1 Kings 2

Zande

← Chapter 1 Jump to: Chapter 3 →

1Were ga Dawidi rame ki mbedi ko kpi. Ko ki rugu Soromo nangia wiriko, niya,

2“Mi nikandu ngba gu gene nga ga aboro zegino dunduko. Si du mo dú nyanyaki, ki yugu tiro ni kumba,

3ki nika kuti ga Yekova rugute nga ga Mbori, ka apeka gako asino, ki nika kuti gako rugapai, na gako arugute, na gako asarangbanga, na gako dezireapai, a wa i ake he rogo ga Mose rugute, si mo ka u ti ni rogo agu apai dunduko mo ka amanga ha, na yo mo ka andu ku ho ni a;

4ya Yekova nyákasi gu pai ko agumba tipa re, niya, ‘Ka awiro abánda gayo apai, ka ta bara bangire rogo yososopai na kpotoyo yo dunduko na mbisimoyo dunduko, ga aYisaraere mbatabakindo azánga nga bazogo auru he te.’

5“Gbiakuti gere, mo ini gu pai Yoaba amangi kuti re a, nga wiri Seruya, na gu pai ko amangi kuti ga aYisaraere abarutiri rikavura ue, nga Abinera nangia wiri Nere, na Amasa nangia wiri Yetere, nga agu yo ko aimi yo, ki uka kure vura ti rago zereda, kure vura ki du ti gako giri dimose, na ti gu rakata naadu nduko yo.

6Si du mo mángi pai tipa ha ku sangba ga tatamana yo, ono ka mo ídi nga ko zorõ na nvue ku murã yo zezeredi ya.

7Ono mo yúgu weneringise fu awiri Baruzirai nga boro Girada, i ki du dagba agu yo nari riahe pati ga mbisa; bambiko wa i ayugu weneringise fere ho I aye ni kono du mi ni ho mi aoro ni be Abisaroma nangia wiribamo.

8Mo ngére, Simi du na mo a, nga wiri Gera, ni ngbatunga Benyamina, naadu Baurima yo, nga gu ko naatiwa re ni bakere motiwa ni gu rago mi andu ku Manaima yo. Ono ho ko aye ni ku Yaradene yo ka ngbisa re, mi azunga he fu ko ti rimo Yekova, ki ya, ‘Mi aimo nga ro ni basape te.’

9Si du ka mo mbu nga ko ti ni awere ya, bambiko boro tatamana nga mo tigamo. Mo aina gu pai mo ka manga ha kuti ko, mo ki ye na ko na nvue ku murã yo na kure.”

10Dawidi ki kpi fuo atitako, i ki kpisidi kangbako rogo gu bakporo nga ga Dawidi.

11Dawidi azogo aYisaraere tipa garã 40 dunduko. Ko azogo yo Eburone yo tipa garã saba, ki zogo yo Yerusarema yo tipa garã 33.

12Soromo ki sungu auru ga bako mbatabakindo nangia Dawidi; gako ngbi ki nyaki anyaka gbe.

13Adoniya nangia wiri Agita ki ye koyo du Bataseba ni nangia na Soromo. Ri ki ya, “Ye mo na pa zereda?” Ko ki ya, “Na pa zereda.”

14Ko ki ya fu ri, “Pai ngbare mi aka gumba ha foro.” Ri ki ya, “Mo gúmba ha.”

15Ko ki ya, “Mo ini he tigamo ya ngbi adu ni gimi, aYisaraere dunduko ki ningere kono du mi ni, mi zogo yo; ono i asa apai, ngbi ki du ni ga wiribuba bambiko Yekova.

16Kina mi sana ro tipa pai sa awere, ka mo ká nga na ni be re ya.” Ri ki ya, “Mo gúmba pa ha.”

17Ko ki ya, “Mi nakpara foro, mo gúmba pai fu Bakindo Soromo bambiko ko abéngeta nga ro te ko fu Abisaga fere ni diare nga boro Sunema.”

18Bataseba ki ya, “Mi idi he; mi agúmba pa ha fu bakindo tipa ro.”

19Si du Bataseba andu ti ni koyo du Soromo ni, ka gumba pa ga Adoniya pai fu ko. Bakindo ki mo ku ari ka ngbisa ri, ki tumusa ku sende bata bangiriri. Fuo gure ko ki sungu auru gako mbatabakindo, ki rugu yo i moi mbatanakindo tipa na bakindo; ri ki sungu ku kumba beko yo.

20Ri ki ya, “Mi nasana ro tipa pai sa, ni kina toni he; ka mo béngete nga re na ni ya.” Bakindo ki ya fu ri, “Mo sána he tipa ha, nina; bambiko mi abéngeta nga ro na ni te.”

21Ri ki ya, “I fú Abisaga nga boro Sunema fu Adoniya nga wiribamo, ri du ni diako.”

22Bakindo Soromo ki karaga ha fu nako ki ya, “Tipagine mo asana he tipa Abisaga ti ni fu Adoniya? Ka mo sána he tipa ngbi a tipa ko; bambiko ko nga unvuruami, Abiatara nga boromotumo, na Yoaba nga wiri Seruya, i du gayo pai tipa ko a.”

23Bakindo Soromo ki zunga he ti rimo Yekova, ki ya, “Mbori mángi he fere, na gu ku ri he a, si ngia Adoniya agumba gi pai re kuti kina ungako!

24Were wa du Yekova ni ungako, nga gu ko nanyakasi re, ki moi re auru ga buba mbatabakindo nangia Dawidi, ki zugasi ngbatungare, a wa ko akido he tipa ha, ni rengo i aimo Adoniya ni kina gi uru re.”

25Bakindo Soromo ki kedi pai be Benaya nangia wiri Yoyada; ko ki fo ko ku sande, ko ki kpi.

26Bakindo ki ya fu Abiatara nangia boromotumo, “Mo ndú ku Anatota yo, ku rogo ga ringara; bambiko mo re na kpio. Ono mi aimo nga ro ni gi rago te re, bambiko mo aaka ga Gbia MBORI sanduki ku barangba Dawidi nangia buba, na bambiko i arungosi ro na agu apai i arungosi buba na ni a.”

27Si du Soromo adi Abiatara ti ni ku sa yo ti du ni boromotumo fu Yekova; ko digisi ga Yekova pai nga gu ko agumba ha tipa ngbatunga Eri Siro yo.

28Ho pangbanga agi apai re aye ni koyo du Yoaba ni ― bambiko Yoaba asongodi pa Adoniya, ono ko asongoda nga pa Abisaroma te Yoaba ki oro ku rogo gu bamburoko dungurati yo nga ga Yekova, ki zi agu agbanga naadu ti bamotumo.

29I ki gumba ha fu Bakindo Soromo, ki ya, “Yoaba oro ku rogo gu bamburoko dungurati yo nga ga Yekova, mo ngére, ko du pati bamotumo.” Soromo ki kedi Benaya nangia wiri Yoyada, ki ya, “Mo ndú, ki fo ko ku sande.”

30Benaya ki ndu ku rogo gu bamburoko dungurati yo nga ga Yekova, ki ya fu Yoaba, “Ya bakindo we, ‘Mo kúru.’ ” Ono Yoaba ki ya, “Ai; ono mi akpi kina erẽ.” Benaya ki ye berewe ki gumba pai fu bakindo, ki ya, “Yoaba agumba pai wa gere ko ki karaga pai fere wa gere a.”

31Bakindo ki ya fu ko, “Mo mángi he wa ko agumba ha, ki fo ko ku sande, ki kpisidi ko; ka dia gu kure ku sa yo ti re na ti ngbatunga buba, nga gu Yoaba auka ha zanga ndupai.

32Yekova akáraga kure gako mangapai ku ri ko, bambiko ko ati ku mini akumba ue naadu ni ruru yo ki susi ko, naadu ni wene yo ki susi ko a. Ko ki imi yo ni basape, ka buba nangia Dawidi aina nga ha ya, i nga Abinera nangia wiri Nere, ga aYisaraere barutiri rimbasavura, na Amasa nangia wiri Yetere, ga Yuda barutiri rimbasavura.

33Si du kureyo akáraga tihe ku ri Yoaba, na ku ri angbatungako nye anye kindi. Ono zereda nikadu be Yekova fu Dawidi, na fu angbatungako, na fu atitako, na fu gako mbatabakindo nye anye kindi.”

34Benaya nangia wiri Yoyada ki ndu ki fo Yoaba ku sande, ki imi ko. I ki kpisidi ko rogo gako bambu ngbakungba yo.

35Bakindo ki moi Benaya nangia wiri Yoyada ku ri rimbasavura ku ba Yoaba, bakindo ki moi Sadoka nangia boromotumo ku ba Abiatara.

36Bakindo ki kedi sunge ki yambu Simi, ki ya fu ko, “Mo dúa bambu Yerusarema no tipa ro, ki sungu no, ka mo gúari nga no ka ndu ku rogo kura rago wa sa ya.

37Bambiko ni gu rago mo ka kura, ki si gu di nga Kidirona, mo ini he ni rengo ya mo akpí akpi. Kurero ki du kina ku ri ro.”

38Simi ki ya fu bakindo, “Ngba gu pai angba gumba mo; a wa gi gbia agumba ha nga bakindo ga moyambu amánga ha kina wo.” Simi ki nye Yerusarema yo tipa dungu arame.

39Ono si adu wa gere ti digida garã biata, ga Simi akanga ue aoro koyo du Akisa ni, nangia wiri Maka nga bakindo Gata. I ki gumba pai fu Simi, ki ya, “Mo ngére, gamo akanga du Gata yo.”

40Simi ki guari, ki mbakadi basunga ku auru gako nadongi, ki ndu ku Gata yo koyo du Akisa ni ka gbata gako akanga Simi ki ndu ki yega na gako akanga Gata yo.

41I ki gumba ha fu Soromo ya Simi guari Yerusarema yo ki ndu ku Gata yo, ki yega berewe.

42Bakindo ki kedi sunge ki yambu Simi, ki ya fu ko, “Ati mi agumba ha foro mo zunga he ti rimo Yekova, mi ki za ro, ki ya, ‘Mo ini he ni rengo, ya ni gu rago mo ka kura yo, ki nita ku bani na ku bani, mo akpí akpi ni rengo’? Mo ki ya fere, ‘Gu pai gumba mo ngba ha angba; mi gi sangbaro.’

43Tipagine mo aka nga kuti ga Yekova zungahe ti ni, na gu rugute mi arugu ro kuti ni ya?”

44Bakindo ki ya fu Simi berewe, “Mo ini gu gbigbitaapai dunduko du ngbaduro yo, nga gu mo amangi he kuti Dawidi nangia buba; si du Yekova akaraga ga gbigbitapai ki ri ro.

45Ono i afú maku fu Bakindo Soromo, ga Dawidi mbatabakindo adú ni nyakasinyakasi he ku bara bangiri Yekova nye anye kindi.”

46Si du bakindo arugu Benaya ti ni nangia wiri Yoyada; ko ki kuru, ki fo ko ku sande, ko ki kpi. Ngbi ki du ni nyakasinyakasi he ku be Soromo.

← Chapter 1 Jump to: Chapter 3 →