1 Kings 13

Zande

← Chapter 12 Jump to: Chapter 14 →

1Oni ngére, ga Mbori kumba aye Yuda yo ku Betere yo kuti sangba Yekova. Yerobama ki ru pati bamotumo ka zo fuõngua.

2Gu kumba re ki poi kuti bamotumo ku sangba ga Yekova pai yo, ki ya, “Ako bamotumo, bamotumo, ya Yekova wẽ: ‘Oni ngére, i abátika kumbagude ni ngbatunga Dawidi, rimoko nikangia Yosiya; ko atúmo ku auru ro na agu aboromotumo nga ga tumbatumba arago yo nga agu yo ninazo fuõngua ku auru ro. I nikazo meme aboro ku auru ro a.’ ”

3Ko afu yuguyugupai fu yo ni kina gu uru re, niya, “Gere nga gu yuguyugupai Yekova agumba pa ha: ‘Oni ngere, i asára bamotumo asara, ki uka gu kuke du auru he dunduko.’ ”

4Si du ho bakindo agi gi pai ni re ngba ga Mbori kumba, nangia gu ko nagumba pa ha kuti bamotumo Betere yo, Yerobama ki ta taã beko bamotumo yo niya, “Oni zi ko.” Gu beko ko ataĩ he sa ko, si ki sonzora, ka si adu nga wa ka ko mina ha koyo du ko ni berewe ya.

5Bamotumo ki sari asara kpa, kuke ki uka bamotumo yo, wa gu yuguyugupai nga gu ga Mbori kumba niringbisi ku sangba ga Yekova pai yo.

6Bakindo ki karaga ha ki ya fu ga Mbori kumba, “Awere mo zúngadi pa ga Yekova inapai nga gamo Mbori, ki kpari tipa re, ya bere hu berewe.” Ga Mbori kumba ki zungadi Yekova; be bakindo ki hu berewe, ki du a wa si adu mbata.

7Bakindo ki ya fu ga Mbori kumba, “Ani ndú na mo ku kpure yo, mo ki ngarãsi tiro, mi ki fu mosoro foro.”

8Ga Mbori kumba ki ya fu bakindo, “Ka mo vura fu bebere ga ukporo fere vuru, ani andú nga na mo te. Mi ari nga riahe watadu mbira ime rogo gi rago te re;

9bambiko wo i arugu re kuti sangba Yekova, ki ya, ‘Ka mo ri nga riahe, watadu mbira ime ya, ka mo káraga nga tiro ngba gu gene mo niye ngba ha a ya.’ ”

10Si du ko aga ti ni ngba kura gene, ka ko akaraga nga tiko ngba gu gene ko aye ngba ha ku Betere yo ya.

11Ono gbinza nebi adu Betere yo. Awiriko ki ye koyo du ko ni ki pe pa agu apai ga Mbori kumba amangi dunduko ni gu uru re Betere yo; na agu apai ko agumba fu bakindo, i agumba kina ha fu bayo a.

12Bayo ki ya fu yo, “Ko niga ngba gini gene?” Were awiriko ki yugu gu gene ga Mbori kumba niga ngba ha, nangia gu ko naye Yuda yo.

13Ko ki ya fu awiriko, “Oni moi basunga fere ku auru dongi.” Si du i ki moi basunga fu ko ku auru dongi, ko ki gu ku auru ru.

14Ko ki do fuo ga Mbori kumba, ki bi ko ko nasungu tii ngua du wa gero. Ko ki ya fu ko, “Mo nga gu ga Mbori kumba naye Yuda yo?” Ko ki ya, “Mi du.”

15Ko ki ya fu ko, “Ani ndú na mo ku kpure yo, ka ri riahe.”

16Ko ki ya, “Ka mi káraga nga tire na mo te, ki ndu ku kpuro yo a te; ka mi ri nga riahe watadu mbira ime na mo rogo gi rago re a te;

17bambiko i arugu re kuti sangba Yekova, ki ya, ‘Ka mo ri nga riahe watadu mbira ime ya, ka mo káraga nga tiro ngba gu gene mo aye ngba ha a ya.’ ”

18Ko ki ya fu ko, “Mi tigimi nga nebi a wa kina ro, maraika agumba pai fere kuti sangba Yekova, ki ya, ‘Mo yéga na ko ku kpuro yo, ko ri riahe ki mbiri ime.’ ” Ono ko agumba kina zire fu ko.

19Si du ko andu ti ni na ko, ki ri riahe kpuko yo, ki mbiri ime.

20Si adu wa gere ho i asungu ni pati mbisa, sangba Yekova aye koyo du gu nebi ni nayega na ko;

21ko ki poi ku ari fu ga Mbori kumba naye Yuda yo, ki ya, “Ya Yekova wẽ, ‘Bambiko mo basa sangba Yekova, ka mo aka nga kuti gu rugute Yekova ga Mbori arugu ro kuti ni ya,

22ono mo ayega, ki ri riahe ki mbiri ime rogo gu rago ko aya foro, “Ka mo ri nga riahe, ki mbiri ime rogo ya”; si du kangbaro ka ada nga ti ni ku rogo gu murã yo nga ga abamo ya.’”

23Si adu wa gere fuo ri ko riahe na fuo mbira ko ime, ko ki moi basunga fu ko ku auru dongi, tipa gu nebi ko ayega na ko.

24Ho ko aguari ni bahu ki gbia ko gene, ki imi ko. Kangbako ki pi ngba gene, dongi ki ru pati he; bahu ki ru pati kangbako a.

25Oni ngére, akumba asusi, ki bi kangbako si pi pangba gene, bahu ki ru pati kangbako. I ki ye ki pe pa ha rogo gu bakporo gbinza nebi nidu ni.

26Ho gu nebi nakaraga ko ngba gene agi he ni, ko ki ya, “Ga Mbori kumba du, nga gu ko nabasa sangba Yekova; si du Yekova afu ko ti ni fu bahu, u sipi ko ki imi ko, kuti sangba Yekova gu ko agumba fu ko.”

27Ko ki gumba pai fu awiriko, ki ya, “Oni moi basunga ku auru dongi.” I ki moi he.

28Ko ki ndu ki bi kangbako ngba gene, adongi na bahu ki rundu pati kangbako. Ka bahu arita nga kangbako, watadu zia dongi a ya.

29Nebi ki di kangba ga Mbori kumba, ki moi he ku auru dongi, ki yega na ni ku bakporo yo, ka kpara ko ka kpisida ko.

30Ko ki moi kangbako ku rogo gako murã; i ki nita ngbaduyo, ki nikpari ko, niya, “Ako, wirinarani!”

31Si du ho ko akpisidi ko ni, ko ki gumba pai fu awiriko, ki ya, “Ho mi ka kpi ni, oni akpísida re kina rogo gu murã oni akpisidi ga Mbori kumba rogo ho; oni apíga amemere pati amemeko.

32Bambiko gu pai ko apoi kuti bamotumo kuti sangba Yekova Betere yo, si adá ada ti rengo, na kuti agu abambu dunduko naadu rogo tumbatumba arago, nga gu naadu rogo abaakporo Somorona yo.”

33Fuo gi pai re Yerobama akaraga nga tiko gene gako gbigbitapai yo te, ono ko asa agu yo berewe ni aboromotumo nangia ga tumbatumba arago yo dagba aboro dunduko; gu ni naniidi he fu ko, ko ki nikpara ni, ni du ni boromotumo nga ga tumbatumba arago yo.

34Gi pai re ki ye ka du ni ingapai fu ngbatunga Yerobama, ki nyasi yo, ki ba tungayo auru kpotosende.

← Chapter 12 Jump to: Chapter 14 →