Job 29

Guarani MBYA (Nhanderuete ayvu iky'a e'ỹ va'e)

← Chapter 28 Jump to: Chapter 30 →

1Jó ijayvuve tema. Ha'e vy aipoe'i:

2— Ai! Kueve'igua jaxy re aikoague rami ju aiko va'e rire, Nhanderuete xere opena javegua re rami!

3Ha'e jave ma xeakã áry rupi omoexakã va'ekue, ha'e hendy va'e xerereko heravy ramo pytũ rupi ete aguata aikovy va'ekue.

4Ha'e jave ma xerexaĩ aikovy va'ekue, xero áry rupi Nhanderuete xerayvua oexa uka rã.

5Ha'e jave ma Ipo'akapa va'e oiko teri xereve, ha'e xera'y kuery voi xeyvýry teri ikuai.

6Kamby py xepy ajoi ainy va'ekue, ha'e itaova gui yakã'i oxyry va'e rami azeite oxyry oiny jave.

7— Tetã kora rokẽ katy aa, ha'e tetã mbyte py guive aguapy ainy aguã ome'ẽa jave

8kunumigue xerexa vy ojepe'apa, ha'e tujakue'i voi opu'ãmba okuapy va'ekue.

9Yvatekueve voi ijayvu ta vy ojuru ojoko okuapy va'ekue, ojuru re opo omoĩ reve.

10Omboetevepy kuery ayvu nonhenduvei va'ekue, ijurupy py inhapekũ nomyĩvei ramo.

11Xeayvua rendua kuery ma “Ovy'a va'e” he'i okuapy xevy, xerexaa kuery voi xere ima'endu'a porã va'ekue.

12Mba'eta xee ma iporiaukue'i ojapukai rã aepy va'ekue, tyre'ỹ opytyvõarã oguereko e'ỹ va'e kuery guive.

13Omano ta va'e voi xereroayvu porã va'ekue, xee ajapo avi va'ekue imeve'ỹ va'e kuery okuraxõ py ovy'a aguã rami.

14Xejee amoĩ va'ekue teko porã, ha'e va'e anho oĩ va'ekue xeao rami. Manto ha'e akã nhovãa rami oĩ va'ekue ha'evea rami joe apenaa.

15Xee ajeapo va'ekue ára revegua e'ỹ rexarã rami, hi'u rovaikue'i va'e pyrã rami guive.

16Iporiaukue'i pe ma tuu aiko va'ekue, oikuaapy e'ỹ ikuai va'e re guive aikuaa pota va'ekue.

17Ha'e rã porayvu e'ỹ va'e kuery raĩ'y kã ma xee amopẽmba va'ekue, ha'e kuery raĩ gui xee araa jepe va'ekue omokõ ta va'e.

18Xee aipoa'e va'ekue: “Xero py ae 'rã amano, amboetave 'rã xe'ára ita ku'i rami.

19Xee aiko 'rã yy peve yvyra rapo ovy va'e rami, ha'e pyávy hakã re yxapy oĩa va'e rami.

20Xemboeteave tema 'rã, ha'e xepo py xerapa ajopy atã tema 'rã aikovy”, ha'e va'ekue.

21— Xeayvu rã ojapyxaka va'e kuery oarõ okuapy va'ekue amongeta aguã, xeayvua oendua rupi okyrirĩ pavẽ va'ekue.

22Xee xeayvupa ma rã naxembovai kuaai va'ekue. Ha'e kuery áry xeayvua oguejy va'ekue yxapy rami.

23Ha'e kuery xerarõ va'ekue oky re rami, ojuru oipe'a reve oarõ okuapy xeayvu aguã, haku-a ára py oky oarõ va'e rami.

24Ha'e kuery nda'ipy'a guaxui jave ha'e kuery pe xerory va'ekue. Xerova omoexakã rã xererovy'a va'ekue.

25Ha'e kuery raperã xee aiporavo va'ekue huvixa rami aguapy ainy reve, huvixave oxondaro kuery mbyte oĩ va'e rami, ha'e ojae'o va'e kuery mbopy'a porãa rami ajoguereko va'ekue.

← Chapter 28 Jump to: Chapter 30 →