Isaiah 28

Amharic Gofa GFBEVF (ጌሻ ማፃፋ)

← Chapter 27 Jump to: Chapter 29 →

1ኤፍሬማን ማተይሳታስ ቆፍሶ ካላቻ ግድዳይሳ፥ አራዳ ዛንጋራ ሁጵያን ኡትዳይሳ፥ እያ ቦንቹዋስ አሌቆ ግድዳ ሹልዳ ጪሻነ ማይያ ኡሻይ ኤንታዉ ናሸተስ ግድዳ ካታማ አየ!

2ሄኮ፥ ጎዳስ ዎልቃማነ ምኖ ግድዳ እሶይ ደኤስ። ጎዳይ እያ ሻቻ ኡሾዳ፥ ይስያ ጎተዳነ ክፅዳ ዎልቃማ ሃዳ ምኖ ኩሽያን ዱገ ሳአን ሆላና።

3ሄ ማትያ ኤፍሬማ አሳ ኦቶሩዋ ካላቻይ ቶሆን የና።

4አራዳ ዛንጋራ ሁጰን ደእያ ሹልዳ ጪሻይ፥ እያ ቦንቾ አሌቆይ ዎደይ ጋካናፐ ስን ቴርዳ ባላሰ አይፈ መላ ግዳና። እስ አስ ሄ ባላስያ በእያ ዎደ ባ ኩሸን ኦይክዳ መላ ም አጌስ።

5ሄ ጋላስ ኡባፈ ዎልቃማ ጎዳይ አትዳ ባ አሳስ ቦንቾ ካላቻነ አሌቆ ግዳና።

6እ ዳይናታስ ሱረ ፕርድያ አያና፥ ካታማ ፐንግያፈ ኦላ ዛረይሳታስ ዎልቃ ግዳና።

7ኤንቲ ዎይነ ኡሻን ቢጮቶሶና፤ ማይያ ኡሻን ጋንድጋሮሶና። ካህነይነ ናበይ ማይያ ኡሻን ቢጮቴስ፤ ኤንቲ ዎይነ ኡሻን ያርኮሶና፤ ማይያ ኡሻን ጋንድጋሮሶና። ቆንጨ በእሸ ባለቶሶና፤ ፕርድሸ በቶሶና።

8ኤንቲ ምያ ጋይታ ኡባይ ጮሻ ፃላላ ግድያ ግሾ፥ ኢትቦና በሲ ባዋ።

9ኤንቲ ሀይሳዳ ጋና፦ “እ ኤራተ ኦና ታማርሳኔ? ኪታ ኦደስ ቆንጭሳኔ? ቡሮ ማ ፓሄቲያ ዎይኮ ን ዱፅዳ ናይታሰዬ?

10እ፥ ኪታ ቦላ ኪታ፥ ኪታ ቦላ ኪታ፤ ዎጋ ቦላ ዎጋ፥ ዎጋ ቦላ ዎጋ፤ ያን ጉ ሀን ጉ” ያጋና።

11ሽን ጎዳይ አላጋ ቃላንነ እማ ዶናን ሀ አሳስ ኦዳና።

12እ ኤንታኮ፥ “ሀይስ ሸምፖ በሲ፤ ዳቡርዳይሳ ሸምፕስተ። ሀይስ ሸምፕ ኤክያ በሲ” ያግስ። ሽን ኤንቲ ስኦና እፅዶሶና።

13ሄሳ ግሾ፥ ኤንቲ ብድ ኩንዳና መላ፥ መአና መላነ ፅሄን ኦይከትድ ባና መላ ጎዳ ቃላይ ኤንታዉ ኪታ ቦላ ኪታ፥ ኪታ ቦላ ኪታ፤ ዎጋ ቦላ ዎጋ፥ ዎጋ ቦላ ዎጋ፤ ያን ጉ ሀን ጉ ግዳና።

14ህንተኖ፥ የሩሳላመን ደእያ አሳ ሃርያ ቀልቅሰይሳቶ ጎዳ ቃላ ስእተ።

15ህንተ፥ “ኑኒ ሀይቆራ ጫቅዳ፤ ስኦለራ ጊግዳ፤ ኑኒ ዎርዶ ኑስ ቆታ ኦዳ ግሾነ ማልተ ካተ ኦዳ ግሾ፥ ጋዶይ ኑና ቦቾና አና” ያግድ ጬቀተታ።

16ሄሳ ግሾ፥ ኡባ ሃርያ ጎዳይ፥ “ሄኮ፥ ታኒ አልኦነ ዶረትዳ ባሶ ሹቻ ፅዮነን ዎስ፤ እያን አማንያ ኦንካ ዬላተና።”

17ታኒ ሱረ ፕርዳ ዋ ዎዶሮ፥ ፅሎተ ቱምበ ኦና። ህንተ፥ “ኑስ ቆታ ግዳ ዎርዶ ሻቻይ ሾጫና፤ ህንተ ኑስ ካተ ግዳ በሳ ድኦይ ይሳና” ያጌስ።

18ህንተ ሀይቆራ ጫቅዳ ጫቆይ ላለታና፤ ስኦለራ ጊግዳ ጊጎይ ምነና። ጋዶይ ያ ዎደ ህንተ እያን ሾጨታና።

19ሄ ጋዶይ ያ ዎደ ህንተና ኤክድ ባና፤ ዎንታ ዎንታ፥ ቃምነ ጋላስ ያራ አና፤ ሄ አያ ዎደ ኡባን ህንተና አገና። ሀ ኪታ አኬኮይ ህንተዉ ዳጋማ ፃላላ እማና።

20ህንተ ቆሰትያ በሲ ህንተዉ ባዋ፤ ህንተ ዝንእያ አርሳይ ህንተዉ ግደና፤ ህንተ ማእያ አፍላይ ህንተና ጋከና።

21ፓራዚማ ዙማ ቦላ ጎዳይ ኦዳይሳዳ ባ ኦሱዋ፥ ባ እማ ኦሱዋ፥ ሄስካ ባ ኦራ ኦሱዋ ኦናዉ ደንዳና። ጋባኦና ዛንጋራን ኦዳይሳዳ ሀንቃና።

22ጎዳይ፥ ኡባፈ ዎልቃማ ፆሳይ፥ ቢታ ኡባ ቦላ ዮ ኤሀናዉ አዋጅዳይሳ ታ ስእዳ ግሾ ህንተ ቃሾይ ምኖና መላ ቀልቅሰይሳ አግተ።

23ህንተ ሀይ ሃ የግድ፥ ታ ኦደይሳ ስእተ፤ ታ ኦዳ አኬክተ።

24ካ ዘራናዉ ጎይያ ጎሻንቾይ ኡባ ዎደ ጎይሸ ደእዬ? ቃስ ኡባ ዎደ ጋጋህያ ዎሸነ ሊቅስሸ ደኢ?

25ጋድያ ሊቅስድ፥ ካሬ ሳዋነ ኦካሸ፥ ባንጋነ ግስተ፥ ባንጋ እያ ዶኡዋን፥ እያ በሳን በሳን ዘሬስ ግደኔ?

26ሀ ሂላ እያ ፆሳይ እያ ኤርሰስነ ታማርሴስ።

27ካሬ ሳዎነ ኦካሸ ሾጩ ዎን ቆፀና፤ ሽን ጉ ፃምአን ሾጨቴስ።

28ካ አይፈይ ቡከቴስፐ አትሽን፥ ሊቀና፤ ቃስ ካ ቡክያ ፓራ ጋረት እያ ቦላራ ላገትኮካ ካይ ጋጨተና።

29ሀ ጭንጫተ ኡባይ ባ ዞርያንነ ባ ጭንጫተን ማላልስያ ኡባፈ ዎልቃማ ጎዳፐ ዬስ።

← Chapter 27 Jump to: Chapter 29 →