Isaiah 6

Amharic Gofa GFBEVF (ጌሻ ማፃፋ)

← Chapter 5 Jump to: Chapter 7 →

1ካዎይ ኦዝያን ሀይቅዳ ላይ ጎዳይ ቃ አራታንነ ቦንቾ በሳን ኡትዳይሳ በአስ፤ እያ ማኦይ ፆሳ ኬ ኩምስ።

2ሱራፌላ ጌተትያ ኪታንቾት እያፐ ቦላራ ደኦሶና፤ እስ እስ ኪታንቹዋስ ኡሱፑን ቀፈት ደኦሶና፤ ናምኡ ቀፈታን ባ ሶምኡዋ ካሜስ፤ ናምኡ ቀፈታን ባ ቶሁዋ ካሜስ፤ ናምኡ ቀፈታን ፕራስ።

3ኤንቲ እሶይ እሱዋኮ፥ “ጌሻይ፥ ጌሻይ፥ ጌሻይ፥ ኡባፈ ዎልቃማ ጎዳ! ሳአ ኡባይ እያ ቦንቹዋን ኩምስ” ያጎሶና።

4ኤንታ ግርሳ ዋሱዋ ጋሶን ፆሳ ኬ ባሶይ ቃፅስ፤ ፆሳ ኬይ ጩያን ኩምስ።

5ያትን፥ “ታኒ መተርሻይ ቱንዳ አሳ ግዶን ደአይስ፤ ታ መተርሻይካ ቱና። ታኒ ካዋ፥ ኡባፈ ዎልቃማ ጎዳ ታ አይፈን በእዳ ግሾ፥ ታና አየ! ታ ያስ!” ያጋስ።

6ሄ ኪታንቾታፐ እሶይ ያርሾ በሳፈ ቦንቆ ታማ ቃጰራ ኤክድ ፕራሸ ታኮ ይስ።

7ቦንቆ ታማን ታ መተርሻ ቦችድ፥ “ሄኮ፤ ሀ ቦንቆ ታማይ ነ መተርሻይ ቦችዳ ግሾ ነ ናቆይ ኔፐ ክችስ፤ ነ ናጋራይ አቶ ጌተትስ” ያግስ።

8ሄሳፈ ጉየ ጎዳይ፥ “ኦና ኪቶ? ኑስ ኦነ ባናይ?” ያግሽን ስአስ። ታኒ፥ “ሄኮ፥ ታና ኪታ፥ ታኒ ባና” ያጋስ።

9ጎዳይ ታኮ፥ “ባዳ ሀ አሳ፥ ‘ህንተ ስስ ስኤታ፥ ሽን አኬከከታ፤ ህንተ ፄለታ፥ ሽን ደመከታ’ ” ያጋዳ ኦዳ።

10ካልድካ፥ “ሀ አሳ ዎዛና ሙምሳ፤ ኤንታ ሀይ ቱልሳ፤ ኤንታ አይፍያ ጎዛ። ሄስ ሀኖና እፅኮ፥ ኤንቲ ባንታ አይፍያን በእድ፥ ባንታ ሀይን ስእድ፥ ባንታ ዎዛናን አኬክድ፥ ታኮ ስማና፤ ዛሪድ ፓፃና” ያግስ።

11ታኒ፥ “አቤት ጎዳዉ፥ ሄስ ሀናናይ አዉደ ጋካናሴ?” ያጋስ። እ ዛሪድ፥ “ካታማት ላለታና ጋካናዉ፥ ኬት ካይሳ ግዳና ጋካናዉ፥ ቢታይ ፖሎ ዶገታና ጋካናዉ፤

12አሳ ሃሆ በሲ የዳና ጋካናዉነ ቢታይ አስ ባይና መላ ቢታ ግዳና ጋካናሳ።

13ታሙ አሳፐ እስ አስ ቢታ ቦላ አትኮ፥ እካ ያና። ቃንፅን አትዳ ዎላነ ጫጫ ዱሩማ መላ ግዳና፤ ሄ ዱሩማይ ጌሻ ኮቸ ግዳና” ያግስ።

← Chapter 5 Jump to: Chapter 7 →