Isaiah 30

Amharic Gofa GFBEVF (ጌሻ ማፃፋ)

← Chapter 29 Jump to: Chapter 31 →

1ጎዳይ፥ “ጌላ ናይታ አየ! ታኒ ሀልቻቦና ኦሶና፤ ታ አያናን ግዶናሽን ባንታ ሸነን ጫቅድ ናጋራ ቦላ ናጋራ ጉጀይሳታ አየ!

2ታና ዞረ ኦይቾና ግብፀ ዎኦሶና። ፓሮና ሚፃ ባንታዉ ተቀ፥ ግብፀ ባንታዉ ሸምፕያ ኩያ ኦሶና።

3ሽን ፓሮና ሚፃይ ህንተዉ ዬላ፥ ግብፀ ኩያይ ህንተዉ ካዉሻተ ግዳና።

4ኤንታ ሀላቃት ፃነሳን ደእኮካ፥ ኤንቲ ኪትዳይሳት ሀኔሳ ካታማ ጋክኮካ፥

5ዬላፈ አትሽን፥ ሀራ ማደይነ ጎእ ባይና ግሾ እያን አማነትያ ኡባይ ካዉያናነ ዬላታን” ያጌስ።

6ነገባን ደእያ ዶአታባ ጎዳይ ኦድዳይ ሀይሳ፦ ኪተትዳይሳት መቶይነ ኡንእ ደእያ ቢታራ፥ አደ ጋሞይነ ማጫ ጋሞይ ዎራራ፥ ኢታነ ፆንገትያ ሾሻት ደእያ ባዙዋራ ካንድ ባና። ሀረታነ ግማለታ ዞኮን ባንታ ዱረተ ጫንድ ኤንታ አይኮካ ማዶና ቢታ ባና።

7ግብፀይ አይኮካ ማደና፤ ሄሳ ግሾ፥ ታኒ እያ፥ “ፓና ራኣባ” ያጋዳ ፄጋና።

8ሀእ ባዳ ስንራ ያና ዎድያስ መርና ማላ ግዳና መላ ኤንታ ስንን ሹቻ ዎጫዳ ፃፋ፤ ማዝጋበንካ ፃፋ።

9ኤንቲ ጌላነ ዎርዳንቾ ናይታ፤ ኤንቲ ጎዳይ ኦድያባ ስአናዉ ኮዮና ናይታ።

10ኤንቲ ቆንጨ በኤይሳታ፥ “ቆንጨ በኦፕተ” ያጎሶና። ናበታ፥ “ኡፋይስያባነ ጭምያባ ኦድተፐ አትሽን፥ ሱረባ ኦዶፕተ።

11ኦግያፐ ክችተ፤ ሆሮጋፐ ሃክተ፤ እስራኤለ ጌሻራ ኑና ሶምኦን ጋፍተ” ያጎሶና።

12ሄሳ ግሾ፥ እስራኤለ ጌሻይ ሀይሳዳ ያጌስ፦ “ህንተ ሀ ቃላ እፅድ፥ ገነንነ ጭሞን አማነትዳ ግሾ፥

13ሀ ናጋራይ ህንተዉ ዛእድ ዎድያ፥ አኬኮና ኤለስድ ኩንድያ አዱሳ ግምበ መላ ግዳና።

14እያ መቆይ ኡርቃፈ መዳ ኦቶ መላ ድፕ ግድ መቃና። ሄ መቁዋ ግዶፈ ታማ ካሽያ ዎይኮ ሃ ዱቅያ ኩንእ በንተና” ያጌስ።

15እስራኤለ ጌሻይ፥ ኡባ ሃርያ ጎዳይ፥ ሀይሳዳ ያጌስ። “ስሞንነ ሸምፖን ህንተ አታና፤ ስእ ጉሳንነ አማነተን ህንተዉ ዎልቃ ግዳና፤ ሽን ህንተ እፅደታ።

16ህንተ፥ ‘አካይ፥ ኑኒ ፓራ ቦላ ኡትድ ባቃታና’ ያግደታ፤ ሄሳ ግሾ፥ ህንተ ባቃታና። ቃስ ህንተ፥ ‘ኤሶትያ ፓራ ቶግድ ባና’ ” ያግደታ፤ ሽን ህንተና የደይሳት ህንተፈ አ ኤሶታና።

17እስ ቶራንቹዋ በእድ ህንተፈ ሙኩሉ አሳይ ባቃታና፤ እቻሹ ቶራንቾት ህንተና ኡባ የደና። ዙማ ሁጰን ኤቅዳ ባንድራ ምዳ ዎይኮ ዙማ ቦላ ደእያ ማላዳ ህንተ ሀናና ጋካናዉ ህንተና የደና።

18ሽን ጎዳይ ህንተዉ ኬሀናዉ ናጌስ፤ ጎዳይ ፅሎ ፕርድያ ፆሲ ግድያ ግሾ ህንተዉ ቃታናዉ ደንዳና። እያ አማነትድ ናግያ ኡባይ አንጀትዳይሳታ።

19ህንተኖ፥ የሩሳላመን ደእያ ፅዮነ አሳዉ፥ ህዛፐ ጉየ ዬከከታ። ፆሳይ ቃን ኩምዳ ፆሲ ግድያ ግሾ፥ ህንተ ማደ ኮይድ እያኮ ዋስያ ዎደ ህንተዉ ዛሮ እማና።

20ጎዳይ ህንተዉ መቶ ካነ ኡንአ ሃ እምኮካ፥ ህንተ አስታማረይ ህዛፐ ባና ቆሰና። ሽን ህንተ አይፈይ ህንተ አስታማርያ በአና።

21ህንተ ኡሻች ዎይኮ ሀድርስ ስምያ ዎደ፥ ጉየራ ህንተና፥ “ኦገይ ሀይሳ፤ እያራ ቢተ” ግያ ቃላ ህንተ ስአና።

22ብራንነ ዎርቃን አሌቀትዳ ኤቃ ምስለታ ህንተ ቱንሳና። ቱና ጩርቃዳ ህንተ ኤንታ፥ “ኑፐ ሃክተ” ያግድ ዎራ ሆላና።

23ሄ ዎደ እ፥ ህንተ ቢታን ዘርዳ ካስ እራ ቡክሳና፤ ቢታፈ ዶልያ ካይ ዳሮነ ሙሩታ ግዳና። ሄ ጋላስ ህንተ መሄይ ዳልጋ ደንባን ሄመታና።

24ጎሻ ቦራትነ ሀረት ግላን ፑነትዳ ጌሻ ሀርቁዋ ማና።

25አስ ዉርያ ዎደ ሚፃት ላለትያ ጋላስ ደረታነ ዙማታ ቦላፈ ፑልቶ ሃ ጎጋና።

26ሄ ጋላስ አጌና ፖኦይ አዋ ፖኦዳ ሀናና፤ አዋ ፖኦይ ካሰይሳፈ ላፑን ኩሸ ዳራና፤ ላፑን ጋላስ ፖኡዋ መላ ግዳና። ሄ ኡባይ ሀናናይ ጎዳይ መቅዳ ባ አሳ ኮልያ ዎደነ እ ደችን ማዱንፅዳ አሳ ፓያ ዎደ።

27ሄኮ፥ ጎዳ ሱንይ ሱልያ ሀንቁዋራ፥ ምዳ ጩያ ሻራራ ሃሆ በሳፈ ያና። እያ ዶናን ሀንቆይ ኩምስ፤ እያ እንፃርሳን ምያ ታም ደኤስ።

28እያ ፔኖይ፥ ቆ ጋካናዉ ክፅድ፥ ኡባባ ፕትድ ኤፍያ ሃ ክፃ መላ። እ፥ ካዎተታ ዮ ዛርዛረን ሀርቃና፤ አሳ ጋፓታ ብፃልድ ኦገ ባለና።

29ጌሻ ባለይ ቦንቸትያ ጋላስ የፀይሳዳ፥ ህንተ የፃና። ጎዳ ዙማኮ፥ እስራኤለ ዛላኮ ብያ ዎደ ሱሱልኤ ፑንሸ የፅያ አሳይ ኡፋይተይሳዳ ህንተ ኡፋይታና።

30ጎዳይ ባ ያሽያ ቃላ ስሳና፤ ባ ሱልያ ሀንቁዋን፥ ታማ ላጩዋን፥ ጎትያን፥ ኡሹዋንነ ሻቻን ባ ቀስያ ቆንጭሳና።

31ጎዳይ ባ ግርሳን አሶረ ዳጋንና፤ እያ ፃምአይ ኤንታ ሾጫና።

32ጎዳይ ኤንታ ባ ሴርያ ፃምአን ኤንታ ሾጭያ ዎደ እያ አሳይ ካራቦራነ ዲራ የፃና። ባ ቀስያ ደንድ ኤንታ ሾጫና።

33በንፐ ዶምድ አሶረ ካዎይ ፁሳ ቶፈታ ጌተትያ በሲ ጊግስ። ሄ በሳይ ኦላነ ዳልጋ፤ ቃስ ዳሮ ም ዶረትድ ደእያ በሲ። ጎዳ ፔኖይ ዲነ ሻፋዳ ጎግድ፥ ሄ ታማ ኤና።

← Chapter 29 Jump to: Chapter 31 →