Isaiah 58

Amharic Gofa GFBEVF (ጌሻ ማፃፋ)

← Chapter 57 Jump to: Chapter 59 →

1ጎዳይ ሀይሳዳ ያጌስ፦ “ነ ቃላ ቁ ኦዳ ዋሳ፤ ጉየ ጎፓ፤ ነ ቃላ ሞይዘዳ ቁ ኦ። ታ አሳስ ኤንታ ጌላተ፥ ያይቆባ ኬስ ኤንታ ናጋራ ኦዳ።

2ሽን ኤንቲ ታና ጋላስ ጋላስ ኮዮሶና፤ ታ ኦግያ ካላናዉ ዶስያ ዳኖሶና። ፅሎ ኦዳነ ፆሳ ኪታ አግቦና አሳዳ ኤንቲ ታና ሱረ ፕርዳ ኦይቾሶና፤ ታኮ ፆሳኮ ሺቃናዉ ዶስያ ዳኖሶና።

3ኤንቲ ጎዳኮ፥ ‘ኑኒ ፆሞስ፥ ሽን ኔኒ አይስ ኑና ፄልኪ? ኑኒ ኑናተ ካዉሽዳ፥ ሽን ኔኒ አይስ ኤሮናዳ ሀናድ’ ያጎሶና። ጎዳይ ዛሪድ፥ ‘ሄኮ፥ ህንተ ፆምያ ዎደ ህንተና ኡፋይስያባ ኦታ፤ ህንተ ኦሳንቾታ ኡንኤታ።’

4ህንተ ኦሻንነ ፓላማን ፆሜታ፤ ቃይ ባይና ኢታ ደሸ ደቻናዉ ፆሜታ። ሄሳ መላ ፆምያ ህንተ ዎሳይ ቦላ ሳሉዋን ስኤቶና መላ ኦስ።

5ታኒ ዶርዳ ፆማይ ሀይሳ መላ ፆሜ? እስ አስ ባናተ ካዉሸይ ሀይሳ መላ ጋላሳ ፃላላኔ? ታኒ ኮይያ ፆማይ አስ ባ ሁጵያ ካፅዳ ጋሸዳ ሆክሳና መላነ ብዶ ትየትድ ካዮ ማኦ ማእድ ኡተዬ? ህንተ ሄሳ ፆማ ግድ ፄገትዬ? ሄ ፆማ ጋላሳይ ጎዳ ስንን ኤከትዬ?

6“ታኒ ዶርያ ፆማይ ሀይሳ፤ ሱረ ፕርዳ ዮ ሳንላታ ብላና መላነ ቃምባራ መንድ ኡንኤትዳይሳታ ላአ ከሳና መላ ግደነዬ?

7ታኒ ዶርያ ፆማይ ኮሻትዳይሳ ሙዛና መላ፥ ኬ ባይና ማንቆታ ሶ ኤካና መላ፥ ካሎትዳይሳ በአዳ ማይዛና መላነ ማዶ ኮይያ ህንተ ዳቡዋፈ ህንተና ገንና መላሳ ግደኔ?

8ያትኮ፥ ህንተ ፖኦይ ዎንታ ፃልቀዳ ፖአና፤ ህንተ ፓፆተይ ኤሶን ያና። ህንተ ፅሎተይ ህንተፈ ስንራ ባና፤ ጎዳ ቦንቾይ ህንተፈ ጉየራ ግድድ፥ ህንተና ናጋና።

9ሄ ዎደ ህንተ ፄጋና፤ ጎዳይ ህንተዉ ኮያና። ህንተ ማዶ ኮይድ ዋሳና፤ እ፥ ‘ሄኮ፥ ታኒ ሀይሳን ደአይስ!’ ያጋና። “ህንተ ግዶፈ ኡንኤያ ቃምባራ ድግኮ፥ ብራን ማለይሳነ ኢታባ ኦደተይሳ አግኮ፥

10ኮሻትዳይሳ ሙዝኮ፥ መቶትዳይሳታ ኮሽያባን ማድኮ፥ ሄ ዎደ ህንተ ፖኦይ ማን ፖአና፤ ህንተ ቃማይ ሴታ ጋላስ ግዳና።

11ጎዳይ ህንተና ኡባ ዎደ ካለና፤ ህንተና መላ ቢታን ኮሽያባን ካልሳና፤ ህንተ ፃጱዋ ፃልሳና። ህንተ ሃ ኡያ ጋናተ መላነ መል ኤሮና ሃ ፑልቶ መላ ግዳና።

12ነ አሳይ በን ላለትዳ በሳታ ዛሪድ ኬፃና፤ ዳሮ ዎደፐ ካሰ ባሰትዳ ባሶታ ኬፅድ ቁ ኦና። ህንተ ‘ላለትዳ ግምበታ ግምበይሳታነ አሳይ ደእያ በሳነ ዎጋ ኦገይ ደእያ ካታማታ ኤሰይሳታ ጌተታና።’

13“ሳምባታ ጋላሳ ቦንቾ አጎና እፅኮ፥ ታ ጌሻ ጋላስ ህንተ ጎአ የደይሳ አግኮ፥ ሳምባታ ኡፋይስነ ቦንቸትዳ፥ ጎዳ ጋላሳ ቦንቾ ጋዳ ፄግኮ፥ ህንተ ህንተ ኦግያ ቦና አግድ ሄ ጋላሳ ቦንችኮ፥ ህንተና ኡፋይስያባ ኦናነ ሀዳባ ኦደቶና አግኮ፥

14ሄ ዎደ ህንተ ጎዳን ኡፋይታና፤ ታኒ ህንተና ዳሮ ቦንቸትዳይሳታ ኦና፤ ህንተ አዋ ያይቆባ ላታ ህንተ ማና መላ ኦና። ታኒ ጎዳይ ሀይሳ ኦዳስ” ያጌስ።

← Chapter 57 Jump to: Chapter 59 →