soaⁿ-phiâⁿ, Pek Iâ-se-boa̍t;

21koh ū pêng-goân hiah-ê siâⁿ, í-ki̍p tī Hi-si̍t-pún chòe ông ê A-mô͘-lī -ông Se-hông ê choân-kok. Mô͘-se ū chiong Se-hông kap i só͘ koán-hat, tòa tī hit só͘-chāi ê Bí-tiân léng-siù, Í-bī, Lī-kim, So͘-ní, Hō͘-ní, Lī-pa lóng thâi-sí.

22Í-sek-lia̍t -lâng thâi hiah-ê lâng ê sî, mā ēng to thâi-sí Pí-ní ê kiáⁿ, pok-kòa ê Pa-lân.

23Lū-piān chi-cho̍k ê sai-pêng ēng Iok-tàn-hô chòe pian-kài. Í-siōng ê siâⁿ-chhī kap chng-siā sī Lū-piān -lâng chiàu in ê chong-cho̍k só͘ tit--tio̍h ê ke-gia̍p.

24Mô͘-se chiàu Ka-tek chi-cho̍k ê ta̍k chong-cho̍k pun ke-gia̍p hō͘ in.

25In ê kéng-kài sī Ngá-siā kap Ki-lia̍t só͘-ū ê siâⁿ-chhī, kap A-bûn -lâng chi̍t-pòaⁿ ê tōe-khu, kàu La-pa thâu-chêng ê A-lô-ní,

26tùi Hi-si̍t-pún kàu La-boa̍t Bí-su-pa kap Pí-to-lêng, koh tùi Má-hap-liām kàu Tí-phek ê pian-kài,

27kap Hi-si̍t-pún -ông Se-hông kok-lāi só͘ chhun soaⁿ-kok tiong ê Pek Hap-lân, Pek Lêng-la, So͘-kat, Sat-hun, í-ki̍p Iok-tàn-hô kap hô-piⁿ ê tōe, ti̍t-kàu Ka-lī-lī-ô͘ ê lâm-pêng-hōaⁿ, Iok-tàn-hô tang-pêng ê tōe-khu.

28Í-siōng ê siâⁿ-chhī kap chng-siā sī Ka-tek -lâng chiàu in ê chong-cho̍k só͘ tit--tio̍h ê ke-gia̍p.

29Mô͘-se chiàu Má-ná-se pòaⁿ chi-cho̍k ê ta̍k chong-cho̍k pun ke-gia̍p hō͘ in.

30In ê kéng-kài sī tùi Má-hap-liām khí, pau-koat Pa-san -ông Go̍k ê choân-kok, kap Pa-san, Gâi-ní só͘-ū ê chng-siā, chóng-kiōng la̍k-cha̍p ê;

31koh chiong Ki-lia̍t ê chi̍t-pòaⁿ, í-ki̍p Pa-san -ông Go̍k thóng-tī ê A-su-tha-lio̍k kap Í-tek-lâi nn̄g ê siâⁿ, pun hō͘ Má-ná-se ê kiáⁿ Má-kiat chi̍t-pòaⁿ ê kiáⁿ-sun chòe ke-gia̍p.

32Í-siōng sī Mô͘-se tī Iok-tàn-hô tang-pêng, Iâ-lī-ko tùi-bīn ê Mô͘-ap pêng-goân, pun hō͘ nn̄g ê pòaⁿ chi-cho̍k ê ke-gia̍p.

33M̄-kú, Mô͘-se bô pun ke-gia̍p hō͘ Lī-bī chi-cho̍k, in-ūi Siōng Chú — Í-sek-lia̍t ê Siōng-tè sī in ê ke-gia̍p, chiàu Siōng Chú só͘ kā in kóng--ê.

← Chapter 12 Jump to: Chapter 14 →