Isaiah 66

Amharic Gofa GFBEVF (ጌሻ ማፃፋ)

← Chapter 65 Jump to:

1ጎዳይ ያጌስ፤ ሳሎይ ታ አራታ፥ ሳእ ታ ቶሆይ የያ በሰ። ያትን ህንተ ታዉ ኬፅያ ኬይ፥ አይ መላ ኬ? ታ ሸምፓና በሳይ አዉሴ?

2ሀይሳ ኡባ ታ ኩሸይ ኦስ፤ ኤንትካ ሀንዶሶና። ሽን ታኒ ባና ዝቅ ኦያ ኡራ፥ ባ አያናን መቅዳ ኡራነ ታ ቃላን ኮኮርያ ኡራ ፄላና።

3ኮርማ ያርሸይ አሰ ዎያ አሳ መላ፤ ኡርገ ዶርስ ያርሸይ ካና ያርሽያ አሳ መላ፤ ካ ያርሾ ያርሸይ፥ ጉዱን ሱ ያርሽያ አሳ መላ፤ ቆፍሶ እፃነ ጩይሰይ ኤቃ ጎይንያ አሳ መላ። አሳ ኡባይ ባዉ እንጀትያ ኦገ ዶርዶሶና፤ ኤንታ ሸምፖይ ኤንታ ቱናተን ኡፋይቴስ።

4ሄሳ ግሾ፥ ታኒ ኤንታ መቶስ አ እማና፤ ኤንቲ ያይዳባ ኤንታ ቦላ ኤሀና። ታኒ ፄግዳ ዎደ ኦንካ ኮይቤና፤ ታኒ ኦድያ ዎደ ኦንካ ስእቤና። ኤንቲ ታ ስንን ኢታባ ኦዶሶና፤ ታና ኡፋይሶናባ ዶርዶሶና።

5ህንተኖ፥ ጎዳ ቃላስ ኮኮረይሳቶ እያ ቃላ ስእተ፦ “ህንተና እፅያ ህንተ እሻት፥ ታ ሱን ግሾ፥ ህንተና ኩረይሳት፥ ‘ህንተ ኡፋይትን ኑኒ በአና መላ አነ ጎዳይ ቦንቸቶ’ ” ያግዶሶና፤ ሽን ኤንቲ ዬላታና።

6ካታማፐ ያ ዋሱዋ ስእተ፤ ፆሳ ኬፈ ከይያ ግርሳ ስእተ። ሄ ግርሳይ ባ ሞርከታስ ኤንታ ኦሱዋዳ ኩሸ ዛርያ ጎዳ ግርሳ።

7“እቀቶና ናአ የልያ ማጫስ ደኢ? ባናኮና አደ ናአ የልያ ማጫስ ደኢ?

8ሀይሳ መላባ ኦነ ስእዳይ? ሄሳ መላባ ኦነ በእዳይ? እስ ደረይ እስ ጋላስ የለታናዉ ዳንዳእዬ? እስ ካዎተ ቅጵ ዛሮን መትዬ? ፅዮነይ ቡሮ እቀ ኦይኮና፥ ኤለሳዳ ባ ናይታ የላሱ።

9የላና ዎደ ጋያ ታኒ ኤንቲ የላናዳ ኦክናዬ? የላናዳ ኦያ ታኒ የልያ ኡሎ ጎርዳይናዬ? ሀይሳ ግዳይ ታና፥ ጎዳ፥ ነ ፆሳ።

10ህንተኖ የሩሳላሞ ዶስያ ኡባዉ፥ ኢራ ኡፋይትተ፤ እ ግሾ ኡፋይሳን ኖጩ ጊተ። ህንተኖ እዉ ዬክያ ኡባዉ፥ ኢራ ኡፋይትተ።

11ህንተ፥ እያ ምንያ ን ምድ ካላና፤ እ ዳሮ ቦንቹዋፈ ሎይ ኡይድ፥ ኡፋይታና።”

12ጎዳይ ያጌስ፤ “ታኒ እዉ ሳሮተ ሻፋዳ ዳርሳና፤ እዉ ካዎተታ ዱረተ ክፃ ሻፋዳ ኤሀና። ህንተ ሄሳ ማና፤ እ ሀሽያን ቶከታና፤ እ ክኦን ኡትድ ባሎታና።

13አይያ ባ ናአ ምንይሳዳ ታኒ ህንተና ምንና፤ ህንተ የሩሳላመን ምነታና።

14ሄሳ ህንተ በእያ ዎደ ህንተ ዎዛናይ ኡፋይታና፤ ህንተ መቀይ ማታ መላ አጫና። ጎዳ ኩሸይ እያ አይለታ ቦላ ደኤይስን እያ ሀንቆይ እያ ሞርከታ ቦላ ደኤይስ ኤረታና።

15ሄኮ፥ ጎዳይ ታማራ ያና፤ እያ ፓራ ጋረት ጎተ መላ። ባ ሸንያ ሀንቆን፤ ባ ሴራካ ታማ ላጮን ቆንጭሴስ።

16ጎዳይ አሾ ማእዳ ኡባ ታማንነ ማሻን ፕርዳና፤ ዳሮት ጎዳ ማሻን ሀይቃና።

17“ባንታ ኤቃ ጎይናናዉ አታክልተ ጋደ ባናዉ፥ ባንታና ዱማየይሳትነ ጌሸይሳት፤ ጉዱን፥ ኤጨረነ ሀራ ቱናባታ መይሳታ ግዶፈ እሱዋ ካልድ በይሳት ኡባይ ያና።

18“ታኒ ኤንታ ኦሱዋነ ኤንታ ቆፋ ኤርያ ግሾ፥ ካዎተታነ ዱማ ዱማ ዶናን ኦደተይሳታ፥ እስፈ ሺሻና፤ ኤንቲ ሺቅድ፥ ታ ቦንቹዋ በአና።

19ታኒ ኤንታ ግዶን ማላታ ኦና፤ ኤንታፈ አትዳይሳታ ግዶፈ ታ ግታተ ስእቦናነ ታ ቦንቹዋ በእቦና ካዎተታኮ፥ ታርሰሳኮ፥ ሊበኮ፥ ሊደኮ፥ ቱባላኮ፥ ያዋናኮነ ዩሾይ አባን ተቀትድ ሃሆ ቢታታኮ ኪታና፤ ኤንቲ ታ ቦንቹዋ ካዎተታ ግዶን አዋጃና።

20እስራኤለ አሳይ ካ ያርሹዋ ጌሻ ሚሸን ዎድ ፆሳ ኬ ኤሄይሳዳ፥ ኤንቲ ህንተ እሻታ ኡባ ካዎተታ ግዶፈ፥ ፓራታን፥ ፓራ ጋረታን፥ ግማለታን፥ ባቁሎታንነ ጫነ ጋረታን ኡትስድ፥ ጎዳስ እሞ ኦድ ታ ጌሻ ዙማ ቦላ የሩሳላመ ኤሀና።

21ኤንታፈ እሶታ እሶታ ካህነነ ሌወ ኦና” ያጌስ ጎዳይ።

22“ታኒ መዳ ኦራ ሳሎትነ ኦራ ሳእ ታ ስንን ምንድ ደኤይሳዳ፥ ህንተ ኮቻይነ ህንተ ሱንይ ምንድ ዳና።

23አጌና ፄሮፐ ብድ አጌና ፄሮ ጋካናዉ፥ ሳምባታፐ ብድ ሳምባታ ጋካናዉ አሳ ኡባይ ታ ስንን ጎይናናዉ ያና።

24ኤንቲ ከይድ ብሸ፥ ታ ቦላ ማካልዳ አሳ አሀ በአና። ኤንታ ምያ ጉፁነይ ሀይቀና፤ ኤንታ ፁግያ ታማይ ቶኤና፤ ኤንቲ አሳ ኡባስ ሻትያባ ግዳና” ያጌስ ጎዳይ።

← Chapter 65 Jump to: