Job 41

Guarani MBYA (Nhanderuete ayvu iky'a e'ỹ va'e)

← Chapter 40 Jump to: Chapter 42 →

1— Ndee renoẽ 'rã teve jakare pytã pinda py rive, ha'e'ỹ vy inhapekũ rejokua 'rã ixã py?

2Jai 'ygue remboaxa 'rã teve inhapyĩgua rupi? Ha'e rami e'ỹ vy remombu 'rã teve haĩnhykã jepo'oia py?

3Ndevy pe ha'e ojerure 'rã teve mba'emo re? Ijayvu porã'i 'rã teve ndereve?

4Ndereve ojapo 'rã teve peteĩ rami pendekuai aguã? Ha'eve 'rã teve reraa aguã nerembiguai raka'e rã peve guarã?

5Rembojaru 'rã teve guyra'i rami? Ha'e rami e'ỹ vy remoxã 'rã teve heruvy nderajy kuery rymbarã?

6Neirũ kuery teve jogueroayvu 'rã hepyrã oikuaa aguã? Ha'e rami e'ỹ vy mba'emo vendea kuery teve omboja'o 'rã ho'okue?

7Pira kutua py teve reikutupa 'rã ipire, e'ỹ vy inhakã rupi renhyvõ 'rã pira nhyvõa py?

8Hexe repoko ri vy nema'endu'a riae 'rã nderero'aague re, ha'e rami vy neremoangekovei ma 'rã.

9Ma'ẽ, pembo'a aguã pearõ ri vy pejekore 'rã. Hexe avakue oma'ẽ vy rive 'rã ojeity uka.

10Avakue ipy'a guaxukueve teĩ ndoikoi omyĩ va'erã. Ha'e rami rã xerenonde katuve ma mava'e tu ha'vy onhemboyvate aguã ha'eve va'e?

11Mava'e tu ha'e ranhe xevy ome'ẽ mba'emo, xee ju amboekovia aguã? Mba'eta yva guy re ikuai va'e ma xemba'e meme.

12— Xeayvuve ta jakare reko re, imbaraete etea ha'e iporãa re.

13Mava'e tu oipiro 'rã ikupe rupi, e'ỹ vy oikutu 'rã ipekue jo'a va'e pa'ũ rupi?

14Mava'e tu oipe'a 'rã ijuru? Mba'eta haĩ re onhemboja va'e oendu 'rã ngyje.

15Ipekue hyxy ovya re ma ojejou porã, peteĩ-teĩ joe oja 'rã omboja pyre rami.

16Peteĩ-teĩ joe ovaẽ oiny ipa'ũ rupi neĩ yvytu oike aguã rami e'ỹ.

17Peteĩ-teĩ joe ovy vy oja ratã oiny oja'o aguã rami e'ỹ.

18Ipytuẽ nhavõ ojekuaa 'rã hendy va'e, ha'e rã hexa ma ko'ẽa rami hexakã va'e.

19Ijuru gui ma oẽ 'rã hendy va'e, ixugui tata raviju opo 'rã.

20Inhapyĩgua gui ma oẽ 'rã hataxĩ, oja opupu va'e gui, e'ỹ vy jai rogue okai va'e gui rami.

21Ipytuẽa ma omoendy 'rã tapyĩũ. Ijuru gui ma oẽ 'rã tataendy vuku.

22Ijaju'y re ma imbaraetea oĩ. Ha'e henonde gui opoa 'rã ovy onhemondyipa reia rupi.

23Ho'o regua ma oje'a ratã 'rã. Hexe oĩ atã 'rã, oi rive aguã rami e'ỹ.

24Ipy'a ma ita rami hatã, ita mba'emo mongu'ia regua rami.

25Ha'e opu'ã ramo ipy'a guaxukueve voi onhemondyi 'rã okuapy. Ha'e ou xapy'a ramo ndaekorãvei va'e rami ikuai.

26Xapy'a rei kyxe py omboguaia teĩ mba'eve ndojapoi 'rã, neĩ hu'y guaxu py, hu'y'i e'ỹ vy hu'y ete py teĩ.

27Ferro guigua ha'e oikuaa rã jai rogue pirukue rami rive, ha'e overa va'e guigua ma yvyra ru'ũgue rami oikuaa.

28Hu'y gui ma ha'e nonhai 'rã. Ita momboa py omomboa rã ha'e oikuaa kapi'i rami rive.

29Yvyra aygue py ojapia rã jai 'ygue rami rive 'rã oendu, ojojai 'rã hu'y guaxu revegua.

30Hye guy rupi oĩ ipekue hakua va'e. Yapo áry rupi otyryryague ma mba'emo ra'yĩ ykya rami ipore.

31Yy guy katy oike vy ojapo 'rã oja opupu va'e yjuipaa rami, ye'ẽ eteve voi mba'emo rykue ombojyaty rami ombokururu 'rã.

32Guakykue oeja 'rã hape ovy va'e overa aguã rami. Yy ha'e oĩa ma hi'a xiĩmba va'e rami yjuipa 'rã.

33Yvy re jipoi 'rã ha'e ramigua, mba'eta okyjea oendu va'erã e'ỹ amoingo.

34Yvatekueve ha'e javi re oma'ẽ vy nombovarei 'rã, vixo yvatekueve ikuai va'e ruvixave oiko vy — he'i.

← Chapter 40 Jump to: Chapter 42 →