Isaiah 41

Amharic Gofa GFBEVF (ጌሻ ማፃፋ)

← Chapter 40 Jump to: Chapter 42 →

1ህንተኖ፥ ዩሾይ አባን ተቀትዳ ቢታቶ፥ ስእ ግድ፥ ታኒ ኦደይሳ ስእተ! ደረይ ባንታ ዎልቃ ኦራ፤ ኤንቲ ሃ ሺቅድ፥ ኦደቶ፤ አነ ኑኒ ፕርደታናዉ እስፈ ሺቆስ።

2“ዶሎሀ ባጋፈ እሱዋ ደንድ ብያ በሳ ኡባን ፆኖ እመይ ኦኔ? እ ካዎተታ እያ ኩሸን አድ እሜስ፤ ካዎታ እያዉ ሃርስስ። እ ኤንታ ባ ማሻን ብዶ ከሴስ፤ ባ ዶንግያን ኤንታ ፑኖ ኦስ።

3እ ኤንታ የደሸ፥ እያ ቶሆይ ካሰ የቦና ኦግያራ ሳሮ ካንስ።

4ሀይሳ ኦዳይነ ፖልዳይ የለተካ ኮይሮፐ ፄግዳይ ኦኔ? ታኒ ጎዳይ፥ ኮይሩዋራ ደአይስ ዉርሰራካ ደኤይ ታና” ያጌስ።

5ዩሾይ አባን ተቀትዳ ቢታት፥ ሄሳ በእድ ያይዶሶና፤ ሳኣ ጋፃን ደኤይሳት ኮኮርዶሶና። ኤንቲ እስፈ ሺቅድ ታኮ ይዶሶና።

6እሶይ እሱዋ ማዴስ፤ ባ እሻ፥ “ምና” ያጌስ።

7ኩሸ ሂላንቾይ ዎርቃ ሼሸይሳ ምንስ፤ ናርቃን ቆፅድ ሌእሰይስ ባቻን ብራታ ሴርሰይሳ፥ “ምና” ጌስ። እ ብራታ ንይሳ፥ “ሎኦ ኦሳ” ያጌስ፤ ኤቃይ ቃፆና መላ ምስማረን ሼስ።

8“ሽን ነኖ እስራኤለ፥ ታ አይልያዉ፥ ታ ዶርዳ ያይቆባ፥ ታ ላግያ አብራሃመ ኮቻዉ፥

9ታኒ ነና ቢታ ጋፃፐ ኤሀስ፤ ሃሆሶፐ ፄጋዳ፥ ‘ኔኒ ታ አይለ’ ታኒ ነና ዶራስ፤ ታኒ ነና የግከ።

10ያዮፋ፥ ታኒ ኔራ ደአይስ፤ ዳጋሞፋ፥ ታኒ ነ ፆሳ። ታኒ ነና ምንና፤ ነና ማዳና፤ ታኒ ነና ፆንያ ታ ኡሻቻ ኩሽያን ካትሳና።

11ነ ቦላ ሀንቀትያ ኡባይ ዬላትድ ካዉያና፤ ኔራ ኤቀተይሳት ባይናባ ግዳና።

12ነ ሞርከታ ኔኒ ኮያና፤ ሽን ኤንታ ደማካ፤ ነና ኦለይሳት ባይናባ ግዳና።

13ታኒ ጎዳይ፥ ነ ፆሳይ፥ ነ ኡሻቻ ኩሽያ ኦይካና፤ ያዮፋ፥ ታኒ ነና ማዳና።

14ነኖ ጉፁንያዉ፥ ያይቆባ፥ ህንተኖ እስራኤለ አሳዉ፥ ያዮፍተ፤ ታኒ ህንተና ማዳና፤ ህንተና ዎዝያ እስራኤለ ጌሻይ ታና።

15ሄኮ፥ ታኒ ነና ኦራ፥ ቃራነ አቻራ ደእያ፥ ካ ቆፅያ ሚሸ ኦስ። ኔኒ ደረታ ቆፃዳ ሊቅሳና፤ ዙማታካ ፑኖ ኦና።

16ኔኒ ኤንታ ፑናና፤ ጫርኮይ ኤንታ ኤፋና፤ ሽን ኔኒ ጎዳን ኡፋይታና፤ እስራኤለ ጌሻን ቦንቸታና።”

17“ማንቆትነ መቶታንቾት ሃ ኮያና፥ ሽን ደሞኮና፤ ኤንታ ቆይ ሳሞን መላና። ግዶሽን፥ ታኒ ጎዳይ ኤንታ ስአና፤ ታኒ፥ እስራኤለ ፆሳይ፥ ኤንታ አግከ።

18ታኒ መላ ዙማታ ቦላ ሻፋ፥ ዛንጋራታን ፑልቶ ሳና። ባዙዋ ሃ ኤልያ በሲ፥ መላ ቢታ ፑልቶይ ከያሶ ኦና።

19ታኒ መላ ቢታን፥ ዝጋ፥ ሶቃላ ም፥ ባርሰኔተ ምነ ሻማሆ ዶልሳና። መላ ቢታ ፂድ፥ ማሮይነ ጫጭ ኩምዳ ቢታ ኦና።

20እስራኤለ ጌሻይ ሄሳ መዳይሳነ ጎዳ ኩሸይ ሄሳ ኦዳይሳ አሳይ በአና፥ ኤራና፥ ቆፓናነ አኬካና መላ ታኒ ሄሳ ኦስ።”

21“አነ ህንተ ሞቱዋ ሺሽተ” ያጌስ ጎዳይ፤ “አነ ህንተ ማርካ ሃ ኤህተ” ያጌስ ያይቆባ ካዎይ።

22አነ ኤንቲ ባንታ ኤቃታ ሃ ኤሆ፥ አይብ ሀናኔኮ ኤንታ ኤቃት ኑስ ኦዶ። ኑኒ አኬካና መላነ ኤንታ ዉርሰ ኤራና መላ ካሰ ሀንዳባይ አይበኮ ኑስ ኦዶ፤ ዎይኮ ስንፈ ሀናናባ ኑስ ቆንጭሶ።

23ህንተ ፆሳታ ግደይሳ ኑኒ ኤራና መላ ስንፈ ያናዉ ደእያባ ኑስ ኦድተ። ኑኒ ዳጋማና መላነ ያያና መላ፥ ሎኦ ግድን ኢታ ግድን አነ እስባ ኦተ።

24ሽን ህንተ ባይናባ መላ፤ ህንተ ኦሶይካ ሀዳ፤ ህንተና ዶርያ አሳይካ እፀትዳይሳታ።

25ታኒ ፑደሀ ባጋፈ እሱዋ ደንን፥ እ ዬስ። ታ ሱን ፄግያ እሶይ ዶሎሀፐ ያና፤ ኦቶ መይስ ኡርቃ የይሳዳ፥ እ ካለይሳታ የና።

26ኑኒ ኤራና መላነ እ ልከ ጋና መላ ካሰትድ ኑስ ሀይሳ ኦድዳይ ኦኔ? ህንተፈ ኦንካ ካሰትድ ሀይሳ ቆንጭስዳይ፥ ዎይኮ አዋጅዳይ ዎይኮ ባ ቃላ ስስዳይ ባዋ።

27ታኒ ሀይሳ ካሰታዳ ፅዮነስ ኦዳስ፤ ታኒ የሩሳላመስ ምሽራቾ ኦደይሳ እማስ።

28ሽን ታኒ ፄልያ ዎደ እሶይካ ባዋ፤ ታኒ ዞረ ኦይችያ ዎደ ኤንታ ኤቃታ ግዶፈ ዛሮ እምያ እሶይካ ባዋ።

29ሄኮ፥ ኤንቲ ኡባይ ሀዳ፤ ኤንታ ኦሶይካ ፓና፤ ሼሽድ መዳ ኤንታ ምስለትካ ጫርኮ።

← Chapter 40 Jump to: Chapter 42 →