Job 23

Guarani MBYA (Nhanderuete ayvu iky'a e'ỹ va'e)

← Chapter 22 Jump to: Chapter 24 →

1Ha'e ramo Jó ombovai:

2— Aỹ voi ju xeayvu ta opu'ã rei va'e rami, xepo py xepoaẽa ajoko teĩ.

3Ai! Xee aikuaa va'e rire Nhanderuete ajou aguã! Ha'e rami vy ajexa uka 'rãgue oikuaa pota oinya py.

4Henonde anhemombe'u porã 'rãgue, xejuru amonyẽ 'rãgue aikoa re xeayvu aguã.

5Ha'e rami vy xembovai rã aikuaa 'rãgue, aendu kuaa 'rãgue xevy ijayvu rã.

6Opo'aka etea rupi nda'u ijayvu ete 'rãgue xevy? Any, oikuaa pota porã'i 'rãgue xere.

7Ha'e py ma heko porã va'e ijayvu 'rãgue hexeve, ha'e raka'e rã peve xee aa jepe 'rãgue xemboayvu aguã gui.

8— Ha'e rami teĩ ma'ẽ, xerenonde katy xee aa rã noĩ 'rã ha'e py. Xerakykue katy ajevy teĩ ha'e py voi ndajoui.

9Xeaxua katy mba'emo ojapo teĩ xee ndaexa reguai. Xeaxua katy voi onhemi rã xee ndaexai 'rãe.

10Ha'e rã ha'e ma oikuaapa xee aikoa. Xera'anga va'e rire ouro iky'a e'ỹ va'e rami ajekuaa 'rãgue.

11Mba'eta xepy ma ha'e oikoa rupi anho oiko. Aĩ atã ixuguigua tape rupi aikoa rupi, ndajepe'ai ae.

12Ojuru py ojapo uka va'e gui xee ndajepe'ai, xepy'apy py amoĩ porã ijayvuague.

13Ha'e rã ha'e ma mba'emo ojapo aguã re onhembopy'a ramo mava'e 'rã tu ojoko? Mba'eta ha'e ojapoxe vy ojapo 'rãe.

14Ha'e rami vy ojapopa avi 'rã xerekorã re ijayvuague. Ha'e va'e ramigua ma mbovy rei e'ỹ ojee omoĩ ojapo va'erã.

15Ha'e nunga rupi xepy'a eta rei 'rã henonde. Ha'e nunga re aikuaa pota vy akyje.

16Nhanderuete ojapo xepy'a re xekangya aendu aguã rami, Ipo'akapa va'e ae xembopy'a eta rei.

17Mba'eta pytũ vaikue gui e'ỹ xekangya aendu, pytũ reia xerova ojao'i va'e gui e'ỹ guive.

← Chapter 22 Jump to: Chapter 24 →