Job 35

Guarani MBYA (Nhanderuete ayvu iky'a e'ỹ va'e)

← Chapter 34 Jump to: Chapter 36 →

1Eliú aipoe'ive ju:

2— Ha'evea rami teve aipo're: “Nhanderuete gui xereko porãve”, 're va'ekue?

3Mba'eta aipo're: “Mba'e nunga py tu xereko porãa ovare? Mba'e tu xereko porãa py ajouve 'rã ajejavya py ajou va'e gui?” 're va'ekue.

4Ha'e ramo xee rombovai 'rã, ndee ha'e neirũ kuery guive.

5Ema'ẽ yva re ha'e exa. Exa pota nde'áry rupi arai yva re ikuai va'e re.

6Rejejavya py mba'e nunga py tu hexe rejapo vai? Ndereko vaia hetave ovy rã mba'e tu rejapo hexe?

7Ha'e rami e'ỹ vy ndereko porãa py mba'e tu reme'ẽ ixupe? Mba'e tu ojopy 'rã ndepo gui?

8Ha'e rami 'rãgue py ndereko vaia ma avakue ndee ramigua pe ae 'rã ojapo vai. Ha'e ndereko porãa ma voi ha'e rami ae avi avakue ra'y kuery pe anho 'rã ojapo porã.

9— Ha'e gui avakue omoingo axya vaipa rã haxẽ 'rã, ha'e vy ojapukai 'rã ipo'aka va'e kuery po gui ogueraa jepea aguã.

10Ha'e rami teĩ avave rei aipo nde'i 'rã: “Mamo tu oĩ Nhanderuete xemoingoare, pyávy avy'a reve aporaei aguã ome'ẽ va'e?

11Ha'e ma yvy rupi vixo ikuai va'e gui nhanderekombo'eve va'e, ha'e guyra yvate rupi oveve va'e gui nhanemo'aranduve va'e”, nde'i.

12Ha'e kuery ojapukai teĩ ha'e nombovai, gueko vaia rupi rive onhemboyvate ramo.

13Ojapukai rive ramo Nhanderuete noendui 'rã, ha'e kuery re Ipo'akapa va'e noma'ẽi 'rã.

14Jó, ndee ma Nhanderuete nderexaia rami ndeayvu, ha'e rã henonde ma ndereko ojekuaapa. Ha'e nunga rupi earõ hexe.

15Aỹ peve Nhanderuete opoxya rupi nanhombopagai, neĩ heko vai va'e re ndoikuaa potai teri ramo

16ndejuru reipe'a vy ayvu ovare'ỹ va'e rupi ndeayvu. Ndeayvu reta ma, reikuaa vy e'ỹ.

← Chapter 34 Jump to: Chapter 36 →