Joshua 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Iâ-lī-ko ê siâⁿ-mn̂g, in-ūi Í-sek-lia̍t -lâng ê iân-kò͘ koaiⁿ-tiâu-tiâu, bô lâng chhut-ji̍p.

2Siōng Chú tùi Iok-su-a kóng, “Lí khòaⁿ, góa í-keng chiong Iâ-lī-ko kap i ê ông, i kiông-béng ê ióng-sū, lóng kau tī lí ê chhiú.

3Lín só͘-ū ê chiàn-sū tio̍h se̍h chit-ê siâⁿ, chi̍t ji̍t chi̍t piàn, se̍h la̍k ji̍t;

4chhit ê chè-si tio̍h gia̍h chhit ki iûⁿ-kak ê sàu-kak kiâⁿ tī iok-kūi ê thâu-chêng; kàu tē-chhit ji̍t, lín tio̍h se̍h siâⁿ chhit piàn, chè-si mā tio̍h pûn sàu-kak.

5Lín chi̍t-ē thiaⁿ-tio̍h sàu-kak thoa-tn̂g ê siaⁿ, só͘-ū ê lâng tio̍h tōa-siaⁿ hoah, siâⁿ-chhiûⁿ chiū ōe tó kah pîⁿ-pîⁿ-pîⁿ, ta̍k-ê lâng lóng tio̍h kè-sio̍k chìn-chêng, chhiong-ji̍p siâⁿ.”

6Lūn ê kiáⁿ Iok-su-a tiàu-chi̍p chè-si, tùi in kóng, “Lín tio̍h kng iok-kūi, chhit ê chè-si gia̍h chhit ki iûⁿ-kak ê sàu-kak, kiâⁿ tī Siōng Chú iok-kūi ê thâu-chêng.”

7I koh kā jîn-bîn kóng, “Lín tio̍h chìn-chêng khì se̍h siâⁿ, tòa kun-khì--ê tio̍h kiâⁿ tī Siōng Chú iok-kūi ê thâu-chêng.”

8Iok-su-a tùi jîn-bîn kóng soah, chhit ê chè-si gia̍h chhit ki iûⁿ-kak ê sàu-kak, kiâⁿ tī Siōng Chú ê bīn-chêng pûn sàu-kak; Siōng Chú ê iok-kūi tè tī in ê āu-bīn.

9Tòa kun-khì ê sian-hong-tūi kiâⁿ tī pûn sàu-kak ê chè-si thâu-chêng, āu-tūi tè iok-kūi kiâⁿ; chè-si ná kiâⁿ ná pûn sàu-kak.

10Iok-su-a bēng-lēng jîn-bîn, kóng, “Lín m̄-thang hoah, m̄-thang hō͘ lâng thiaⁿ-tio̍h lín ê siaⁿ, liân chi̍t kù to m̄-thang hoah chhut-chhùi, thèng-hāu góa hoan-hù lín hoah ê sî, lín chiah thang hoah.”

11Án-ni, Iok-su-a hō͘ Siōng Chú ê iok-kūi se̍h siâⁿ se̍h chi̍t lìn; jiân-āu, in tò-lâi iâⁿ-tōe hioh-mî.

12Iok-su-a thàu-chá khí--lâi, chè-si koh kng Siōng Chú ê iok-kūi.

13Gia̍h iûⁿ-kak ê sàu-kak ê chhit ê chè-si, kiâⁿ tī Siōng Chú iok-kūi ê thâu-chêng pûn sàu-kak; tòa kun-khì ê sian-hong-tūi kiâⁿ tī chè-si ê thâu-chêng, āu-tūi tè tī Siōng Chú iok-kūi ê āu-bīn, chè-si ná kiâⁿ ná pûn sàu-kak.

14Tē-jī ji̍t in mā se̍h siâⁿ se̍h chi̍t lìn, jiân-āu tò-lâi iâⁿ-tōe. La̍k ji̍t lóng án-ni chòe.

15Tē-chhit ji̍t thiⁿ phú-kng ê sî, in chiū khí--lâi, chiàu kâng-khoán ê hong-sek se̍h siâⁿ, m̄-kú chit-ji̍t se̍h siâⁿ se̍h chhit lìn.

16Kàu tē-chhit piàn, chè-si pûn sàu-kak ê sî, Iok-su-a tùi jîn-bîn kóng, “Tio̍h tōa-siaⁿ hoah, in-ūi Siōng Chú í-keng chiong chit-ê siâⁿ kau hō͘ lín lah!

17Chit-ê siâⁿ kap lāi-bīn só͘-ū--ê, lóng tio̍h oân-choân húi-bia̍t hiàn hō͘ Siōng Chú; chí-ū chhiong-ki Lat-ha̍p, í-ki̍p só͘-ū tiàm tī i chhù-lāi ê lâng, tio̍h lâu in ê sìⁿ-miā; in-ūi i ū chhàng lán phài--khì ê cheng-thàm.

18Lín tio̍h kín-sīn, m̄-thang the̍h eng-kai húi-bia̍t ê mi̍h, chiah bián lín siū chiù-chó͘; lín nā the̍h eng-kai húi-bia̍t ê mi̍h, Í-sek-lia̍t choân-iâⁿ chiū ōe chiâⁿ-chòe eng-kai húi-bia̍t--ê, jiá-khí chai-hō.

19M̄-kú kim, gûn, í-ki̍p tâng kap thih ê khì-khū, lóng tio̍h hun-pia̍t-choh-sèng kui hō͘ Siōng Chú, siu-ji̍p Siōng Chú ê hú-khò͘.”

20Jîn-bîn chiū tōa-siaⁿ hoah, chè-si pûn sàu-kak. Jîn-bîn thiaⁿ-tio̍h sàu-kak ê siaⁿ, chiū koh-khah tōa-siaⁿ hoah, siâⁿ-chhiûⁿ chiū tó kah pîⁿ-pîⁿ-pîⁿ, jîn-bîn chiū chhiong--ji̍p-khì, toa̍t-chhú hit-ê siâⁿ.

21Jîn-bîn chiong siâⁿ-lāi só͘-ū--ê, bô-lūn lâm-hū-ló-iù, gû, iûⁿ, kap lû, choân-pō͘ ēng to kā in siau-bia̍t.

22Iok-su-a kā hit nn̄g ê thàm-cha hit-ê tōe ê lâng kóng, “Lín ji̍p-khì hit-ê chhiong-ki ê chhù, chiàu lín tùi i chiù-chōa--ê, chhōa hit-ê hū-jîn-lâng kap só͘-ū sio̍k i ê lâng chhut--lâi.”

23Hit nn̄g ê chòe cheng-thàm ê siàu-liân-lâng chiū ji̍p--khì, chhōa Lat-ha̍p kap i ê lāu-pē lāu-bú, hiaⁿ-tī chí-bē, í-ki̍p só͘-ū sio̍k i ê lâng chhut--lâi. In kā Lat-ha̍p ê chhin-chiâⁿ lóng chhōa chhut-lâi tòa tī Í-sek-lia̍t ê iâⁿ-gōa.

24Í-sek-lia̍t -lâng chiū ēng hé sio hit-ê siâⁿ kap lāi-bīn só͘-ū--ê; m̄-kú kim, gûn, í-ki̍p tâng kap thih ê khì-khū, lóng siu-ji̍p tī Siōng Chú chhù-lāi ê hú-khò͘.

25Iok-su-a pó-choân chhiong-ki Lat-ha̍p, i ê lāu-pē ê ka-sio̍k, kap só͘-ū sio̍k i ê lâng ê sìⁿ-miā. In chiū tòa tī Í-sek-lia̍t -lâng tiong-kan kàu kin-á-ji̍t, in-ūi Lat-ha̍p ū chhàng Iok-su-a phài-lâi thàm-cha Iâ-lī-ko ê cheng-thàm.

26Hit-sî, Iok-su-a chiù-chōa kéng-kò kóng, “Nā ū lâng tiông-kiàn Iâ-lī-ko -siâⁿ, ōe siū Siōng Chú chiù-chó͘: Hē tōe-ki ê sî, ōe sí tōa-kiáⁿ; an siâⁿ-mn̂g ê sî, ōe sí soah-bé-kiáⁿ.”

27Siōng Chú kap Iok-su-a tông-chāi; Iok-su-a ê miâ-siaⁿ thoân-piàn choân-tōe.

← Chapter 5 Jump to: Chapter 7 →