Job 21

Guarani MBYA (Nhanderuete ayvu iky'a e'ỹ va'e)

← Chapter 20 Jump to: Chapter 22 →

1Ha'e ramo Jó ombovai:

2— Pendu porã pota ke xeayvua. Ha'e ramia py peẽ xembopy'a porã 'rã.

3Xereroangekove eme, ha'e rã xee ju xeayvu 'rã. Ha'e gui xeayvupa ma ramo mae ha'eve 'rã xejojaive aguã.

4Avakue re rive teve xee xeayvu ndavy'aia rupi? Mba'e re'ỹ teve arõ are aguã nda'evei?

5Pema'ẽ xere, ha'e vy pekyrirĩ 'rã. Ha'e rami vy pejoko 'rã pendejuru pendepo py.

6Mba'eta ha'e nunga re xema'endu'a vy rive ndaxerekorãvei, ha'e xero'o ha'e javi re aendu xepirĩmbaa.

7— Ha'e gui mba'exa tu heko vai va'e kuery okuave are? Mba'eta ha'e kuery tuja'i teĩ ipo'akapave tema 'rã.

8Henonde ma ta'y kuery ikuai porã 'rã. Guamymino kuery voi oexa avi 'rã.

9Ha'e kuery ro rupi oĩ mby'a porã, ha'e Nhanderuete nombopagai 'rã yvyra po'i py.

10Hymba toro ma ta'y'i 'rã ma'etỹ nhavõ, hymba vaka ta'y vy ndoityi 'rã.

11Hoo pygua kyrĩgue'i ma onha-onha 'rã okuapy vexa'i rami, ta'y kue'iry voi opo-opo 'rã ovy'a vy.

12Oporaei 'rã okuapy pandeiro ha'e ixã reta va'e reve, mimby pu guive oendu vy oguerovy'a vaipa 'rã.

13Ára nhavõ ha'e kuery oaxa 'rã oguerekopaa py, mby'a porã reve oguejy peve yvyra rupa py.

14Ha'e kuery ae 'rã aipoe'i Nhanderuete pe: “Ejepe'a ke oregui! Ndoroikuaaxei ndeguigua tape.

15Mba'eta mava'e tu Ipo'akapa va'e, ixupe jaiko aguã? Mba'e tu jajopy 'rã ixupe nhanhembo'eague re?” he'i 'rã okuapy.

16Ha'e rami teĩ ma'ẽ, ha'e kuery oguerekopa aguã ma ipo gui ae e'ỹ ou. Xevy pe nda'evei ae heko vai va'e kuery onhemongetaa rami aiko aguã!

17— Mbovykue tu heko vai va'e kuery rataendy omboguea? Mbovykue tu ha'e kuery áry omboua 'rã imombaarã? Mbovykue tu Nhanderuete opoxya rupi ombou 'rã ha'e kuery ikuai axy aguã?

18Mbovykue tu ha'e kuery omoxẽa 'rã jai pirekue yvytu ogueroveve heravy va'e rami, e'ỹ vy mba'emo pirekue yvytu jere ogueraa va'e rami?

19Ha'e rã peẽ kuery aipopeje: “Nhanderuete ma oarõ 'rã heko vai va'e ra'y kuery ombopaga aguã”, peje 'rã. Ha'e rami teĩ ha'e kuery ae Nhanderuete ombopaga va'e rire, ha'e kuery ae oendu aguã haxya.

20Ha'e kuery ae toexa imombaarã ou rã, ha'e kuery ae toy'u Ipo'akapa va'e poxya gui.

21Mba'eta ha'e kuery omano ma rire, hekove oipe'aa ma ramo, mba'exa tu ha'e kuery oendu 'rã ngoo pyguare kuery reko gui?

22Amongue nda'u omo'arandu kuaa 'rã Nhanderuete? Mba'eta ha'e ma yva re ikuai va'e re voi oikuaa pota va'e.

23Amongue ma imbaraete reve 'rã omano, heko eta rei e'ỹ, mba'eve rei oendu e'ỹ re guive,

24imba'e yryru kamby tynyẽ reve, ha'e ikãgue ratã e'ỹa hexaĩmba rei reve.

25Ha'e rã amboae kuery ma ikuerai rei reve 'rã omano, mba'emo porã ndojoui rire.

26Ha'e rami teĩ mokoĩve regua joapy 'rã ikuai yvy ku'i py, taxo ojao'ipa aguã py.

27— Ma'ẽ, xee aikuaa ae ma pejapoxea, mba'eta ha'eve'ỹa rami penhembopy'a xembojexavaive aguã re.

28Mba'eta aipopeje: “Mamo tu opyta yvateve va'e teko vai rupi oiko va'e rogue?” peje 'rã.

29Ha'e rami teĩ peporandu na oguataa rupi ikuai va'e pe. Napendu potai teve mba'emo ha'e kuery omombe'u rã?

30Mba'eta aipoe'i 'rã: “Jexavaia ára py heko vai va'e kuery omboaxya 'rã, ogueraa jepea 'rã poxya ára gui”, he'i 'rã.

31Mava'e tu omboayvu 'rã ha'e kuery ikuaia re? Mava'e tu ombopaga 'rã ojapo vaiague re?

32Mba'eta opaa py ha'e kuery retekue ogueraa 'rã onhono porãa aguã katy, ha'e onhono porãague re openaa 'rã.

33Ha'e kuery rupa áry yvy itui va'e nda'ipoyi 'rã, ha'e avakue ha'e javi oje'oi 'rã hetekue rakykue, henonde oje'oi va'e voi mbovy rei e'ỹa rami avi.

34Ha'e nunga rupi mba'e re tu xembopy'a porãa rupi merami teĩ pendeayvu rive? Pembovaia ha'e javi re ma apu anho oĩ — he'i.

← Chapter 20 Jump to: Chapter 22 →