Isaiah 24

Amharic Gofa GFBEVF (ጌሻ ማፃፋ)

← Chapter 23 Jump to: Chapter 25 →

1ሄኮ፥ ጎዳይ ቢታ ላላናነ ባይሳ ከሳና፤ እ፥ ቢታ ይስድ እያን ደእያ አሳ ላላና።

2አስ ኡባይ እስኖ ግዳና፤ ካህነይ አሳራ እስኖ ግዳና፤ አይለይ ጎዳራ እስኖ ግዳና፤ ጋንድያ ጎዳተራ እስኖ ግዳና፤ ሻመይስ ባይዘይሳራ እስኖ ግዳና፤ ታልኤ እመይስ ታልኤ ኤከይሳራ እስኖ ግዳና፤ አጮ አቸይስ አጮ ጭገይሳራ እስኖ ግዳና።

3ቢታ ኡባይ ቦንቀትድ ባይሳ ግዳና፤ ጎዳይ ሀ ቃላ ኦድስ።

4ቢታይ መላና፥ እያ አጫይ ሹላና፤ አላመይ አርጋጫና፥ ዳቡራና፤ ቢታን ደእያ ዎልቃማ አሳይ ዳቡራና።

5ቢታይ ባናን ደእያ አሳ ጋሶን ቱንስ። ኤንቲ ህግያስ ኪተትቦኮና፤ ዎጋ ናግቦኮና፤ መርና ጫቁዋ መንዶሶና።

6ሄሳ ግሾ፥ ባደይ ቢታ ሜስ፤ አሳይ ባንታ ናጋራ ጋሶን ፕርደታናዉ በሴስ። ሳአን ደእያ አሳይ ፁገትዶሶና፤ ጉ አስ አትስ።

7ዎይነይ ፃጶራ መልስ፥ ማልአንቶ ዎይነይ ዉርስ፤ ካሰ ኡፋይትያ ኡባይ አዛንስ።

8ካራቦ ባቆይ አትስ፤ የ ዋሶይ ስእ ግስ፤ ኡፋይስያ ዲ ዱርሳይ ኤቅስ።

9ህዛፐ የፅሸ ዎይነ ኡሻ ኡዮኮና፤ ኡሻይካ ኤንታዉ ጫሞ ግዳና።

10ላለትዳ ካታማይ ባይሳ ግዳና፤ ኦንካ ገሎናዳ ኬ ኡባይ ጎርደትስ።

11ዎይነ ኡሽ ይዳ ግሾ አሳይ ዳባባን ዋሴስ፤ ኡፋይስ አዛኖን ላመትስ፤ ኡፋይስያባይ ሳአፐ ይስ።

12ካታማይ ላለትስ፤ ካታማ ፐንገት መቀረትዶሶና።

13ሻማሆ ቴራ ቆቆፈይሳዳ፥ ዎይነ ማፅ ስምን፥ ፖሽለይ አተይሳዳ፥ ቢታ ቦላ ደእያ ካዎተታ ቦላ ሄሳዳ ሀናና።

14ኤንቲ ባንታ ቃላ ቁ ኦድ፥ ኡፋይሳን የፆሶና፤ ዉሎሀ ባጋራ ደእያ ኡባይ ጎዳ ግታተ ኦዳና።

15ሄሳ ግሾ፥ ዶሎሀ ባጋራ ደኤይሳት፥ ጎዳስ ቦንቾ እማና፤ ዩሾይ አባን ተቀትዳ ቢታት ጎዳስ፥ እስራኤለ ፆሳስ ቦንቾ እማና።

16ኑኒ፥ “ፅሉዋስ ቦንቾይ ግዶ” ግያ ማዝሙረ ቢታ ጋፃፐ ስእዳ። ሽን፥ “ታኒ ግልቃስ! ታኒ ላፋስ! ታና አየ! አ እመይስ አድ እሜስ፤ ካደይሳት ጉጅድ አድ እሞሶና” ያጋስ።

17ህንተኖ፥ ሳአን ደእያ አሳዉ፥ ዳጋም አፎይነ ፅሄይ ህንተና ናጌስ።

18ዳጋንያ ግርሳፈ ባቃተይስ ኦላን ኩንዳና፤ ኦላፈ ከየይሳ ፅሄይ ኦይካና፤ ሳሎ ማስኮተት ዶየትዶሶና፤ ቢታ ባሶት ቃፅዶሶና።

19ቢት ዛእስ፤ ቢት ሻከትስ፤ ቢት ቃፅስ።

20ቢት ማ አሳዳ ጋንድጋሬስ፤ ጫርኮይ ሱግያ ጋባዳ ዩዬስ። ጌላታ ባላይ ዳሮ ዴፅዳ ግሾ ዛር ደንዶና መላ ኩንድስስ።

21ሄ ጋላስ ጎዳይ ሳሎ ዎልቃታ ሳሎን፥ ሳኣ ካዎታ ሳአን ፕርዳና።

22ኦላን ደእያ ቃሾ አሳዳ ኤንታ እስፈ ሺሻና፤ ቃሾ ኬን ኤንቲ ጎርደትድ ኡታና። ዳሮ ጋላሳፐ ጉየ ኤንቲ ሴረታና።

23ኡባፈ ዎልቃማ ጎዳይ ፅዮነ ዙማንነ የሩሳላመን ካዎታና፤ የሩሳላመ ጭማታ ስንን ባ ቦንቹዋ ቆንጭሳና። ሄ ዎደ አጌናይ ማና፥ አዋይ ዬላታና።

← Chapter 23 Jump to: Chapter 25 →