Job 12

Guarani MBYA (Nhanderuete ayvu iky'a e'ỹ va'e)

← Chapter 11 Jump to: Chapter 13 →

1Ha'e ramo Jó ombovai:

2— Peẽ kuery anho ma nhi'ã avakue peiko, ha'e pemano ramo ndoikovei 'rã hi'arandu va'e.

3Ha'e rami avi xee voi peẽ rami xe'arandu va'e. Xee ma pendegui xe'yvyĩve va'e'ỹ. Mava'e tu ndoikuaai 'rã ha'e ramigua?

4Ha'e gui xee ma xeirũ kuery xejojai rei va'e aiko, Nhanderuete pe ajapukai rã xembovai teĩ. Mba'eta heko porã ha'e ha'evea rami ikuai va'e ma ojojai rei pyrã meme ae ikuai.

5Iporiau e'ỹ va'e kuery oikuaa rã iporiaukue'i ojou vaipy ikuai. Ha'e rami vy ha'e kuery omoanha-anha 'rã ho'a rai'i va'e oityxe vy.

6Porayvu e'ỹ va'e kuery ikuaia py ovy'apa rei 'rã, Nhanderuete re ijayvu rei va'e kuery ma iporiau e'ỹ va'e meme merami. Ha'e kuery nguueterã rami oguereko opo mbaraetea rive.

7— Ha'e rami teĩ eporandu na aỹ mymba ikuai va'e pe. Ha'e rã ha'e kuery nembo'e 'rã ha'e nunga re. Guyra oveve va'e pe reporandu rã ha'e kuery oikuaa uka 'rã ndevy.

8Ha'e rami e'ỹ vy eporandu na yvy pe, ha'e ramo nembo'e 'rã. Pira ye'ẽ rupigua voi omombe'u porã 'rã ndevy.

9Mava'e nda'u ha'e va'e kuery regua ndoikuaai 'rã Senhor opo py ha'e nunga ojapopaague?

10Mba'eta opo py oguereko guemimoingo kuery ha'e javi, avakue ha'e javive nhe'ẽ guive.

11Xeapyxa py nda'u naendu kuaa potai 'rã ayvu aendu va'e, xejuru py tembi'u heea aendua rami avi?

12Tyrã pa tujakue'i re anho teve oĩ 'arandua? Oikove puku va'ekue re anho teve oĩ mba'emo oikuaa aguã?

13— Any! Nhanderuete re ae oĩ 'arandua ha'e mbaraetea. Hexe ma oĩ nhomongeta ha'e mba'emo oikuaapa aguã.

14Mba'emo ha'e oity va'ekue ma nomopu'ãavei 'rã. Nhuã py ha'e ombo'a va'ekue avave rei ndoipe'a kuaai 'rã.

15Yy ha'e ojoko ramo opa mba'e ipirupa 'rã. Ha'e rã yy ha'e ombou ramo ombovaipa 'rã yvy.

16Hexe anho oĩ mbaraetea ha'e 'arandua. Ombotavy pyre ha'e imbotavya ma ha'e oguereko va'e meme.

17Oipe'a 'rã nhomongeta va'ety kuery nhomongetaague gui, nhomboayvua kuery voi ojapo 'rã na'inhakã porãvei aguã rami.

18Ombovaipa 'rã huvixave kuery po'akaa, ha'e omoxã uka 'rã heravy iku'a rupi.

19Sacerdote kuery ma ha'e oipe'a 'rã sacerdote ikuaiague gui, ha'e iporiau e'ỹ va'ekue ma oitypa vyvoi 'rã.

20Ijayvu kuaa va'e kuery gui ha'e oipe'a 'rã ayvu, ha'e tujakueve gui ma oipe'a 'rã hi'arandua.

21Yvatekueve re omoĩ 'rã nomboeteavei aguã, ha'e ojora 'rã imbaraete va'e kuery ku'akuaa.

22Pytũ reia gui oexa uka 'rã mba'emo ndoikuaai pyre, pytũ ana eteve voi ogueru 'rã omoexakã aguã katy.

23Yvy regua kuery ha'e omboetave 'rã, ha'e gui omokanhymba ju 'rã. Omoaĩmba 'rã, ha'e gui omboatypa ju 'rã.

24Yvy regua yvatekueve gui oipe'a 'rã 'arandua, ojapo 'rã tekoa e'ỹ rupi oguata rei aguã rami, tape rupi e'ỹ.

25Ha'e ramo pytũ reia rupi ha'e kuery opovyvy 'rã oje'oivy hendy va'e ndoguerekoi vy, ojapo 'rã oka'u va'e rami ho'a-o'a oje'oivy aguã rami.

← Chapter 11 Jump to: Chapter 13 →