Job 18

Guarani MBYA (Nhanderuete ayvu iky'a e'ỹ va'e)

← Chapter 17 Jump to: Chapter 19 →

1Ha'e ramo Sua pygua Bildade ju ombovai:

2— Raka'e peve 'rã tu ndeayvu aguã re renhea'ã? Eikuaa pota porã ranhe, ha'e gui ma jajogueroayvu 'rã.

3Mba'e re tu mymba rami ri ndee orekuaa, ha'e hi'arandu e'ỹ va'e roikoa rami reikuaa?

4Ai! Ndee ndepoxya py ae renhemboa'ypa va'e, ndere vy ri nda'u roejapa ta yvy? Ha'e itaova ikuai va'e nda'u ova 'rã oĩague gui?

5— Anhetẽ, heko vai va'e kuery rataendy ogue 'rã, neĩ hata raviju ma voi ndojekuaavei 'rã.

6Ha'e kuery ro rupi hendy va'e oĩ va'ekue pytũmba 'rã, yvate tataendy oupi imoiny va'ekue ogue 'rã.

7Oguata porã oje'oivyague gui ipyxyry 'rã ovy, ha'e gui onhembopy'aague py ae oitya 'rã.

8Mba'eta ha'e kuery py ae ombo'a 'rã, nhuã juru áry rupi ae oo rire.

9Mba'emo mbo'aa ojopy 'rã ipyta rupi, ha'e nhuã ojopy 'rã.

10Ha'e kuery ndoexai 'rã ixã yvy rupi itui va'e, neĩ imbo'aarã tape py oĩ va'e.

11Jova-jovai katy gui imongyjearã ou vy omondyi 'rã, omonha 'rã heravy oikoa nhavõ rupi.

12Ha'e kuery áry ou 'rã imoingo axyarã omomba aguã, ha'e iporiau aguã oarõ 'rã ijyvýry.

13Ha'e nunga ombovaipa 'rã hete regua ha'e javi. Manoa regua jypygua omomba 'rã.

14Heko vai va'e kuery oipe'aa 'rã ngoo py ojerovia oinyague gui, ha'e vy ogueraa 'rã imongyjea tuvixave va'ea py.

15Hoo pygua kuery peteĩve ma noĩvei 'rã hogue py, ha'e oĩague rupi omoaĩa 'rã enxofre.

16Iguy rupi hapo ipirupa 'rã, ha'e rã hakã ma hi'áry rupi 'rã ipirupa.

17Ha'e kuery re na'ima'endu'aavei 'rã yvy re, ha'e tetã mbyte gui nonhenduvei 'rã hery.

18Hendya gui ha'e kuery omomboa 'rã pytũa py, oipe'apaa 'rã yvy gui.

19Ndata'yi neĩ namyminoi 'rã guetarã kuery mbyte, ha'e hoo pygua kuery peteĩve ma ndoikovevei 'rã hogue py.

20Okanhyague ára gui kuaray oikea katygua kuery onhemondyipa 'rã, ko'ẽa katygua kuery voi okyjepa 'rã okuapy.

21Anhetẽ ha'e rami ae heko vai va'e kuery reko, ha'e rami ae opa 'rã Nhanderuete oikuaa e'ỹ va'e kuery — he'i.

← Chapter 17 Jump to: Chapter 19 →