Job 11

Guarani MBYA (Nhanderuete ayvu iky'a e'ỹ va'e)

← Chapter 10 Jump to: Chapter 12 →

1Ha'e ramo Naamá pygua Zofar ju ombovai:

2— Nanembovaiai 'rã ri ty'y po rami ndeayvu reta rei rã? Ha'evea rami teve reiko ndeayvu kuaa etea py?

3Ndeayvu reta rivea gui teve avakue okyrirĩ 'rã? Ha'e rã ndee rejojai 'rã teve avave rei nemoxĩmbaa ju e'ỹ re?

4Mba'eta aipo're: “Xee ma anhetẽgua meme aikuaa va'e, ha'e nerenonde iky'a e'ỹ va'e aiko”, 're va'ekue.

5Ai! Nhanderuete ijayvu ma va'e rire, nderovai ojuru oipe'a va'e rire,

6omombe'u porãve 'rãgue 'arandua ndoikuaa ukai teri va'e, mba'eta hi'arandua ma anhetẽ va'e meme, joo rami e'ỹ-e'ỹ oikuaa uka teĩ. Ha'e rami teĩ reikuaa pota pova'e re: Amongue henda py Nhanderuete neĩ ndoikuaa potai rejejavya ha'e javi re.

7— Ndee teve reikuaa 'rã Nhanderuete mba'emo oikuaa uka e'ỹ va'e? Reikuaa pota ta teve Ipo'akapa va'e re oĩ va'e ha'e javi re?

8Mba'eta hi'arandua ma yvatea rupi peve oo. Mba'e tu ndee rejapo kuaa ta? Hi'arandua ma yvykua vaikue gui ipy pukuve va'e. Mba'e tu ndee reikuaa ta?

9Ko yvy gui eteve voi ipukuve va'e, ha'e ye'ẽ gui ipyve va'e.

10Xapy'a rei ha'e oaxaa rupi amongue ombo'a vy omboayvu aguã katy ogueraa ta ramo mava'e 'rã tu ojoko?

11Mba'eta ha'e ma oikuaa avakue ovare e'ỹ va'e ha'e javi, oexa pota e'ỹ re oexa ma voi 'rã heko vaia.

12Ha'e gui ava hi'arandu e'ỹ va'e onhemoingo kuaa 'rã teve hi'arandu va'e? Mburika'i yvy'ã rupigua ra'y ava ojeapo kuaa ramo mae ha'e nunga ha'eve.

13— Xapy'a rei nekuraxõ rerova vy Nhanderuete pe ndepo reupi,

14xapy'a rei ndepo py rejapo vaiague mombyry remombo, ha'e ndero gui ha'eve'ỹa ramigua reipe'a vy,

15ha'e rami vy mae nderova reupi 'rã ndeky'a e'ỹ reve, ha'e reĩ atã 'rã mba'eve nemongyjeve e'ỹ re.

16Ha'e rami vy nderexarai 'rã rejexavaiague re, ha'e nungakue re nema'endu'a teĩ yy oxyry ovy va'ekue re rami rive.

17Reikoa ma kuaray mbyte jave hexakãa gui hexakãve 'rã. Pytũ oĩa py teĩ ko'ẽa rami 'rã ndevy.

18Renhenhandu porã 'rã, mba'eta oĩ ju 'rã rearõ reikovy aguã. Ndeyvýry rupi rema'ẽ ma vy reke porã 'rã.

19Renheno rejupy ramo avave rei nanemondyi 'rã. Heta 'rã ou ndevy onhepytyvõ uka vy.

20Ha'e rã heko vai va'e ma ndaexa pyxovei 'rã, ha'e kuery onhemi aguã va'ekue ivaipa 'rã. Ha'e kuery oarõ okuapya ma ojeapo 'rã inhe'ẽ okanhy aguã rami rive — he'i.

← Chapter 10 Jump to: Chapter 12 →