Job 19

Guarani MBYA (Nhanderuete ayvu iky'a e'ỹ va'e)

← Chapter 18 Jump to: Chapter 20 →

1Ha'e ramo Jó ombovai:

2— Raka'e peve 'rã tu pemoingo axy xenhe'ẽ, ha'e ayvu py xemou'ũmba rive?

3Dez-kue ma pendeayvu rei xere, xembojexavai aguã napexĩ vy.

4Xapy'a rei anhetẽ xee ajejavy va'e rire xere anho 'rãgue oĩ ajejavyague re apaga aguã.

5Xapy'a rei xerovai penhemboyvatexe, ha'e xemo'yvyĩ'iague re pendeayvu reixe vy,

6peikuaa porã pota aỹ pova'e re: Nhanderuete ae xemoingo axy va'ekue okya py xejoko vy.

7Ajapukai: “Xemomba ta!” ha'e teĩ noenduai. “Xepytyvõ ke!” ha'e teĩ ndoikoi xemboeko porãarã.

8Xerape ha'e ojoko rã nda'evei aave aguã. Xee aa aguã rupi ha'e omoĩ pytũa.

9Omboetepy aikoague gui xepe'a vy xeakã gui omboi xembojeguaarã oĩ va'ekue.

10Jova-jovaive gui xereity rire aa ma ainy. Xegui oipe'a arõ va'ekue yvyra hi'aĩague gui oapo'o va'e rami.

11Xerovai hendy ipoxya, ngovaigua rami xerereko ramo.

12Ixondaro kuery ou okuapy xere. Xerupity aguã ha'e kuery oguereko katu guaperã, ha'e vy xero yvýry rupi xejoko okuapy.

13Xegui ha'e oipe'a xeryvy kuery mombyry. Xekuaa va'e kuery voi ojepe'apa xegui, xerexa va'ety e'ỹ rami rive.

14Xeretarã kuery xerejapa oje'oivy, ha'e xekuaa va'e kuery hexaraipa ma xegui.

15Xero py amovaẽ va'ekue ha'e xerembiguai kuery ma amboae yvy regua rami xekuaa, ha'e kuery pe rã yvy mboae regua aiko.

16Amongakuaa va'ekue ma aenoĩ teĩ naxembovaivei, mba'emo re xee ae ajerure porã'i teĩ.

17Xera'yxy ma noetũxevei ma xepytuẽa, ha'e xeryvy kuery pe ojeguarupy aiko xereakuã vaikue va'e vy.

18Kyrĩgue voi naxemovaẽxevei, xee apu'ãxe rã xejojai rei okuapy.

19Xerayvu ete va'ekue xembojeguarupa okuapy, ha'e xee ayvu va'ekue voi xerovaigua onhemoingo.

20Xepire ojapa ma xekãgue ha'e xero'o re, ha'e haxy'i py aa jepe nho.

21Xemboaxy ke, xerembiayvu kuery. Xemboaxy, mba'eta Nhanderuete po xerupity.

22Mba'e re tu xemonha rei pekuapy Nhanderuete xemonhaa rami? Mba'e re tu ndapepytu'ui ri xero'o pemombaa gui?

23Xeayvua omboparaa va'e rire! Kuaxia re ipara oiny va'e rire!

24Ferro rakua ha'e chumbo reve ita re ipara va'e rire raka'e rã peve guarã!

25— Mba'eta xee aikuaa xerepyarã oikoa, ha'e opaa py opu'ã 'rã kova'e yvy re.

26Ha'e va'e rire kova'e xepire ivaipa ma teĩ xero'o reve ae 'rã aexa Nhanderuete.

27Aexa 'rã xee ae, xerexa py ae aexa 'rã, amboae nda'ei. Aexaxe ete rã xekuraxõ na'imbaraetevei ma xeryepy py.

28Xapy'a rei aipopeje 'rã: “Marã rami 'rã tu romoingo axy? Ndekáuxa ae upe va'e mba'emo vai oiko”, peje teĩ

29pejererokyje ikyxe gui, mba'eta xere pendeayvua re ou 'rã ipoxya, pendere oikuaa pota va'erã oikoa peikuaa aguã — he'i.

← Chapter 18 Jump to: Chapter 20 →