1 Kings 9

Zande

← Chapter 8 Jump to: Chapter 10 →

1Ho Soromo anyasi pa dua ga Yekova bambu ni, na ga bakindo bambu a, ki mbakadi agu ahe dunduko ko akpi nyemu manga ha,

2Yekova ki yugu tiko fu Soromo ni ue he, a wa ko ayugu tiko fu ko mbata Gibona yo.

3Yekova ki ya fu ko, “Mi gi ga kpetambuahe nga gu kpari mo fere ku bara bangire, na ga kpesarawati; mi kpara gi bambu re, nga gu dua mo, ya rimore du ti ni nye anye kindi; mi amáa bangire kuti ni dedede na kpotore yo a.

4Na tipa ro tigamo, ka mo ata ku bara bangire, a wa bamo anata nangia Dawidi, na rengo kpotoro yo, na rurupai, ka amánga apai dunduko a wa mi arugu ro kuti ni, ki nika kuti gimi rugaapai, na gimi asarangbanga;

5mi anyákasa gu mbatabakindo nga ga ga ngbi ku ri aYisaraere nye anye kindi; a wa mi akido he fu bamo nangia Dawidi, niya, ‘Mo azánga nga boro nikasunga auru ga aYisaraere mbatabakindo te.’

6Ono oni tigaoni ka oni sa tironi ti peka fuo re, watadu oni na awironi, ka oni aka nga kuti gimi arugute na gimi rugaapai nga gu mi arugu roni kuti ni ya; ono ka oni amanga pa kura ambori, ki niirisi he,

7mi aróga aYisaraere ku sa yo rogo gu ringara mi afu fu yo; gi bambu re nga gu mi nakpara ha tipa rimore, mi ki ba ha aba bara bangire ku sa yo, i asá aYisaraere ni usanza ni urepai dagba angbatunga aboro dunduko.

8Gi bambu re si adú ni gbarasigbarasi he, agu yo nikasusa pati he i akíga akiga, ki nipayasi he ni ngbayo; ki niya, ‘Tipagine Yekova amangi gi ringara re ti ni were, na gi bambu re a?’

9I anikaraga ha ki ya, ‘Bambiko i ambu Yekova gayo Mbori, nga gu ko nakusi atitayo ringara Ezipeta yo, ki ka kuti kura ambori, ki niirisi he, ki nimangi pa ha; si du Yekova aye ti ni na gi gbigbitapai re ku ri yo.’ ”

10Si ki ta du wa gere ti digida garã 20, nga agu agarã Soromo adua agu abambu re ue rogo ho, nga ga Yekova bambu na ga bakindo bambu,

11Bakindo Soromo ki fu abaakporo fu Irama wa 20 rogo ringara Gariraya, bambiko Irama nangia bakindo Tura anafu agu angua nga akedara na akupuresa fu Soromo, na dahabu, a wa ko akpi nyemu he.

12Ono ho Irama aye ni Tura yo ka bi agu abaakporo Soromo afu fu ko; ka si angba nga ti ko ya.

13Ko ki ya, “Gini abaakporo nga gu fu mo fere were, wirinami?” I ki yambu rimoho nga ringara Kabura daku areme.

14Irama akeakedi dahabu fu bakindo, barõaha ki du wa akiro 7,080.

15Bakindo Soromo azi aborosunge tipa agi asunge re, nga, dua ga Yekova bambu, na gako bambu, na Miro, na ngapa bakporo pati Yerusarema kirikiri, na Asora, na Megido, na Gezere,

16bambiko Faro nangia bakindo Ezipeta, ko aima ndu ki zi Gezere, ki zo ho na we, ki imi agu aKanano nanaraka bakporo yo, ki fu he ni gamahe fu wiriko nangia dia Soromo;

17si du Soromo ambakadi Gezere ti ni berewe. Aborosunge adua gu Bete-rono naadu ku pa di yo,

18na Barata, na Tadamora naadu ngbakungba yo, rogo ringara,

19na agu abaakporo baigaahe nangia ga Soromo, na abaakporo tipa gako angbagidavura, na abaakporo tipa gako abanduri afarasi, na agu abambu Soromo akpi nyemu ka dudua ha wa ngba ha ti ko Yerusarema yo, na ku Rebanona yo, na ku rogo gako ringara zogarago dunduko.

20Ono tipa pa agu aboro nanye, nga ga aAmoro yo, na aIto, na aPereso, na aIvo, na aYebuso, nga agu yo nangia nga awiri aYisaraere yo ya―

21agu atitayo naanye rogo gu ringara re, nga agu yo awiri aYisaraere arengba nga na gbarasa yo dunduko ya i Soromo azi yo ni aborosunge, i du ho daku areme.

22Ono Soromo azia nga awiri aYisaraere ni aborosunge wa sa te; ono i adu ni aborosovura, agu yo ni gako amoyambu, ni gako abazogo ni gako abarutirivura, ni abazogo gako angbagidavura na ni gako abanduri afarasi.

23Agi aboro re naadu ni abaakumba tipa ga Soromo sunge: wa aboro 550 ku ri aborosunge.

24Ono wiri Faro aguari rogo gu bakporo nga ga Dawidi ki ndu ku rogo gu bambu Soromo adua tipa ri; ko ki dua Miro ti kina gu rago re a.

25Soromo ki tumo ni zozo amotumo na amotumo zereda bara biata rogo garã sa ku auru gu bamotumo ko adua ha fu Yekova, nizo wene fuõngua auru he, ku bara bangiri Yekova. Si du ko ki nyasi dua bambu.

26Bakindo Soromo ki mbakadi dungu abaakurungba Eziona-gebere yo, nga gu du pati Erota, pangba Zamba Baime, rogo ringara Edome.

27Irama ki kedi avuruko rogo agi abaakurungba re nangia abanginzo nangia agu yo narugu tiyo na pa baime wenengaĩ, wa sa na avuru Soromo a;

28i ki ndu ku Ofiri yo, ki rogo dahabu yo, barõaha adu wa akiro 24,780, ki ye na ni koyo du Bakindo Soromo ni.

← Chapter 8 Jump to: Chapter 10 →