Joshua 24

Chinese TTVR (現代台語譯本羅馬字版)

← Chapter 23 Jump to:

1Iok-su-a chū-chi̍p Í-sek-lia̍t chèng chi-cho̍k kàu Sī-kiàm. I tiàu Í-sek-lia̍t ê tiúⁿ-ló, cho̍k-tiúⁿ, sím-phòaⁿ-koaⁿ, í-ki̍p koaⁿ-tiúⁿ lâi; in chiū khiā tī Siōng-tè ê bīn-chêng.

2Iok-su-a tùi só͘-ū ê jîn-bîn kóng, “Siōng Chú — Í-sek-lia̍t ê Siōng-tè án-ni kóng, ‘Kó͘-chá, lín ê chó͘-sian Tha-la, chiū-sī A-pek-la-hán kap Ná-ho̍k ê lāu-pē tòa tī Iù-hoat-la-tí-hô hit-pêng, ho̍k-sāi pa̍t-ê sîn-bêng.

3Góa chhōa lín ê chó͘-sian A-pek-la-hán tùi Iù-hoat-la-tí-hô hit-pêng chhut--lâi, kiâⁿ-thàu Ka-lâm choân-tōe; koh hō͘ i ū chin chōe kiáⁿ-sun: Góa chiong Í-sat siúⁿ-sù i,

4koh ēng Ngá-kok kap Í-sò siúⁿ-sù Í-sat. Góa chiong Í-tong soaⁿ-khu siúⁿ-sù Í-sò chòe ke-gia̍p, hō͘ Ngá-kok kap i ê kiáⁿ-sun lo̍h-khì Ai-ki̍p.

5Góa chhe-phài Mô͘-se kap A-lûn, kàng chai-hō kong-kek Ai-ki̍p, jiân-āu chhōa lín chhut--lâi.

6Góa chhōa lín ê lia̍t-chó͘ chhut Ai-ki̍p, lâi kàu Âng-hái; Ai-ki̍p -lâng phài chiàn-chhia kap bé-peng tui-jip lín ê lia̍t-chó͘.

7Lín ê lia̍t-chó͘ kiû-kiò Siōng Chú, góa chiū ēng o͘-àm keh-khui lín kap Ai-ki̍p -lâng, koh ēng hái-chúi kā Ai-ki̍p -lâng im-sí. Góa tī Ai-ki̍p só͘ chòe ê sū lín lóng chhin-ba̍k khòaⁿ--kìⁿ. “‘Āu-lâi lín tòa tī khòng-iá chin kú.

8Góa chhōa lín kàu Iok-tàn-hô tang-pêng A-mô͘-lī -lâng tòa ê só͘-chāi khiā-khí; in kap lín kau-chiàn, góa chiong in kau tī lín ê chhiú, hō͘ lín tit-tio̍h in ê tōe; góa ūi-tio̍h lín kā in châu-bia̍t.

9Hit-sî, Mô͘-ap -ông Se-phoat ê kiáⁿ Pa-le̍k khí-lâi kap Í-sek-lia̍t -lâng kau-chiàn, koh phài lâng khì kiò Pí-ní ê kiáⁿ Pa-lân lâi kā lín chiù-chó͘.

10Góa m̄ thiaⁿ Pa-lân ê ōe, tian-tò hō͘ i liân-sòa kā lín chiok-hok; án-ni, góa chiū kiù lín thoat-lī i ê chhiú.

11Lín kè Iok-tàn-hô, kàu Iâ-lī-ko; Iâ-lī-ko -lâng, A-mô͘-lī -lâng, Pí-lī-sé -lâng, Ka-lâm -lâng, Hek -lâng, Kek-ka-sat -lâng, Hi-bī -lâng, Iâ-pò͘-su -lâng, lóng kap lín kau-chiàn; góa chiong in kau tī lín ê chhiú.

12Góa kàng un-e̍k tī in tiong-kan, chiong A-mô͘-lī -lâng nn̄g ê ông tùi lín ê bīn-chêng kóaⁿ--chhut-khì; m̄-sī ēng lín ê to, mā m̄-sī ēng lín ê keng.

13Góa siúⁿ-sù lín ê thó͘-tōe, m̄-sī lín ka-kī khai-khún--ê; siâⁿ, mā m̄-sī lín khí-chō--ê; lín tòa tī hit lāi-bīn, chia̍h m̄-sī lín chai-chèng ê phû-tô-hn̂g kap kaⁿ-ná-hn̂g ê ké-chí.’

14“Taⁿ, lín tio̍h kèng-ùi Siōng Chú, sêng-sim-si̍t-ì ho̍k-sāi I, chiong lín ê lia̍t-chó͘ tī Iù-hoat-la-tí-hô hit-pêng kap tī Ai-ki̍p ho̍k-sāi ê sîn-bêng tû--khì, lâi ho̍k-sāi Siōng Chú.

15Nā-sī lín bô ài ho̍k-sāi Siōng Chú, kin-á-ji̍t lín tio̍h kéng lín ài-beh ho̍k-sāi--ê; khòaⁿ sī lín lia̍t-chó͘ tī Iù-hoat-la-tí-hô hit-pêng só͘ ho̍k-sāi ê sîn-bêng, á-sī lín khiā-khí chit-ê tōe ê A-mô͘-lī -lâng ê sîn-bêng. Lūn-kàu góa kap góa ê ke, goán koat-toàn beh ho̍k-sāi Siōng Chú.”

16Jîn-bîn hôe-tap kóng, “Goán it-tēng bô beh khì-sak Siōng Chú, khì ho̍k-sāi pa̍t-ê sîn-bêng.

17In-ūi Siōng Chú — goán ê Siōng-tè ū chhōa goán kap goán ê lia̍t-chó͘ tùi Ai-ki̍p chòe lô͘-châi ê ke chhut--lâi, tī goán ê ba̍k-chiu chêng kiâⁿ hiah-ê tōa ê sîn-jiah; tī goán kiâⁿ--kè ê lō͘, keng-kè ê ta̍k-kok, I lóng ū kā goán pó-hō͘.

18Siōng Chú koh ūi-tio̍h goán kóaⁿ-chhut tòa tī chit só͘-chāi ê A-mô͘-lī -lâng kap lia̍t-kok ê lâng, só͘-í goán mā beh ho̍k-sāi Siōng Chú, in-ūi I sī goán ê Siōng-tè.”

19M̄-kú, Iok-su-a tùi jîn-bîn kóng, “Lín bōe-tàng ho̍k-sāi Siōng Chú, in-ūi I sī sèng ê Siōng-tè, sī iau-kiû choân-chêng ho̍k-sāi I ê Siōng-tè, bōe sià-bián lín ê kè-sit, lín ê chōe-ok.

20Lín nā lī-khui Siōng Chú khì ho̍k-sāi gōa-pang ê sîn-bêng, Siōng Chú tī sù hok-khì hō͘ lín liáu-āu, ōe oa̍t tńg-lâi kàng chai-hō kā lín siau-bia̍t.”

21Jîn-bîn ìn Iok-su-a kóng, “Bōe, goán bōe lī-khui Siōng Chú! Goán it-tēng beh ho̍k-sāi Siōng Chú.”

22Iok-su-a tùi jîn-bîn kóng, “Lín kéng beh ho̍k-sāi Siōng Chú, lín ka-kī tio̍h chòe ka-kī ê chèng-jîn.” In ìn kóng, “Hó, goán goān-ì choh-chèng.”

23Iok-su-a kóng, “Taⁿ lín tio̍h chiong lín tiong-kan gōa-pang ê sîn-bêng tû--khì, hō͘ lín choan-sim kui-ǹg Siōng Chú — Í-sek-lia̍t ê Siōng-tè.”

24Jîn-bîn ìn Iok-su-a kóng, “Goán it-tēng beh ho̍k-sāi Siōng Chú — goán ê Siōng-tè, thiaⁿ-thàn I ê ōe.”

25Hit-ji̍t Iok-su-a chiū chhōa jîn-bîn kap Siōng Chú li̍p-iok, tī Sī-kiàm ūi in chè-tēng kui-chek kap tiâu-lē.

26Iok-su-a chiong chiah-ê ōe lóng siá tī Siōng-tè lu̍t-hoat ê chheh, koh chiong chi̍t tè tōa chio̍h-thâu chhāi tī Siōng Chú sèng-só͘ piⁿ--á ê siōng-chhiū kha.

27Iok-su-a tùi só͘-ū ê jîn-bîn kóng, “Lín khòaⁿ, chit-tè chio̍h-thâu beh kā lán choh-chèng. Chit-tè chio̍h-thâu ū thiaⁿ-tio̍h Siōng Chú só͘-ū hoan-hù lán ê ōe, beh tùi lín choh-chèng, chiah bián lín pōe-ge̍k lín ê Siōng-tè.”

28Iok-su-a kái-sàn jîn-bîn, in chiū tò-khì ka-kī pun--tio̍h ê thó͘-tōe.

29Chiah-ê sū í-āu, Siōng Chú ê po̍k-jîn, Lūn ê kiáⁿ Iok-su-a sí, hióng-liân chi̍t-pah cha̍p hè.

30Í-sek-lia̍t -lâng kā i an-chòng tī Í-hoat-liân soaⁿ-khu, Ka-si̍t-soaⁿ pak-pêng ê Têng-ná Se-la i pun--tio̍h ê thó͘-tōe.

31Iok-su-a oa̍h--teh ê sî, Í-sek-lia̍t -lâng ho̍k-sāi Siōng Chú; i sí liáu-āu, hiah-ê chai-iáⁿ Siōng Chú ūi Í-sek-lia̍t -lâng só͘ chòe it-chhè ê sū ê tiúⁿ-ló iáu oa̍h--teh ê sî, jîn-bîn iû-goân ho̍k-sāi Siōng Chú.

32Í-sek-lia̍t -lâng chiong in tùi Ai-ki̍p tòa--tò-lâi Iok-sek ê kut-hâi an-chòng tī Sī-kiàm, chiū-sī Ngá-kok chá-chêng ēng chi̍t-pah tè gûn tùi Sī-kiàm ê khai-thok-chiá Hap-boat ê hō͘-tāi bóe--lâi ê tōe; chit-tè tōe chòe Iok-sek hō͘-tāi ê ke-gia̍p.

33A-lûn ê kiáⁿ Í-lī-a-sat mā sí; in chiong i an-chòng tī i ê kiáⁿ Hui-nî-hap só͘ tit--tio̍h Í-hoat-liân soaⁿ-khu ê soaⁿ-lûn-á téng.

← Chapter 23 Jump to: