Joshua 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1Siōng Chú hō͘ Í-sek-lia̍t -lâng hióng-siū thài-pêng, bô siū sì-ûi tùi-te̍k ê kong-kek. Keng-kè chi̍t tōaⁿ chin tn̂g ê sî-kan, Iok-su-a nî-lāu;

2i tiàu-chi̍p choân Í-sek-lia̍t ê tiúⁿ-ló, cho̍k-tiúⁿ, sím-phòaⁿ-koaⁿ, kap koaⁿ-tiúⁿ, tùi in kóng, “Góa í-keng nî-lāu lah.

3Lín ū khòaⁿ-tio̍h Siōng Chú — lín ê Siōng-tè ūi-tio̍h lín tùi hiah-ê kok só͘ chòe it-chhè ê sū; in-ūi Siōng Chú — lín ê Siōng-tè ūi lín kau-chiàn.

4Góa só͘ siau-bia̍t hiah-ê kok-ka ê thó͘-tōe, tùi Iok-tàn-hô kàu sai-pêng Tōe-tiong-hái, pau-koat iáu-bē cheng-ho̍k ê kok, góa í-keng thiu-chhiam pun hō͘ lín ta̍k chi-cho̍k chòe ke-gia̍p.

5Siōng Chú — lín ê Siōng-tè beh ūi-tio̍h lín chiong in kóaⁿ-cháu lī-khui lín; lín chiū ōe chiàu Siōng Chú — lín ê Siōng-tè tùi lín ê èng-ún, tit-tio̍h in ê thó͘-tōe chòe ke-gia̍p.

6Só͘-í lín tio̍h ka-pē ióng-kám, tiong-si̍t chun-hêng Mô͘-se lu̍t-hoat ê chheh só͘-ū ê kì-chài, m̄-thang phian-chó-phian-iū.

7Lín tiong-kan iáu-bē hō͘ lín cheng-ho̍k ê kok, lín m̄-thang kap in kau-chhap, m̄-thang thê-khí in ê sîn-bêng ê miâ, m̄-thang kí in chiù-chōa, m̄-thang ho̍k-sāi in, m̄-thang kūi-pài in.

8Lín tio̍h tiong-sêng bô lī-khui Siōng Chú — lín ê Siōng-tè, chhin-chhiūⁿ lín kè-khì kàu hiān-chāi lóng án-ni chòe.

9In-ūi Siōng Chú í-keng chiong tōa koh kiông ê kok tùi lín ê bīn-chêng kóaⁿ-cháu; kàu kin-á-ji̍t bô chi̍t ê lâng ōe-tàng tùi-khòng lín.

10Lín chi̍t ê lâng ōe-tàng kóaⁿ-cháu chi̍t-chheng lâng, in-ūi Siōng Chú — lín ê Siōng-tè ōe chiàu I tùi lín ê èng-ún ūi lín kau-chiàn.

11Lín tio̍h kín-sīn, tio̍h thiàⁿ Siōng Chú — lín ê Siōng-tè.

12Lín nā oa̍t-cháu lī-khui Siōng Chú, kap tī lín tiong-kan lâu--lo̍h-lâi ê jîn-bîn kau-chhap, kap in thong-hun, óng-lâi;

13lín tio̍h khak-si̍t chai, Siōng Chú — lín ê Siōng-tè it-tēng bô beh chiong hiah-ê jîn-bîn tùi lín ê bīn-chêng kóaⁿ-cháu; in ōe chiâⁿ-chòe lín ê lô-bāng khoân-thò, phah lín ê piⁿ, ba̍k-chiu lāi ê chhì, ti̍t-kàu lín tùi Siōng Chú — lín ê Siōng-tè sù hō͘ lín chit-ê súi ê thó͘-tōe siau-bia̍t.

14“Taⁿ, góa beh kiâⁿ sè-kan-lâng lóng tio̍h kiâⁿ ê lō͘. Lín khak-si̍t chai, Siōng Chú — lín ê Siōng-tè èng-ún beh hō͘ lín ê hok-khì, bô chi̍t hāng lo̍k-khong, lóng si̍t-hiān tī lín sin-chiūⁿ.

15Siōng Chú — lín ê Siōng-tè só͘ èng-ún it-chhè ê hok-khì án-chóaⁿ lîm-kàu lín, Siōng Chú mā ōe án-ni hō͘ ta̍k-khoán ê chai-hō kàu tī lín, ti̍t-kàu Siōng Chú — lín ê Siōng-tè kā lín tùi I siúⁿ-sù lín chit-ê súi ê thó͘-tōe tû-bia̍t.

16Lín nā ûi-pōe Siōng Chú — lín ê Siōng-tè só͘ bēng-lēng lín ê iok, khì ho̍k-sāi kūi-pài pa̍t-ê sîn-bêng, Siōng Chú ōe tùi lín hoat siū-khì, lín ōe chin kín tùi I siúⁿ-sù hō͘ lín chit-ê súi ê tōe bia̍t-bông.”

← Chapter 22 Jump to: Chapter 24 →