Isaiah 19

Amharic Gofa GFBEVF (ጌሻ ማፃፋ)

← Chapter 18 Jump to: Chapter 20 →

1ግብፀ ቦላ ጎዳይ ሀይሳዳ ያግድ ኦድስ: “ሄኮ፥ ጎዳይ ኤሶትያ ሻራ ቶግድ፥ ግብፀ ዬስ። ግብፀ ኤቃት እያ ስንን ኮኮራና፤ ግብፀ አሳ ዎዛናይ ያሻን ትልአና።

2ግብፀ አሳ እሱዋ እሱዋ ቦላ ደንና። እሻይ እሻ ቦላ፥ ሾሮይ ሾሩዋ ቦላ፥ ካታማይ ካታማ ቦላ፥ ካዎተይ ካዎተ ቦላ ደንዳና።

3ግብፀ አሳይ ኤሾ ያና፤ ታኒ ኤንታ ሀልቹዋ ሀዳ ኦና። ኤንቲ ባንታ ኤቃታ፥ ሞይትለራ ኦደተይሳታ፥ ብታንቾታነ ማሮታ ዞረ ኦይቻና።

4ታኒ ዎዛና ምኖ ግድዳ ግብፀ ካዋ ኩሸን አዳ እማና፤ እ ኤንታ ሃራና” ያጌስ ኡባፈ ዎልቃማ ጎዳይ።

5ናይለ ሻፋ ጉፅ ጉፅ ባና፤ ሃይካ መላና።

6ዋይ ፅንቃና፤ ግብፀ ሃት ጉፃናነ መላና፤ ማይረይነ ማቃይ ሹላና፤

7ናይለ ሻፋ ጋፃን ደእያ ጭልኦባይ መላና፤ እያ ሄራን ዘረትዳ ካ ኡባይ መላናነ ያና።

8ሞሎ ኦይከይሳት ካዮታና፤ ናይለ ሻፋን ግተነ ሞሎ ማንፃቆ የግያ ኡባይ ዬካናነ ዶጫና።

9ፓደትዳ ታልባፈ ሊኖ ማኦ ኦይሳት፥ ቦ ማኦ ዳድያ ዶርዘት ኡፋይስ ቃንፃና።

10ፒቀይሳትነ ኡነ ኦያ ኡባይ ካዮታና።

11ፆኣነ ሃረይሳት ኤያ፤ ግብፀ ካዋ ዞርያ ጭንጫት ፓና ዞረ ዞሮሶና። ያትን፥ ህንተ ግብፀ ካዋኮ፥ “ኑኒ ጭንጫታ ናይታ፤ ኑኒ በን ካዎታ ናይታ” ጋናዉ ዋንድ ዳንዳኤቲ?

12ያትን፥ ነ ጭንጫ አሳት ሀእ አዉን ደኦና? ኡባፈ ዎልቃማ ጎዳይ ግብፀ ቦላ ኦናዉ ሀልችዳባ አነ ኤንቲ ነዉ ኦዶነ ነና ኤርሶና።

13ፆኣነ ሃረይሳት ኤይዶሶና፤ መምፕሳ ሃረይሳት ጭመትዶሶና። ግብፀ ዞርያ ግታ አሳት እያ ባለዶሶና።

14ጎዳይ ኤንታ ግዶን ኤይስያ አያና የድስ፤ ኤንቲ ማትዳ አስ ባ ጮሻን ጎንዶረተይሳዳ ግብፀይ ባ ኦሶ ኡባን ጎንዶረታና መላ ኦዶሶና።

15ዛምቦይ ዎይኮ ቦዝ፥ ዛምባ ታሸይ ዎይኮ ማይረይ ግብፀን ኦናባይ አይብካ ባዋ።

16ሄ ጋላስ ግብፀ አሳይ ማጫሳ መላ ግዳና። ኤንቲ ኡባፈ ዎልቃማ ጎዳይ ኤንታ ቦላ ቃያ እያ ኩሽያ በእድ ያሻን ኮኮራና።

17ይሁድ ግብፀ ያሽሳና፤ ኡባፈ ዎልቃማ ጎዳይ ኤንታ ቦላ ኦናዉ ቆፕዳ ቆፋ ግሾ ይሁዳባ ስእያ ኡባይ ያያና።

18ሄ ጋላስ ግብፀ ቢታን ደእያ እቻሹ ካታማት ካናነ ቃላን ኦደተይሳታነ ኡባፈ ዎልቃማ ጎዳስ አማነታናዉ ጫቀይሳታ ግዳና። ሄ ካታማታፐ እሶይ፥ “አዋ ካታማ” ጌተትድ ፄገታና።

19ሄ ዎደ ግብፀ ቢታስ ግዱዋን፥ ጎዳስ ያርሾ በሳይ ጊጋና፤ ቃስ ግብፀ ቢታ ዛዋን ጎዳስ ቱስ ኤቃና።

20ሄስ ኡባፈ ዎልቃማ ጎዳስ ግብፀ ቢታን ማላነ ማርካ ግዳና። ኤንቲ ባንታና ኡንኤይሳታ ግሾ ጎዳኮ ዋስያ ዎደ ኤንታዉ አሸይሳ ኪትድ ኤንታ አሻና።

21ሄ ዎደ ጎዳይ ግብፀ ቢታን ኤረትዳይሳ ግዳና፤ ግብፀ አሳይ ሄ ጋላስ ጎዳ ኤራና። ያርሾነ ካ ያርሾ ኤክ ይድ እያ ጎይናና። ኤንቲ ጎዳስ ቃንጋናነ ባንታ ቃንገ ጋና።

22ጎዳይ ግብፀ ቢታ ሾጫና፤ እዮ ዛሪድ ፓና። ኤንቲ ጎዳኮ ስማና፤ እ ኤንታ ዎሳ ስእድ ፓና።

23ሄ ጋላስ ግብፀፈ አሶረ ጋካናዉ ዳልጋ ኦገይ ከያና፤ አሶረ አሳይ ግብፀ፥ ግብፀ አሳይ አሶረ ስመረታና፤ ግብፀ አሳይ አሶረ አሳራ እስፈ ጎይናና።

24ሄ ጋላስ እስራኤለይ ግብፀራነ አሶረራ ሄን ቢታ ግድድ፥ ሳኣስ አንጆ ግዳና።

25ኡባፈ ዎልቃማ ጎዳይ ኤንታ ሀይሳዳ ያግድ አንጃና፦ “ታ አሰ ግድዳ ግብፀይ አንጀቶ፤ ታ ኩሸ ኦሶ ግድዳ አሶረይ አንጀቶ፤ ታ ላታ ግድዳ እስራኤለይ አንጀቶ” ያጋና።

← Chapter 18 Jump to: Chapter 20 →