Job 3

Guarani MBYA (Nhanderuete ayvu iky'a e'ỹ va'e)

← Chapter 2 Jump to: Chapter 4 →

1Ha'e va'e rire Jó ae ijayvu. Ha'e vy ijayvu vai otui'iague ára re.

2Ha'e vy aipoe'i:

3— Xetui'iague ára ndoikoi ma voi va'e rire, ha'e va'e pytũ “Ixy oguereko peteĩ ava'i”, 'ea va'e avi.

4Ha'e va'e ára pytũmba va'e rire, Nhanderuete yvate gui nopenai ramo, yvate oĩa gui omoexakã e'ỹ va'e rire.

5Pytũ reia ha'e kuaray'ã manoa anho oĩ va'e rire, hi'áry rupi araipa va'e rire guive. Ha'e va'e ára omoũmba va'e rire opa marã rei.

6Ha'e va'e pyávy re ma pytũ ete va'e omo'ã va'e rire. Ma'etỹ re ára mboae ikuai va'e rami toguerovy'aave eme. Ha'e va'e jaxy pe “Jaxy ikuai va'e regua” ta'eave eme.

7Ha'e va'e pytũ imemby e'ỹa va'e rire, ha'e va'e py nonhenduai va'e rire ovy'a va'e.

8Ijayvu vai kuaa va'e kuery ma ha'e va'e ára re ijayvu vai ma va'e rire, vixo vaikue ye'ẽ rupigua momyĩ kuaa kuery ae.

9Tá, ha'e va'e pytũ jaxy-tata ko'ẽ mbijarã ndojekuaai va'e rire, ha'e hendy va'e oarõmby ndojekuaai va'e rire. Ko'ẽ rai jave ko'ẽ oexaxe va'e kuery ndoexai ma voi va'e rire.

10Mba'eta ha'e jave py nombotyi raka'e ha'i ryepy rokẽ, xerexa py ajexavaia aexa e'ỹ aguã.

11— Mba'e re tu xee namanoi raka'e xeryru'i pyve? Mba'e re tu ha'e va'e gui aiko'i vy ndaxeayvuẽvei?

12Mba'e re tu oiko raka'e o'u áry xekuavãarã? Mba'e re tu oĩ ikã xemokambuarã?

13Mba'eta ha'e va'e ndoikoi va'e rire aỹ apytu'u porã rei 'rãgue. Ake ramo xevy oĩ 'rãgue apytu'u aguã,

14huvixave ha'e nhomongeta va'ety yvy re ikuai va'ekue onhono porãa aguã ojapo ma voi va'ekue py itui va'e rami,

15ha'e rami e'ỹ vy yvatekueve ouro ha'e prata oguereko va'ekue py ngoo omonyẽ va'ekue itui va'e rami,

16ha'e rami e'ỹ vy hyru'i py oĩ va'e ojuka nhemi va'e rami xee ndaikoi ma voi va'e rire, kyrĩ'i va'e hexakãa peteĩgueve oexa e'ỹ va'e rami.

17Ha'e py ma ha'eve'ỹa rami ikuai va'ekue nanhomoangekovei ma 'rã. Ikane'õ va'ekue guive ikane'õgua nho 'rã ha'e py.

18Ha'e py ma escravo-rã ogueraa pyre ikane'õgua 'rã okuapy, herekoa kuery ayvu nonhenduvei ramo.

19Ha'e py yvyĩgueve ha'e yvatekueve ikuai va'ekue itui pavẽ 'rã, tembiguai ikuai va'ekue voi opatõ pe ve'ỹ ma 'rã ikuai.

20— Mba'erã tu iporiaukue ojapoa ri hendy va'e oexa riae aguã rami? Mba'erã tu ikuerai va'e okuave aguã rami ojapoa?

21Ha'e kuery ma omano aguã anho oarõ okuapy, ha'e rã novaẽi. Ha'e kuery omano aguã oekave 'rã okuapy hepyve va'e onhomi mbyre oekaa rupi yvy ojo'o va'e gui.

22Ha'e kuery ma onhono porãa rã ovy'a 'rã okuapy, oguerovy'a rei 'rã yvykua py ovaẽ vy.

23Mba'erã tu avakue pe oexa ukaa 'rã hexakã va'e haperã oikuaa uka e'ỹ re? Mba'eta Nhanderuete ojoko 'rã joa katy gui e'ỹ-e'ỹ.

24Mba'e re tu xee ha'u va'erã 'rãgue py ajou xepytuẽ atã aguã, ha'e yy onhoẽ va'e rami ajae'o ete aguã?

25Mba'eta akyjea ou ma xe'áry, aexa'ãa oiko ma xere.

26Ndapytu'uvei, naĩ rivevei, neĩ naxekane'õgua kuaavei, xepy'a reta rei aguã anho ou ramo — he'i.

← Chapter 2 Jump to: Chapter 4 →