bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Zande
/
Zande
/
1 Kings 20
1 Kings 20
Zande
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 21 →
1
Benadada nangia bakindo aSurio adungura gako rimbasa aborosovura dunduko. Abakindo 32 ki du na ko, na afarasi na angbagidavura; ko ki ndu ka ru nguru pati Somorona, ki so vura kuti ni.
2
Ko ki kedi asunge ku bakporo yo koyo du Aba ni nangia bakindo aYisaraere, ki ya fu ko, “Ya Benadada wẽ:
3
‘Ga feda na ga dahabu, gimi du; adiaro na awiro, nga agu yo du ni baawene yo, gimi yo du.’ ”
4
Bakindo aYisaraere ki karaga ha ki ya, “Ako bakindo, nga gi gbia, si du wa mo agumba ha, gamo ko nga mi, na agu ahe dunduko du be re.”
5
Asunge ki ye berewe, ki ya, “Benadada agumba ha were, ki ya: ‘Mi akedi sunge koyo du mo ni ni rengo, niya, “Mo fú ga feda fere na ga dahabu, na adiaro na awiro”;
6
ono mi akéda gimi amoyambu koyo du mo ni gba ti kina gi saa re, i wisigi ga bambu na agu abambu nga ga gamo amoyambu. Si adú wo, agu ahe dunduko du ni bawene he bangiro, i aróga ha ku sa yo.’ ”
7
Bakindo aYisaraere ki yambu abaakumba ringara dunduko, ki ya, “Mi nazungadi roni, oni báki bangironi oni bi nga gi kumba re nagbata gbegberẽpai; bambiko ko akedi sunge kono du mi ni tipa adiare, na tipa awire, na tipa gi feda, na tipa gi dahabu, mi abengeta nga ko te.”
8
Abaakumba ki ya fu ko na aboro dunduko, “Ka mo gí nga sangbako, ki idi he a ya.”
9
Si du ko aya ti ni fu ga Benadada asunge, “Oni yé fu gi gbia nga bakindo, ‘Agu apai dunduko mo akedi fu ga moyambu ni bambata ha mi amánga ha; ono gi ue pai re mi ka amanga nga ha ya.’” Asunge ki ga ki ye na pai fu ko berewe.
10
Benadada ki kedi pai fu ko, ki ya, “Ambori mángi fere wo, na kura ha ku ri he a, ka i ndukudi nvutu Somorona ki hihisi abe na ni, si ki rengbe na agu aboro dunduko ninapeka re.”
11
Bakindo aYisaraere ki karaga ha ki ya, “Oni yá fu ko, ‘I nibi saru mbata ngba mangu, i nikasambuati.’ ”
12
Si ki ta du wa gere, ho Benadada agi gi pai ni re, wa ko ambira he, ko na abakindo rogo abasura, ko ki ya fu avuruko, “Oni tángara tironi sa vura.” I ki tangara tiyo kuti bakporo.
13
Oni ngére, nebi ki ye koyo du Aba ni nangia bakindo aYisaraere, ki ya, “Ya Yekova wẽ, Mo bi gi bakere rimbasa re? Mo ngére, mi afú yo ku be ro ni gi uru du re; mo ki ini he ya mi nga Yekova.”
14
Aba ki ya, “Ku be da?” Nebi ki ya, “Ya Yekova wẽ, Ku be agu aparanga nga ga abazogo agu angbi re.” Ko ki ya, “Da nikatona vura?” Nebi ki karaga ha ki ya, “Kina ro.”
15
Aba ki d ungara aparanga nga ga abazogo agu angbi re, i ki du wa aboro 232; ko ki dungura awiri aYisaraere dunduko fuo yo, i ki du wa aboro 7,000.
16
I ki kuru ti bebere uru. Ono aBenadada ambiri he ki kpi he rogo abasura yo, ko na agu abakindo 32 naaunda ko.
17
Agu aparanga nga ga abazogo agu angbi re ki kuru mbata. Benadada ki kedi aboro, i ki pe he fu ko ki ya, “Akumba nakura Somorona yo.”
18
Ko ki ya, “Si ngia ye yo ni zereda, oni zi yo ni ungayo; watadu ye yo tipa vura, oni ki zi yo ni ungayo a.”
19
Si du agu yo akuru ti ni re bakporo yo, nga agu aparanga nga ga abazogo agu angbi re, na gu rikavura nape fuo yo.
20
AYisaraere ni ba sa sa ki imi aboro; aSurio ki oro, aYisaraere ki do fuo yo. Benadada nangia bakindo aSurio ki merẽ ri farasi na abanduri afarasi a.
21
Bakindo aYisaraere ki kuru, ki nizi afarasi na angbagidavura, ki imi aSurio ni dungu yo.
22
Gu nebi re ki ye koyo du bakindo aYisaraere ni, ki ya fu ko, “Mo ndú, ki nyakasi tiro, ki berẽ pa gu pai mo akamanga; bambiko bakindo aSurio ayé kuti ro ti vovo garã berewe.”
23
Avuru bakindo aSurio ki ya fu ko, “Gayo ambori nga ambori abaagangara, si du nyaki yo ti ni ki susi rani; ono ka ani so vura na yo rogo kpasakpasa rago, ani anyáka ki susi yo ni rengo.
24
Mo mángi gi pai re: mo rogo abakindo ku sa yo, gu ni rogo gani ba ni ba sa sa, ki moi abarutirivura ku ba yo.
25
Mo ki sia aborosovura, wa kina gu gamo aborosovura nakpiki, farasi ku ba farasi, ngbagida ku ba ngbagida. Ani asó vura na yo rogo kpasakpasa rago, ani anyáka ki susi yo ni rengo.” Ko ki gi sangbayo, ki mangi he wo.
26
Si adu wa gere ti vovo garã, Benadada ki dungura aSurio, ki ndu ku Afeka yo, ka so vura kuti aYisaraere.
27
Awiri aYisaraere ki dungura tiyo, ki rogo gayo riahe, ki kuru fuo yo. Awiri aYisaraere ki zi bataya barangba yo wa rukutu rimbasa awiri ameme ue, ono aSurio ahiki ringara.
28
Ga Mbori kumba ki ye ki gumba pai fu bakindo aYisaraere, ki ya, “Ya Yekova wẽ, ‘Bambiko aSurio aya, “Yekova nga mbori abaagangara, ko nga mbori ngboongboorago te,” si du mi ka fu gi bakere barimbasa aboro ti ni re ku be ro oni aina ha ya mi nga Yekova.’ ”
29
I ki zi bataya ku bani, agu yo ki du ku bani rame ki du saba. Wo si adu, ti saba uru vura ki gbia tiru. Awiri aYisaraere ki imi agu aSurio nandu ni nduyo wa aboro 100,000 ti kina gu uru re sa.
30
Ono akura yo ki oro ku bakporo Afeka yo; ngapa bakporo ki ti ku ri gu yangara akumba nanye wa aboro 27,000. Benadada ki oro a, ki da ku bakporo yo, ku rogo gu vuru bambu du ku dimo yo.
31
Gako amoyambu ki ya fu ko, “Awere mo ngére, ani agi he ya abakindo ku ri ngbatunga aYisaraere i du ni agu abakindo nayugo inapai. Ani nazungadi ro, ani vó mbuzaroko dimorani, na kaĩkaĩagire rirani, ani ndu koyo du bakindo aYisaraere ni; si ngia ko abátasa ungaro.”
32
Si du i avo mbuzaroko dimoyo, ki moi kaĩkaĩ agire ku riyo, ki ye koyo du bakindo aYisaraere ni, ki ya, “Ya Benadada nga ga moyambu wẽ, ‘Mi nazungadi ro, mo mbú re ni ungare.’ ” Bakindo ki ya, “Ko du ni ungako kindi? Ko nga wirinami.”
33
Were agu akumba re ki dege tuyo gbe, ka gia gu pai ko akagumba. I ki gi he ni ipo, ki ya, “Ii, wirinamo nga Benadada.” Ko ki ya, “Oni ndú ki ye na ko.” Benadada ki ye koyo du ko ni; ko ki sungusi ko ku rogo gako ngbagidavura pati ko.
34
Benadada ki ya fu ko, “Agu abaakporo buba arogo ho be bamo, mi agása ha foro berewe. Mo ki mbakadi agene tipa ro Damaseke yo, a wa buba ambakadi he Somorona yo.” Aba ki ya, “Mi tigimi mi aída ha foro mo ga mbiko gi mokido re.” Si du ko azunga he fu ko, ki fu gene fu ko.
35
Gu ni sa dagba awiri anebi yo ki ya fu kurani ku sangba Yekova yo, “Mi nazungadi ro, mo tá re.” Ono kumba aka pa ta ko.
36
Ko ki ya fu ko, “Bambiko mo agia nga sangba Yekova te, mo ngére, ni gu rago mo ka kpara ti re, bahu aimo ro.” Ni gu rago ko akpara ti ko, bahu ki gbia ko ki imi ko.
37
Ko ki bi kura kumba, ki ya, “Mi nazungadi ro, mo tá re.” Kumba ki nari ko, ki hogi ko.
38
Si du nebi aguari ti ni, ki sungudi bakindo gene, ki ta birika tiko nidadi bangiriko na roko.
39
Wa bakindo asusa, ko ki poi kuti bakindo ki ya, “Ga moyambu andu dagba vura; mo ngére, banzengere sa abiri tiko, ki ye na kumba koyo du mi ni, ki ya, ‘Mo ká kuti gi kumba re; ka ko ingi mbiko gini pai, i ki di ungaro ku ba ungako, watadu mo afú feda barõaha ki du wa akiro 59.’
40
Wa ga moyambu amanga sunge kono na koyo, gu kumba re ki merẽ.” Bakindo aYisaraere ki ya fu ko, “Ga ngbanga du kina wo; mo sapu he tigamo.”
41
Nebi ki di roko ti bangiriko ni ipo; bakindo aYisaraere ki bi ko ki ini ya nebi du.
42
Nebi ki ya fu ko, “Ya Yekova wẽ, ‘Bambiko gu kumba mi aringbisi ko tipa gbarasa ko namerẽ be ro, si du i adia kina ungaro ku ba ungako, na gamo aboro ku ba gako aboro.’ ”
43
Bakindo aYisaraere ki ga ku kpuko yo na kina gberãrago ti ko na era ki da ku Somorona yo.
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 21 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22