Job 15

Guarani MBYA (Nhanderuete ayvu iky'a e'ỹ va'e)

← Chapter 14 Jump to: Chapter 16 →

1Ha'e ramo Temã pygua Elifaz ombovai:

2— Hi'arandu va'e nda'u ombovai 'rã yvytu rami rive? Onhemonyẽ 'rã ri ty'y kuaray oua katy gui yvytu ou va'e py?

3Ayvu mba'everã ovare'ỹ va'e py nda'u ijayvu 'rã, ayvu nhomoingo porã va'erã py 'rãgue py?

4Mba'eta ndee ma Nhanderuete renonde ojererokyje va'e pe “Ovare va'e'ỹ” 're, ha'e rejapoxe nomboeteavei aguã rami.

5Mba'eta ndereko vaia rupi ae ndeayvu, ha'e nhombotavy va'e kuery ayvu anho rejou porãve.

6Ndejuru guigua ae 'rã nembopaga, xee e'ỹ. Nerembe ae ijayvu nderovai.

7— Ndee teve ava jypy'i itui va'ekue reiko? Yvyty ikuai e'ỹ mbove ma voi teve reiko raka'e?

8Ndee teve rendu raka'e Nhanderuete opy'a re mba'emo omoĩ rã? Ndere anho'i teve oĩ 'arandua?

9Mba'e nunga tu ndee reikuaa, ore kuery roikuaa avi va'e'ỹ? Mba'e nunga 'arandu tu ndere oĩ, ore kuery re oĩ va'e'ỹ?

10Mba'eta oreregua ikuai avi tujakue'i hi'a xiĩmba va'e, nderu gui voi tujakue'ive va'e.

11Ndee teve nerembovareive ta Nhanderuete nembopy'a guaxu ukaa, ha'e ayvu porã'i rupi ndevy oreayvua?

12Mba'e re tu rejereraa uka nekuraxõ py oĩ va'e rupi rive? Mba'e re tu rema'ẽ vaikue rei ri,

13Nhanderuete rovai ndevaia rupi, ha'e rami ete ndeayvu aguã?

14Marã ramigua tu avakue, iky'a e'ỹ va'e ikuai aguã? Marã ramigua tu kunha gui itui'i va'ekue, heko porã va'e oiko aguã?

15Ma'ẽ, Nhanderuete ma ndojeroviai neĩ ojeupegua iky'a e'ỹ va'e kuery re. Ha'e oexa rã neĩ yva re voi iky'a e'ỹ va'e noĩ.

16Avakue katuve ma ojou vaipy ha'e ojeguarupy meme ikuai, yy oy'u va'e rami mba'emo vai ojee omoĩ va'e!

17— Ejapyxaka ke xeayvua re, ha'e rã rombo'e 'rã. Mba'emo aexa va'ekue amombe'u 'rã ndevy,

18hi'arandu va'e kuery omombe'u va'ekue ae, nguu kuery gui oendu vy ndoikuaa uka e'ỹi va'ekue.

19(Ha'e va'e kuery pe ae yvy ome'ẽa raka'e, peteĩve henda rupi amboae regua kuery nda'ikuai.)

20Ha'e rã heko vai va'e kuery ma ko'ẽ nhavõ 'rã ojexavai, ikuaia ma'etỹ ijapu'a'i 'rã, nhomoingo axya kuery pegua ae.

21Ha'e kuery apyxa py onhendu 'rã imongyjearã. Mba'emo oguerekopa rei teĩ ha'e kuery re ou 'rã imbovaipaarã.

22Ha'e kuery ndogueroviai pytũ vaikuea gui ojevy ju aguã, ha'e rami 'rãgue py oarõ kyxe imombaarã rive.

23Ho'u va'erã oeka oje'oivy vy “Mamo tu oĩ?” he'i 'rã okuapy. Oikuaa porã avi pytũ aguã ára hexe ou ta maa.

24Jexavaia ha'e moingo axya ma omongyjepa rei 'rã. Ha'e kuery re ha'e nunga ipo'aka 'rãe, huvixave joe opu'ã aguã oiko katu porã va'ekue rami,

25Nhanderuete rovai opo oupi rire, Ipo'akapa va'e ombojaru rei vy.

26Ha'e rami vy hexe opu'ã okuapy onhea'ã rei reve, hu'y jokoa inhana va'e re rive ojerovia va'e rami.

27Hova re ikyra anho oĩ, ijyke kyrapa avi

28teĩ tetã ivaipa va'ekue py hekoa, oo oĩ aguã nda'eveia py, ombovaipa pyrã py rive ikuai.

29Ha'e nunga rupi ha'e kuery ndojou retai 'rã mba'emo, mba'emo ojapo va'e noĩ arei 'rã guive, imba'e rei-rei voi ndaetai 'rã yvy re.

30Ha'e kuery ndoo jepei 'rã pytũ vaikue gui. Tata rendy vuku-vuku overepa 'rã hoky. Ha'e gui Nhanderuete ojuru gui oipejua rive 'rã ogueraa.

31Ha'e nunga rupi ovare e'ỹ va'e re ejerovia eme, ndee ae rejekore vy, mba'eta ovare e'ỹ va'e rive 'rã oĩ ndevy guarã.

32Ha'e nunga omomba 'rã hi'ára ovaẽ e'ỹ mbove, ha'e ramo hakã nda'ipyauvei ma 'rã.

33Ha'e kuery ikuai 'rã uva aky'i oitypa pyre rami, ha'e oliveira ipoty ho'apa va'ekue rami rive.

34Mba'eta heko vai va'e kuery heta ikuai teĩ ndata'yi 'rã, ha'e tata oapypa 'rã nhomba'e rei-rei pe'aare kuery ro.

35Ha'e kuery ma mba'emo vai anho oguereko'i rire oikuavã'i 'rã teko vai, nhombotavy aguã rive opy'a re omoĩ rire — he'i.

← Chapter 14 Jump to: Chapter 16 →