1 Kings 17

Zande

← Chapter 16 Jump to: Chapter 18 →

1Eriya nangia boro Tesebe, ni gu Tesebe du Girada yo, ko ki ya fu Aba, “A wa du Yekova ni ungako, nga ga aYisaraere Mbori, nga gu ko ru mi bara bangiriko, ndomo ati nga na mai rogo agi agarã te re, kina kuti sangbare.”

2Ga Yekova pai ki ye koyo du ko ni, ki ya,

3“Mo gúari erẽ, ki ndu ku uroyo, ki gbu pati gu wiridi nga Kerita, du ku mbiti Yaradene ku uroyo.

4Si adú wo, mo ambíra kina gu wiridi re, mi ima ruga agu azire du wa anzagu ami nirigi ro yo.”

5Si du ko andu ti ni kuti sangba Yekova; ki da pati gu wiridi nga Kerita, du ku mbiti Yaradene ku uroyo, ki niraki yo.

6Si du azire du wa anzagu ki niye na riahe fu ko na pasio na wiso, riahe na pasio na nyemu a; ko ki nimbiri kina gu wiridi re.

7Si adu wa gere fuo ho ngbutuko, wiridi ki ugudi dunduko, bambiko mai ana nga ku rogo ringara te.

8Were sangba Yekova ki ye koyo du Eriya ni, ki ya,

9“Mo gúari, ki ndu ku Sarefata yo, du Sidona yo, ki niraki yo. Mo ngére, mi ima ruga pai fu dekurugbo yo nikariga ro.”

10Si du ko aguari ti ni ki ndu ku Sarefata yo; ho ko ada ni ti ngbadimo bakporo, oni ngére, dekurugbo adu yo nikua gari nyake. Ko ki yambu ri, ki ya, “Mi nakpara foro, mo yé na wiri ime na inga fere, mi mbiri he.”

11Ri ki ta ndu ka dia ha, ko ki yambu ri, ki ya, “Mi nakpara foro, mo yé na bete riahe be ro fere a.”

12Ri ki ya fu ko, “A wa du Yekova nga gamo Mbori ni ungako, riahe be re te, ono kina wiri fuo ngungo du pere yo ka i rogo ho ni kina be sa, na bete nzeme kambu yo; mo ngére, mi nakua wiri nyake ue, ka ndu ka manga ha na ni tipa rani na wire, ani ri he, ka kpika fuo ho.”

13Eriya ki ya fu ri, “Ka mo gúnde nga ya; mo ndú ka manga ha wa gumba mo ho; ono mo mángi wiri riahe fere mbata, ki ye na ni fere, fuo ho mo ki mangi he tipa ro na wiro.

14Bambiko wo poi Yekova nga ga aYisaraere Mbori, ‘Gu ngungo du pere yo si anyása nga te, gu nzeme du kambu yo si apáya nga a te, dati kina gu rago Yekova ka keda mai ku auru kpotosende.’ ”

15Ri ki ndu ki mangi he wa Eriya agumba ha. I ki niri riahe na ko tipa dungu arame, na gari aborokporo a.

16Were gu ngungo naadu pere yo si anyasa nga te, na gu nzeme naadu kambu yo apaya nga a te, a wa Yekova agumba ha ku ngba Eriya.

17Si ki ta du wa gere fuo agi apai re, kaza ki zi wiri gu de re, nangia naira gu kporo re. Kaza ki zingi kuti ko gbe, omeko ki bati be he.

18Ri ki ya fu Eriya, “Ako ga Mbori kumba, gini pai dũ dagba rani na mo? Ye mo ka tingida pa gi ingapai fere, ka imo wire!”

19Ko ki ya fu ri, “Mo fú wiro fere.” Ko ki di ko ti ngbaduri, ki ndu na ko ku ari yo ku rogo gu vuru bambu ko araka ni, ki pigi ko auru gako ba.

20Ko ki poi ku ari fu Yekova, ki ya, “Ako Yekova gi Mbori, mo namanga gi gbigbitapai fu gi dekurugbo re nga kina gu ri mi asunga kpuri erẽ ka imo wiriri?”

21Ko ki taĩ tiko auru kangba gude wa bara biata, ki kpari fu Yekova, ki ya, “Ako Yekova gi Mbori, mi nazungadi ro, mbisimo gi gude re karaga tiko ku rogo ko yo berewe.”

22Yekova ki gi fugo Eriya; mbisimo gu gude re ki karaga tiko ku rogo ko yo berewe ko ki zingi.

23Eriya ki di gude, ki zorõ na ko ki rimi ku dimo yo, ki fu ko fu nako. Eriya ki ya fu ri, “Mo ngére, wiro ni ungako.”

24Gu de re ki ya fu Eriya, “Awere mi ini he ya mo nga ga Mbori kumba, gu ga Yekova pai dũ ngbaro si nga rengo.”

← Chapter 16 Jump to: Chapter 18 →