Isaiah 13

Amharic Gofa GFBEVF (ጌሻ ማፃፋ)

← Chapter 12 Jump to: Chapter 14 →

1አሞፀ ናአይ፥ እሳያስ ጎዳይ ባብሎነባ ቆንጭስን በእዳይስ ሀይሳ።

2አይኮይ ባይና ደርያ ቦላ ማላ ኤስድ፥ ህንተ ቃላ ቁ ኦድ ዋስተ፤ ኤንቲ ሀላቃታ ፐንግያራ ገላና መላ ዉትተ።

3ታኒ ሀንቀትዳይሳታ ሴራና መላ ታ ጌሻታ ኪታስ፤ ታ ፆኖይ ኡፋይስያ ታ ዎልቃማታ ፄጋስ።

4ዳሮ አሳይ ዎጫመይሳዳ ደርያ ሁጵያን ደእያ ዎጫማ ስእተ! ቃስ ካዎተት እስፈ ሺቅድ ፓላምያ ፓላማ ስእተ! ኡባፈ ዎልቃማ ጎዳይ ኦላንቾታ ኦላስ ጊግስስ።

5ጎዳይነ እያ ሀንቆ ኦላ ሚሸይ ቢታ ኡባ ይሳናዉ ሃሆ ቢታፈ፥ ሳሎ ጋፃፐ ዮሶና።

6ጎዳ ጋላሳይ ማትዳ ግሾ ዬክተ! ሄ ጋላሳይ ኡባፈ ዎልቃማ ፆሳ ማታፐ ይሳናዉ ያና።

7ሄሳ ግሾ፥ ያሻን ኤንታ ኩሸይ ዶጫና፤ አሳ ኡባ ዎዛናይ ትልአና።

8ኤንቲ ዳጋማና፤ እቀነ ኡንኤተ ኤንታ ኦይካና። የሎ ከይዳ ማጫሳዳ ኤንቲ እንፃፃና። ኤንቲ ዳጋምድ እሶይ እሱዋ ፄላና፤ ኤንታ ሶምኦይ ብዶ ግድስ።

9ሄኮ ቢታ ባይሳ ከሳናዉነ እያን ደእያ ናጋራንቾታ ይሳናዉ ይሎንነ ሱልዳ ሀንቆን ጎዳ ጋላሳይ ያና።

10ሳሎ ፆልንቶትነ ፆልንቶ ኮጨት ባንታ ፖኡዋ ድጋና፤ ዶልያ አዋይ ማና፤ አጌናይካ ባ ፖኡዋ እመና።

11ጎዳይ፥ “ታኒ ሀ ሳኣ እያ ኢታተ ግሾ፥ ኢታታካ ኤንታ ናጋራ ግሾ ሴራና። ታኒ ኦቶራንቾታ ኦቶሩዋ ሻራና፤ ኢታታ ጬቁዋ ካዉሻና።

12አትዳይሳት ዋላህ ባይና ዎርቃፈ አልኦ ግዳና፤ አሳ ናእ ኦፍራ ዎርቃፈ አድ ቦንቾ ግዳና።

13ሄሳ ግሾ፥ ኡባፈ ዎልቃማ ጎዳ ሀንቁዋን፥ እያ ሀንቁዋ ሱላ ጋላስ፥ ታኒ ሳሎታ ኮኮርሳና፤ ሳኣካ እያ በሳፈ ቃና” ያጌስ።

14ሻንካፈ ባቃትያ ጋራዳ ዎይኮ ሄምያ አስ ባይና ዶርሳ ዉደዳ አስ ኡባይ ባ አሳኮ ስማና፤ ኡባይ ባ ቢታ ባቃታና።

15በንትዳ ኦንካ ጫደታና፤ ኦይከትዳ ኦንካ ማሻን ሀይቃና።

16ኤንታ ጉ ናይት ኤንታ ስንን ቡሰታና፤ ኤንታ ኬይ ቦንቀታና፤ ኤንታ ማቸታ ሀራ አስ ኢሳና።

17ብራ ኮዮናነ ዎርቃን ኡፋይቶና ሜዶና አሳ ታኒ ኤንታ ቦላ ደንና።

18ኤንታ ዶንገይ ናአተታ ዎና፤ ዮጋ ናይታካ ማሮኮና፤ ኤንታ አይፈይ ናይታስ ቃተና።

19ካዎተታስ ቦንቾ፥ ባ አሳስ አሌቆ ግድዳ ባብሎነ ቢታ፥ ጎዳይ ሶዶመዳነ ጋሞራዳ ሽር የጋና።

20ሄ ቢታን አስ ኡተና፤ ዎይኮ የለታፐ የለታ ጋካናዉ ያን አስ ዴና። አራበ አሳይ ያን ባንታ ዱንካንያ ቶሎኮና፤ ዶርሰ ሄመይሳትካ ያን ባንታ ዉድያ ሄሞኮና።

21ሽን ባዞ ዶአት ያን አቃና፤ ዎርካናት ኤንታ ኬ ኩማና፤ ጉቶት ያን ዳና፤ ያንቾት ያን ኬፃና፤ ባዞ ዴሻት ያን ጉፓና።

22ኤንታ ኬታን ጎዳረይ ዋሳና፤ ኤንታ ካዎ ጋን ዎርካናት ቦጫና። እያ ዎደይ ማትስ፤ እያ ጋላሳይካ ጋምኤና።

← Chapter 12 Jump to: Chapter 14 →