Job 8

Guarani MBYA (Nhanderuete ayvu iky'a e'ỹ va'e)

← Chapter 7 Jump to: Chapter 9 →

1Ha'e ramo Sua pygua Bildade ombovai:

2— Raka'e peve 'rã tu pova'e nunga re ndeayvu? Raka'e peve 'rã tu ndejuru gui ndeayvuẽ yvytu atã va'e rami rive?

3Nhanderuete nda'u ha'eve'ỹa rami 'rã oikuaa pota? Ipo'akapa va'e nda'u gueko porãa rupi e'ỹ 'rã nhanderereko?

4Hovai ndera'y kuery ojejavy rire omombo ma ojejavyague re opaga aguã py.

5Ha'e rami avi xapy'a rei ndee Nhanderuete reka rã, ha'e Ipo'akapa va'e pe nemboaxy aguã re rejerure rã,

6xapy'a rei nandeky'aia ha'e ndereko porãa rupi ri reiko ramo, are'ỹ re ha'e onhemoĩ 'rã nepytyvõ aguã, ha'e vy nemoĩ ju 'rã ndereko porãa ojekuaa porã aguã py.

7Jypy reikoague py ma anhetẽ ne'yvyĩ'i va'ekue, ha'e rã opaa py ma ndeyvate ete 'rã.

8— Ha'e gui aỹ ma xee ajerure ndevy, eporandu na ymagua kuery rekokue re, eikuaa pota neramoĩ kuery ikuaiague re.

9Mba'eta nhande ma kue'ive guare jaiko vy mba'eve ndajaikuaai. Ha'e nhande'ára yvy re jaikoa ma kuaray'ã rami oaxa ovy va'e.

10Neramoĩ kuery nanembo'ei ri ty'y, ha'e kuery nanemongetai ri ty'y? Ha'e vy ha'e kuery ae o'arandua rupi nomombe'ui ri ty'y po rami?

11Mba'eta papiro renhoĩ ma yapo py anho 'rã yvate, junco renhoĩ guive yy py anho 'rã oiko porã.

12Ha'e va'e nunga ipyau teri reve ojayaa e'ỹ re teĩ amboae jai rogue gui ipiru voive 'rã.

13Ha'e rami ae avi ikuai Nhanderuete gui hexarai va'e kuery ha'e javi. Mba'eta heko vai va'e kuery mba'emo oarõ okuapy va'e opa rive 'rã.

14Ha'e kuery oĩ atã merami teĩ opa xapy'a 'rã, ha'e kuery ojeroviaa ma nhandu kya rami rive 'rã ivaipa.

15Ikya re amongue ojeko rã oxopa 'rã. Ha'e va'e re amongue ojopy rã ivaipa rive 'rã.

16Ha'e kuery ma ikuai kuaray py mba'emo rogue oiko porã vy yvotyty ha'e javi rupi hoky pojava va'e rami.

17Hapo ma onhemamamba 'rã ovy ita ijaty oupy va'e áry rupi, henhoĩ vy oike 'rã kora hi'aĩ va'e re voi.

18Ha'e rami teĩ xapy'a rei oĩague gui Nhanderuete omondoro ramo oĩague py ae teĩ hexe na'ima'endu'aavei ma 'rã.

19Ha'e rami rire hekove mba'everã ndovarei! Ha'e gui yvy ku'i py henhoĩague gui amboae ju 'rã henhoĩ.

20— Ha'e rã anhetẽ rupi ipy'a va'e kuery ma Nhanderuete ndoejai 'rã, nomboaxai 'rã guive heko vai va'e kuery po py.

21Ha'e ma ndejuru py omoĩ 'rã nderory nho aguã, nerembe re omoĩ 'rã revy'a aguã.

22Ha'e rã ndejojai reiare kuery ma ojee ae omoĩ 'rã oxĩmba reia. Heko vai va'e kuery ro okanhymba 'rã — he'i.

← Chapter 7 Jump to: Chapter 9 →