Isaiah 61

Amharic Gofa GFBEVF (ጌሻ ማፃፋ)

← Chapter 60 Jump to: Chapter 62 →

1ኡባ ሃርያ ጎዳ አያናይ ታ ቦላ ደኤስ፤ ማንቆታስ ሎኦባ ኦዳና መላ ጎዳይ ታና ትይስ። ዎዛን መቅዳይሳታ ኮላና መላ፥ ድኤትዳይሳታ ላአ ከሳና መላነ ቃሸትዳይሳታ ብላና መላ ጎዳይ ታና ኪትስ።

2ዶሰትዳ ጎዳ ላይ ኦዳና መላ፥ ኑ ፆሳይ ሀሎ ከያና ጋላሳ አዋጃና መላ፥ አዛነይሳታ ኡባ ምንና መላ ታና ኪትስ።

3ፅዮነን ካዮተይሳታስ፥ ብዶ ግሾ ካላቻ፥ ዬሆ ግሾ ኡፋይሳ ዛይተ፥ አዛኖ ግሾ ጋላታ ማኦ እማና መላ ታና ኪትስ። ኤንቲ ጎዳይ ባ ቦንቹዋስ ቶክዳ ፅሎ ም ጌተትድ ፄገታና።

4ኤንቲ በን ላለትዳ በሳታ ዛሪድ ኬፃና፤ በን ኩንድዳ በሳታ ዛሪድ ኤሳና። ኤንቲ ዳሮ የለተፈ ካሰ ላለትድ ኦንዳ ካታማታ ዛሪድ ኬፃና።

5አላጋ አሳት ህንተ ዶርሳ ዉድያ ሄማና፤ እማት ህንተ ጋድያ ጎያና ኤንቲ ህንተ ዎይነ ጋድያ ናጋና።

6አሳይ ህንተና፥ “ጎዳ ካህነታነ ኑ ፆሳ ኦሳንቾታ” ያግድ ፄጋና። ህንተ ካዎተታ ዱረተ ማና፤ ኤንታ ሻሉዋን ህንተ ናሸታና።

7ታ አሳይ ባንታ ዬላ ግሾ ናምኡ ኩሸ ኤካና፤ ባንታ ካዉሻ ግሾ ላታን ኡፋይታና። ሄሳ ግሾ፥ ህንተ ኤንታ ቢታን ዳኮ ላታና፤ ህንተ ኡፋይሳይ መርና ኡፋይስ ግዳና።

8“ታኒ፥ ጎዳይ ሱረ ፕርዳ ዶሳይስ፤ ቦንቀነ ኢታ ኦሶ እፃይስ። ታኒ ቱማ ኤንታ ኦሱዋ ጋትያ ቃንፃና፤ ታኒ ኤንታራ መርናዉ ጫቃና።

9ኤንታ ኮቻት ካዎተታ ግዶን፥ ኤንታ ናይት ደረታ ግዶን ኤረታና፤ ኤንታ በእዳ ኡባይ ታኒ፥ ጎዳይ፥ ኤንታ አንጅዳ አስ ግደይሳ ኤራና።”

10ታኒ ጎዳን ዳሮ ኡፋይታይስ፤ ታ ሸምፕያ ታ ፆሳን ሀሹ ጋዉሱ። ኤከይስ ባ ሁጰን ካላቻ ዎይሳዳ፥ ገልያራ ባና አሌቅሰይሳዳ፥ እ ታና አቶተ ማኦ ማይዝስ፤ ፅሎተ አፍላ ቦላራ ጉጅስ።

11ቢታፈ ም ማት ዶለይሳዳ፥ ጋደይ ቶክዳባ ድቸይሳዳ፥ ኡባ ሃርያ ጎዳይ ፅሎተነ ጋላታ ካዎተ ኡባ ስንን ፑርጭሳና።

← Chapter 60 Jump to: Chapter 62 →