Isaiah 10

Amharic Gofa GFBEVF (ጌሻ ማፃፋ)

← Chapter 9 Jump to: Chapter 11 →

1ኢታ ህገነ ኡንኤያ አዋጆ ከሰይሳታ አየ!

2ሄሳን ኤንቲ ማንቆታ፥ አምኤታነ ይኦታ ፕርዳ ጌላዮሶና፤ አምኤታነ ይኦታ አቁዋ ቦንቆሶና።

3እ፥ ሃሆ ቢታፈ ያ መቱዋን ሴርያ ዎደ ህንተ ዋናኔ? ማዶ ደማናዉ ኦደኮ ባቃታኔ? ህንተ ሻሉዋ አዉን ቆታኔ?

4ህንተ ድኤትዳ አሳራ ጎሸታና፤ ሀይቅዳ አሳ ግዶን ዝንአና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

5ጎዳይ ሀይሳዳ ያጌስ፤ “ታ ይሉዋስ ፕርጮነ ታ ሀንቁዋስ ፃምአ ግድዳ አሶረ ቢታ አየ!

6ኤንታ ሻሉዋ ድአናዳነ ቦንቃናዳ፤ ኦገ ኡርቃዳ ኤንታ የናዳ ፆሰ ኤሮና ካዎተ ቦላ ታኒ አሶረ ኪታና፤ ታና ሀንቀዳ አሳ ቦላ እያ የዳና።

7ሽን አሶረ ካዎይ ሀይሳ ሀልችቤና፤ እያ ዎዛናይ ሀይሳ ቆፕቤና። እ ቆፕዳይ ዳሮ ካዎተታ ይሳናሳ።

8ሄሳ ግሾ እ ያግድ ጬቀቴስ፤ ‘ታ ቶራ ሞጮናት ኡባይ ካዎታ ግዶኮናዬ?’

9ካልኖይ ካርካምሻ ካታማ መላ ግደነዬ? ሀማት አርፋዳ ካታማ መላ ግደነዬ? ሳማረይ ዳማስቆ ካታማ መላ ግደነዬ?

10የሩሳላመንነ ሳማረን ደእያ ኤቃታፐ ዳርያ ኤቃታ ጎይንያ ካዎተታ ሴራናዉ ታኒ ታ ኩሽያ የዳስ።

11ታኒ ሳማረ ካታማ ቦላነ እያ ኤቃ ምስለታ ቦላ ኦዳይሳዳ የሩሳላመ ካታማ ቦላነ እያ ኤቃ ምስለታ ቦላ ኦክናዬ?” ያግስ።

12ጎዳይ ፅዮነ ደርያ ቦላነ የሩሳላመ ቦላ ባ ኦሱዋ ኡባ ፖልዳፐ ጉየ፥ አሶረ ካዋ እያ ኦቶሩዋስነ ጬቁዋስ እያ ሴራና።

13አሶረ ካዎይ ሀይሳዳ ያጌስ፦ “ታ ኩሸ ምኖተን፥ ታ ጭንጫተንነ ታ አኬካን ሀይሳ ኦስ። ታኒ ካዎተታ ግዶን ደእያ ዛዋታ ሾዳስ፤ ኤንታ ሻሉዋ ቦንቃስ፤ ታ ዎልቃን ካዎተታ አራታፐ ዎሳስ።

14አስ ካፎ ኬን ኩሸ የደይሳዳ ታኒ ካዎተ ሻሉዋን ታ ኩሽያ የዳስ። ቃስ ዶገትዳ ጱጱለታ ሺሸይሳዳ ታኒ ቢታ ኡባ ሺሻስ። ባ ቀፍያ ቃዳይ ዎይኮ ዶና ጱቅዳይ ዎይኮ ዋስዳይ እሶይካ ባዋ” ያግስ።

15ካልት ባራ ቃንፅያ አድያ ቦላ ደንዳናዉ ዳንዳኢ? ዎይኮ ማጋዘይ ባናን ጎኤትያ አድያ ቦላ ኦቶራናዉ ዳንዳኢ? ኩሸይ ደንና ፃምእ ባና ባዉ ደን? ጉፈይ ኦይክያ አስ ባይና ባዉ ሄመቲ?

16ሄሳ ግሾ፥ ጎዳይ፥ ኡባፈ ዎልቃማ ፆሳይ፥ እያ ምኖ ኦላንቾታ ቦላ ግልቅስያ ሀርገ የዳና። እያ ቦንቹዋ ላፆ ታም ማና።

17እስራኤለ ፖኦይ ታማ ግዳና፤ ኤንታ ጌሻይ ላጮ ግዳና። እያ አጉንነ እያ ክንቾትያ እስ ጋላስ ፁጋናነ ማና።

18ሀርገይ አሰ ግልቅሰይሳዳ ጎዳይ ባ ዎራ ም ቦንቹዋነ ባ አራዳ ቢታ ቦንቹዋ ይሳና።

19ዎራን አትያ ምይ ዳሮ ጉ ግድያ ግሾ፥ ሀር አቶሽን ጉ ናእካ ታይብድ ዉርሳና።

20ሄ ዎደ እስራኤለፐነ ይሁዳፐ አትዳ ጉት ባንታና ሾጭዳይሳን ግዶናሽን፥ ቱማ ጎዳን፥ እስራኤለ ጌሻን ዘምፓና።

21አትዳ ይሁዳ አሳይ ዎልቃማ ፆሳኮ ስማና።

22ነኖ እስራኤለ፥ ኔኒ አባ ጋፃን ደእያ ሻፍያ መላ ዳርኮካ፥ አትዳ ጉታ ፃላል ስማና። ፅሎተ ኩምዳ ዮይ እያ አሳስ አዋጀትስ።

23ኤ፥ ጎዳይ፥ ኡባፈ ዎልቃማ ፆሳይ ሳአ ኡባ ቦላ ኤሀናዉ ቆፕዳ ዩዋ ኤሀና።

24ሄሳ ግሾ፥ ጎዳይ፥ ኡባፈ ዎልቃማ ፆሳይ ሀይሳዳ ያጌስ፦ “ፅዮነን ደእያ ታ አሳዉ፥ ግብፀት ኦዳይሳዳ አሶረት ህንተና ፃምአን ሾጭያ ዎደነ ባንታ ጉምባ ህንተ ቦላ ደንያ ዎደ ያዮፍተ።

25ጉ ዎደፐ ጉየ፥ ታኒ ህንተ ቦላ ሀንቀትዳይሳ አጋና፤ ሄሳፈ ጉየ፥ ታ ሀንቆይ ኤንታ ይሳናዉ ደንዳና” ያጌስ።

26ኡባፈ ዎልቃማ ጎዳይ ኦሬባ ሹቻ ማታን ምድያመታ ሾጭዳይሳዳ ኤንታ ልሶን ሾጫና። እ ግብፀን ኦዳይሳዳ ባ ፃምአ አባ ቦላ ደንና።

27ሄ ጋላስ፥ እያ ቶሆይ ህንተ ሀሽያፐ ዎና፤ እያ ቃምባራይ ህንተ ሞርገፈ ክቻና። ህንተ ኦርድዳ ግሾ ቃምባራይ መቃና።

28ሞርክያ ዎታዳራት ጋየ ካታማ ገልዶሶና፤ ምግሮናራ ካንዶሶና፤ ባንታ ኦላ ሚሽያ ምክማሳ ዎዶሶና።

29ኤንቲ ኦግያራ ካን አድ፥ ጌባን አቅዶሶና። ራማን ደእያ አሳይ ኮኮርዶሶና፤ ግብአን፥ ካዋ ሳኦላ ካታማን ደእያ አሳይ ባቃትዶሶና።

30ጋልማ አሳዉ፥ ዋሶ ጎችተ! ላይሻ አሳዉ፥ ስእተ! አናቶታ አሳዉ፥ ኦይሻ ዛርተ!

31ማድማና አሳይ ባቃትዶሶና፤ ገብማ አሳይ ባንታ ሸምፑዋስ ቆሰትዶሶና።

32ሞርክያ ዎታዳራት ሀች ኖባን ደኦሶና፤ ኤንቲ ፅዮነ ዙማ ቦላ ኤቅድ፥ ባንታ ኩሽያ ቃድ፥ የሩሳላመ ካታማ ባብሶሶና።

33ሄኮ፥ ጎዳይ፥ ኡባፈ ዎልቃማ ፆሳይ፥ ታሸታ ግታ ዎልቃን ሻቃና፤ አዱቅዳ ምት ቃንፀታና፤ ቃ ግዳይሳት ካዉያና።

34ጎዳይ ስከትዳ ዎራ ካሎታና ጋካናዉ ቃንፃና፤ ልባኖሰይ ዎልቃማ ስንን ኩንዳና።

← Chapter 9 Jump to: Chapter 11 →