Isaiah 8

Amharic Gofa GFBEVF (ጌሻ ማፃፋ)

← Chapter 7 Jump to: Chapter 9 →

1ጎዳይ ታኮ፥ “ግታ ሳሌዳ ኤካዳ፥ ‘ድአናዉ ኤለሳ! ቦንቃናዉ ድርጋ!’ ያጋዳ ናባበትያ ፕዳለን ፃፋ።

2ካህንያ ኡራያነ ባራካ ናኣ ዛካርያሳ አማነትያ ማርካ ኦዳ ታኒ ፄጋና” ያግስ።

3ሄሳፈ ጉየ፥ ታኒ ናበ ግድዳ ታ ማቸራ አቃስ፤ እያ ቃንታዳ አደ ናአ የላሱ። ጎዳይ ታኮ፥ “እያ ሱን፥ ‘ማሃር-ሻላል-ሀሽ-ባዝ’ ያጋዳ ፄጋ።

4ናአይ፥ ‘አቦ፥ እሞ’ ግድ ፄስ ኤራናፐ ስን አሶረ ካዎይ፥ ዳማስቆ ዱረተነ ሳማርያ ሻሉዋ ኤክድ ባና” ያግስ።

5ቃስካ ጎዳይ ታኮ ሀይሳዳ ያግስ።

6“ሀ አሳይ ሎዳራ ጎግያ ሳልሆመ ሃ እፅድ፥ ራዝናነ ራማላ ናኣ ኡፋይትድ ኤክዶሶና።

7ሄሳ ግሾ፥ ጎዳይ ምኖነ ዳሮ ግድዳ ኤፍራፂሳ ሃ፥ አሶረ ካዋ፥ እያ ኦላንቾታራ ኤሀና ሀኔስ። እ ሃ ክፅድ ኩመይሳዳ ጋፃ ኡባ ማእድ ጎጋና።

8ድእሸ ይሁዳ ገላና፤ ክፃይ ቆ ጋካናዉ ኩምድ ያራ ካንና።” አቤት አማኑኤላ፥ እያ ቀፍያ ምጨይ ነ ቢታ ኡባ ማእስ።

9ህንተኖ ካዎተቶ፥ እስፈ ኦላስ ሺቅተ፥ ሽን ህንተ ያና። ሃሆ ቢታን ደእያ አሳቶ፥ ስእተ፤ ኦላስ ጊግተ፤ ሽን ህንተ ሊቃና! ኤ፥ ኦላስ ጊግተ፤ ህንተ ዉራና።

10ፆሳይ ኑራ ደእያ ግሾ፥ ኦላስ ማቀትተ፥ ሽን ህንተ ማቆይ ካንና፤ ሀልችተ፥ ሽን ህንተ ሀልቾይ ሀላና።

11“ጎዳይ ባ ምኖ ኩሽያ ታ ቦላ ዎድ፥ ታ ሀ አሳ ኦግያን ቦና መላ ታዉ ምንድ ኦድስ።

12ሀ አሳ ማቆ ኡባ ማቆ ጎፕተ፤ ኤንቲ ያይያባ ያዮፍተ፤ ዳጋሞፕተ።

13ህንተ ጌሽ ጋናዉ በሰይ ኡባፈ ዎልቃማ ጎዳ፤ እያዉ ያያናዉነ ዳጋማናዉ በሴስ።

14እ፥ ጌሻ በሲ ግዳና፤ ሽን ይሁዳስነ እስራኤለስ እ፥ በ ሹችነ ኩንድስያ ዛላ ግዳና። የሩሳላመን ደእያ አሳስ እ ግተነ ፅሄ ግዳና።

15ኤንታፈ ዳሮት በታና፤ ኩንድድ መአና፤ ፅሄን ኦይከትድ ድኤታና” ያግስ።

16ታ ኦደይሳ ናጋ፤ ታ ታማረታ ግዶን ህግያ አታማ።

17ታኒ ባ ሶምኡዋ ያይቆባ ዘረፈ ገንያ ጎዳ ናጋና፤ እያን አማነታና።

18ታናነ ታዉ ጎዳይ እምዳ ናይታ በእተ። ኑኒ ፅዮነ ደርያን ደእያ ኡባፈ ዎልቃማ ጎዳፐ እስራኤለ አሳስ ማላነ ማላታ።

19“ሱይቅሸነ ካልካሽሸ ኦድያ ማሮታነ ሞይትለታ ኦይችተ” ያግድ ህንተና ዞርያ አሳይ ደኦሶና። ደኦን ደኤይሳታስ ሀይቅዳይሳታ ኦይቸይሳፈ አሳይ ባንታ ፆሳ ኦይቻናዉ በሰኔ?

20ህግያነ ጎዳ ማርካ ስእተ! ሄ አሳት ሀ ቃላዳ ሃሳዮና እፅኮ ኤንታዉ ሳእ ዎንተና።

21አሳይ ዋየትሸነ ኮሻትሸ ቢታ ቦላ ቶይላታና። ኤንቲ ኮሻትዳ ዎደ ይሎትድ፥ ፑደ ሳሎ ፄልድ ባንታ ካዋነ ባንታ ፆሳ ባዳና።

22ሳኣ ዱገ ፄልያ ዎደ ዋየ፥ ማነ ያሽያ ጫጋና በአና፤ ኤንቲ ሳካና ማን ሆለታና።

← Chapter 7 Jump to: Chapter 9 →