1 Kings 16

Zande

← Chapter 15 Jump to: Chapter 17 →

1Sangba Yekova ki ye koyo du Yeu ni nangia wiri Anani kuti Basa, niya,

2“Wa mi avura kiisa pa ro ki tumba ro nvutu yo, ki moi ro ni bazogo ku ri gimi aboro aYisaraere, ono mo napeka kina sino Yerobama, ki niingisi gimi aboro aYisaraere i niingi pai, ki nigara gi zinga ku ri yo na gayo ingaapai,

3mo ngére, mi agbárasa Basa na ngbatungako dunduko, mi ki sa ngbatungaro si ki du wa ngbatunga Yerobama nangia wiri Nebata.

4Gu ngbatunga Basa nikanikpi bakporo yo aango nikaniriti ni, gu ni nikanikpi haurago yo azire ari nikaniriti ni.”

5Kura ga Basa apai, na gu pai ko amangi he, na pa gako ngarã, ati si ni keke he rogo gu Kitabu Peka pa agu apai Abakirdo aYisaraere anamanga?

6Basa ki kpi fuo atitako, i ki kpisidi ko Tirusa yo; Era ki zogo rago ku ba ko nangia wiriko.

7Sangba Yekova ki ye ngba Yeu nangia nebi nangia wiri Anani, kuti Basa na kuti ngbatungako, mbiko gu gbigbitapai ko anamanga ha ku bangiri Yekova, ka gara gako zinga ku ri ko, na agu apai beko amangi he, ni manga ko apai wa kina ngbatunga Yerobama, na bambiko ko gbarasi ngbatungako.

8Ti gu 26 garã zogarago nangia ga Asa bakindo aYudo, Era nangia wiri Basa ki tona zoga aYisaraere Tirusa yo, ko ki zogo yo tipa garã ue.

9Gako moyambu nangia Zimiri, nga barutiri bete gako angbagidavura, ko ata bura ko. Were ho ko adu ni Tirusa yo, ki mbiri he ki kpi he dimo ku Arusa yo, nangia gu ko naadu ku ri gako aborokporo Tirusa yo,

10Zimiri ki rimi fuo ko ki mangi ko, ki imi ko, ti gu 27 garã zogarago nangia ga Asa bakindo aYudo. Ko ki zogo rago ku ba ko.

11Ho ko atona zoga rago ni, ki sungu auru gako mbatabakindo, ni ba sa ko ki imi ngbatunga Basa dunduko. Ko ambu nga kumba fu ko wa sa te, dagba agumeko na dagba wene abadiako a te.

12Were Zimiri ki gbarasi ngbatunga Basa du, ku sangba ga Yekova pai yo, nga gu ko agumba kuti Basa ku ngba Yeu nangia nebi,

13bambiko ga Basa ingaapai dunduko, na ga Era ingaapai nangia wiriko, nga gu i anamanga, ki niingisi aYisaraere na ni i niingi pai, ki gara ga Yekova zinga ku ri yo, nga ga aYisaraere Mbori, ko nizíngi mbiko gayo kungba ahe.

14Kura ga Era apai, na agu apai ko amangi dunduko, ati si ni keke he rogo gu Kitabu Peka pa agu apai Abakindo aYisaraere anamanga?

15Ti gu 27 garã zogarago nangia ga Asa bakindo aYudo, Zimiri azogo rago Tirusa yo rame ki du saba. Were aboro azi bataya kuti Gibitona, nangia ga aFereseto kporo.

16Agu aboro nadu bataya yo ki gi he ya, “Zimiri ata bura bakindo, ki imi ko.” Si du aYisaraere dunduko amoi Omeri ti ni ni bakindo aYisaraere, bataya yo ti gu uru re, nangia barutiri rimbasavura.

17Omeri ki guari Gibitona yo, na aYisaraere dunduko fuo ko, i ki ru nguru kuti Tirusa.

18Ho Zimiri abi he ni ya i di bakporo, ko ki rimi ku rogo gu nyanyaki ba du rogo ga bakindo bambu, ki zo ga bakindo bambu ni we si ki gbi ku ri ko, ko ki kpi,

19bambiko gu gako ingaapai ko anainga, ni manga gu pai nadu ni gbigbita ha bangiri Yekova, ki nipeke sino Yerobama a, rogo gako ingapai nga gu ko anamanga, ki niingisi aYisaraere na ni i niingi pai.

20Kura ga Zimiri apai, na pa gako tabura nga gu ko amangi he, ati si ni keke he rogo gu Kitabu Peka pa agu apai Abakindo aYisaraere anamanga?

21Aboro aYisaraere ki kparaka rogo yo ue; agu yo apeke Tibini nangia wiri Ginata, ka ka sa ko ni bakindo; agu yo ki nipeke Omeri.

22Ono agu aboro napeke Omeri nadi be agu yo napeke Tibini nangia wiri Ginata; si du Tibini akpi ti ni, Omeri ki zogo rago.

23Ti gu 31 garã zogarago nangia ga Asa bakindo aYudo, Omeri ki tona zoga aYisaraere, ko ki zogo rago tipa garã 12; ko azogo rago Tirusa yo tipa garã sita.

24Ko ki ngbe gu bagangara nga Somorona be Semere na feda barõaha adu wa akiro 118; ko ki dua gbata ri bagangara, ki yambu rimo gu bakporo ko adua ha nga Somorona, ti rimo Semere nangia baira bagangara.

25Omeri ki mangi gu pai nadu ni gbigbita ha bangiri Yekova, ki nimángi pai ni gbegberẽ he ki susi agu yo dunduko naadu mbata fu ko.

26Bambiko ko apeke sino Yerobama nangia wiri Nebata, na gu gako ingaapai ko anaingisa aYisaraere na ni i niingi pai, ka gara ga Yekova zinga ku ri yo nga ga aYisaraere Mbori, ni gayo kungba ahe.

27Kura ga Omeri apai nga gu ko amangi he, na pa gu ngarã ko ayugu he, ati si ni keke he rogo gu Kitabu Peka pa agu apai Abakindo aYisaraere anamanga?

28Si du Omeri ki kpi fuo atitako, i ki kpisidi ko Somorona yo; Aba ki zogo rago ku ba ko nangia wiriko.

29Ti gu 38 garã zogarago nangia ga Asa bakindo aYudo, Aba ki tona zoga aYisasaraere nangia wiri Omeri. Aba nangia wiri Omeri ki zogo aYisaraere Somorona yo tipa garã 22.

30Aba nangia wiri Omeri ki nimángi gu pai nadu ni gbigbita ha bangiri Yekova ki susi agu yo dunduko naadu mbata fu ko.

31Si adu wa gere, pa peka ko gu ingapai nangia ga Yerobama wiri Nebata adu nga ni he bangiriko te, si du ko adi Izebere ti ni ni diako nangia wiri Etebara bakindo aSidono, ki ndu ka amanga pa Bara, ki niirisi he.

32Ko ki dua bamotumo fu Bara rogo ga Bara bambu, nga gu ko adua ha Somorona yo.

33Aba ki dua Asera nga ngbama. Aba ki gara ga Yekova zinga ku ri ko nga ga aYisaraere Mbori, ki susi agu abakindo aYisaraere dunduko naadu mbata fu ko.

34Ti gako rago Iere abungia Yereo nangia boro Betere; wa ko amoi mburuhe bambata wiriko ki kpi nangia Abirama, ko ki moi ngbadimoho, gako kiaro ki kpi nangia Seguba, a wa Yekova agumba ha ku ngba Yosua nangia wiri Nuna.

← Chapter 15 Jump to: Chapter 17 →