Isaiah 9

Amharic Gofa GFBEVF (ጌሻ ማፃፋ)

← Chapter 8 Jump to: Chapter 10 →

1ግዶሽን፥ ዋየትዳይሳታስ ህዛፐ ጉየ መና። በን ዎደ ጎዳይ ዛብሎና ቢታነ ንፍታለመ ቢታ ካዉሽስ። ሽን ስንፈ መደትራነ አባ ኦግያን ደእያ ቢታነ ዮርዳኖሰ ሻፋፐ ሄፍንን ደእያ አይሁደ ግዶና አሳይ ደእያ ጋልላ ቢታ እ ቦንቻና።

2ማን ሄመትያ አሳይ ዎልቃማ ፖኦ በእስ፤ ቃስ ሀይቆ ማን ደኤይሳታስ ፖኦይ ፖእስ።

3ኔኒ ካዎተ ዳርሳዳሳ፤ ኤንታ ኡፋይሳ ጉጃዳሳ። አስ ካ ሺሽያ ዎደ ኡፋይተይሳዳ ዎይኮ ድኡዋ ሻክድ ኤክያ ዎደ ኡፋይተይሳዳ ነ ስንን ኡፋይታና።

4ኔኒ ምድያመ ቢታ ፆንዳይሳዳ ኤንታ ዴፆ ቃምባራ፥ ኤንታ ጋናስ ጊግዳ ፃምአነ ኤንታ ኡንኤይሳታ ጉምባ መንዳሳ።

5ኦላንቾታ ጫማይነ ሱን ሙኑቀትዳ ማኦ ኡባይ ታማን ፁገታና፤ ታማስ ኦይሰ ግዳና።

6ኑስ ናእ የለትስ! አደ ናእ ኑስ እመትስ! ካዎተ ማት እያ ሀሽያን ግዳና፤ እያ ሱንይ፥ “ማላልስያ ዞራንቾ፥ ዎልቃማ ፆሳ፥ መርና አዋ፥ ሳሮተ ሀላቃ” ጌተታና።

7እያ ካዎተ ዳልጋተስነ እያ ሳሮተስ ዛው ባዋ። ሀችፈ ዶምድ፥ መርና ጋካናዉ ሱረ ፕርዳንነ ፅሎተን ምንናዉነ ኤሳናዉ ዳዊታ አራታንነ እያ ካዎተን እ ካዎታና። ኡባፈ ዎልቃማ ጎዳ ቃናተይ ሀይሳ ኦና።

8ጎዳይ ያይቆባ ዘረ ቦላ ፕርዳ ቃላ ኪትን፥ እስራኤለ ካዎተ ቦላ ዎስ።

9ኤፍሬማ አሳይነ ሳማረ ካታማ አሳይ ሀይሳ ኦዳይ ጎዳ ግደይሳ ኤርሸ፥ ኦቶሮንነ ጬቆን፥

10“ፁበፐ ኬፀትዳ ኬት ላለትዶሶና፤ ሽን ኑ ዛሪድ ማሰትዳ ሹቻን ኬፃና፤ ቦባ ምት ቃንፀትዶሶና፤ ሽን ኑ ኤንታ በሳን ዝጋታ ላማና” ያግዶሶና።

11ሽን፥ ፆሳይ ራሶና ሞርከታ ምንና፤ ኤንታ ቦላ ኤሀና፤ ኤንታራ ኤቀትያ ሞርከታ ኤንታ ቦላ ደንስ።

12ዶሎሀፐ አራመታ፥ ዉሎሀፐ ፍልስፄመታ ደንን፥ ኤንቲ ባንታ ዶና ዶይድ፥ እስራኤለ ምትዶሶና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

13ግዶሽን፥ አሳይ ባንታና ሾጭዳይሳኮ ስምቦኮና፤ ኡባፈ ዎልቃማ ጎዳ ኮይቦኮና።

14ሄሳ ግሾ፥ እስ ጋላስ ጎዳይ እስራኤለፐ ሁጰነ ጎይና፥ ዛምባ ዳሻነ ማቃ ቃንፃና።

15ጭማትነ ቦንቸትዳይሳት ሁጰ፤ ዎርዶ ታማርስያ ናበት ጎይና።

16ሀ አሳ ካለይሳት ባለሶና፤ ኤንታ ካለይሳትካ ባሎሶና።

17ሄሳ ግሾ፥ ጎዳይ ኤንታ ናአተታን ኡፋይተና፤ ይኦ ናይታስነ አምኤታስ ቃተና። አስ ኡባይ ኢታነ ፆሰ ኤሮናይሳ ግዳና፤ ኡባይ ባ ዶናን ኢታባ ኦደቴስ። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

18ታም ክንቾተነ አጉን መይሳዳ ኢታተ ፁጌስ፤ ስከትዳ ዎር ፁገትን፥ ጩያይ ቱሳዳ ከየይሳዳ ከዬስ።

19ኡባፈ ዎልቃማ ጎዳ ሀንቁዋን ቢታይ ፁገታና፤ አስካ ታማ ኦይሰያባ ግዳና፤ ኦንካ ባ እሻ አሻናዉ ቆፐና።

20ኤንቲ ኡሻቻ ባጋራ ቦንቃና፥ ሽን ኮሻታና፤ ኤንቲ ሀድርሳ ባጋራ ማና፥ ሽን ካሎኮና፤ ኤንቲ ባንታ የልዳ ናይታ ማና።

21ምናሰይ ኤፍሬማ፥ ኤፍሬምካ ምናሰ ማና፤ ኤንቲ እስፈ ግድድ ይሁዳ ቢታ ሞርካና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

← Chapter 8 Jump to: Chapter 10 →