1 Kings 5

Zande

← Chapter 4 Jump to: Chapter 6 →

1Irama nangia bakindo Tura akedi gako amoyambu koyo du Soromo ni, bambiko ko agi he ya i mbedi ko ni bakindo ku ba bako; mbiko nyemu Dawidi amanga Irama kindi.

2Soromo ki kedi pai koyo du Irama ni, ki ya,

3“Mo ini he tigamo ya buba nangia Dawidi ko arengba nga na dua bambu tipa rimo Yekova nga gako Mbori te bambiko agu avura nanidu pati ko kirikiri, da kina ho Yekova amoi avurako ni ku tii nduko yo.

4Ono awere Yekova nga gi Mbori fu zereda pati re kirikiri; a nga bakitingbanga ho, na gbigbita mangapai a te.

5Mo ngére, mi naberã pa dua bambu tipa rimo Yekova nga gi Mbori, a wa Yekova agumba ha fu buba nangia Dawidi, ki ya, ‘Wiro nga gu boro mi nikamaa ko ku auru ga mbatabakindo ku ba ro, ko nikadua bambu tipa rimore.’

6Mo rúgu aboro awere tie, ya i déwe agu angua nga akedara fere Rebanona yo; gimi aborosunge adú na gamo yo; mi afú mosoro foro tipa gu sunge nga ga gamo aborosunge ringbisi he kina kuti sangbaro; bambiko mo ini he ya a nga boro no dagba rani rengbe na dewa angua wa aboro Sidona du ni aoangbasia te.”

7Ho Irama agi gu pai ni nangia ga Soromo, rago ki ngba ti ko gbe, ko ki ya, “Sambuahe dú fu Yekova ni gi uru re, nga gu ko naafu gude tatamana fu Dawidi ko zogo gi bangenge aboro re.”

8Irama ki kedi pai koyo du Soromo ni, ki ya, “Mi makia pa agu apai mo akedi kono du mi ni; were, mi amánga agu apai dunduko mo akpi nyemu he tipa agu angua nga akedara, na gu nga akupuresa.

9Gimi aborosunge nikaye na ni Rebanona yo ku pangba baime; ki niseke he ni kpakparikpa ha si nindu ri baime ku rogo gu ba mo ka sia tipa ha, yo i ka kparaka ha ni, ki nifu he foro mo ki nirogo ho be yo. Mo afú riahe ni mosoro fu gimi aborokporo tipa ha, si ki digisi gu pai mi akpi nyemu he.”

10Si du Irama afu agu angua nga akedara ti ni fu Soromo na agu angua nga akupuresa a wa ko akpi nyemu he.

11Soromo ki nifu zende nganu wa aritere 7,400,000 fu Irama ni riahe fu gako aborokporo, na nzeme i asuka ha asuka wa aritere 7,400. Wo Soromo anaafu he fu Irama na garã na agara.

12Yekova afu tatamana fu Soromo, a wa ko akido pa ha; zereda ki du dagba Irama na Soromo; i ki zunga he dagba yo wa du yo ue.

13Bakindo Soromo azi aborosunge dagba awiri aYisaraere dunduko; agu aboro i azi yo i adu wa 30,000.

14Ko ki nikedi yo ni rikayo na diwi wa aboro 10,000 ku Rebanona yo. I asungu Rebanona yo tipa diwi sa, i ki nisungu ku kpuyo yo tipa diwi ue. Adonirama adu ni bakumba ku ri agu arika zizi aborosunge re.

15Ga Soromo aboro tindiro adu wa 70,000, na abageteke ambia ti abaagangara, i adu wa aboro 80,000;

16gbiakuti ga Soromo ababipasunge wa aboro 3,300 naadu ku ri agu aboro nanamanga sunge.

17Bakindo ki nirugu aboro, i ki nigeteke bakikindigi ambia, kii pa genoho akia, ka tona mburu bambu na sekeseke ambia.

18Ga Soromo abaduabambu na ga Irama abaduabambu na aboro Gebara nanaseka agi ambia re, ki nimbakadi angua na ambia ka dua bambu na ni.

← Chapter 4 Jump to: Chapter 6 →