Job 7

Guarani MBYA (Nhanderuete ayvu iky'a e'ỹ va'e)

← Chapter 6 Jump to: Chapter 8 →

1— Yvy re avakue ojexavai aguã rami e'ỹ teve ikuai? Oikovea ára omba'eapo va'e rami e'ỹ teve ojexavai?

2Escravo kuaray'ã oeka teĩ va'e rami, ha'e omba'eapo va'e opagaa aguã oarõ va'e rami,

3xevy pe ha'e rami ae avi ome'ẽa mba'erã e'ỹ aiko aguã jaxy nhavõ re, ha'e pytũ aiko axy aguã ome'ẽa avi.

4Anheno vy aipoa'e: “Mbovy hora nda'u ha'eve 'rã avy ju aguã?” Ha'e rami teĩ pytũ ipuku ramo xerupa rupi ajere-jere tema ajupy ko'ẽ peve.

5Xero'o re oĩ taxo ha'e pekue vaikue. Xepire re ipekue oĩ va'e gui ipeu jepi.

6Xe'ára ma mba'emo mbovyvya gui ipojavave, ha'e vy opa 'rã arõ e'ỹkue re.

7Nema'endu'a ke xerekovea yvytu rami rive oaxapa vyvoia re. Xerexa ndoexavei ma 'rã iporã va'e.

8Aỹ xerexa okuapy va'e ma ndaxerexavei ma 'rã. Ha'e kuery rexa oxareko rei teĩ xee ndajekuaavei ma 'rã.

9Arai ivaipa reve oaxa va'e rami avi onhono porã mbyre noẽvei 'rã.

10Ha'e kuery ndojevyvei 'rã ngoo katy, ikuaiague py ae teĩ ha'e kuery re na'ima'endu'aavei ma 'rã.

11— Ha'e nunga rupi ae xee ndajokoi xejuru. Ha'e rami vy xeayvu 'rã xenhe'ẽ py ajexavaia aendu va'e re, anhemombe'u 'rã xerekove re ajexavaia rupi.

12Xee nda'u ye'ẽ, e'ỹ vy vixo ye'ẽ rupigua teve, ndee xerarõ uka aguã?

13Xee aipoa'e: “Xerupa py aĩa py avy'a 'rã, xerupa py apytu'u 'rã ajexavaia re xeayvua gui”, ha'e.

14Ha'e rami teĩ ndee xemondyi 'rã mba'emo aexa ra'u va'e gui, xemongyje aexa merami va'e gui.

15Ha'e nunga rupi xenhe'ẽ pe ha'eveve 'rãgue xejyryvipya va'e rire. Aiko axy 'rãgue py ha'eveve amano aguã.

16Xevy pe ha'eve ma aikovea. Raka'e rã peve xee ndaikovexei. Xereja ha'vy, mba'eta xe'ára ma yvytu rami rive oaxapa vyvoi.

17Mba'e nunga tu avakue ikuai rejou porã aguã, ha'e kuery re repena aguã?

18Mba'eta ára nhavõ reju reikuaa pota aguã, ha'e hora nhavõ 'rã rexa pota.

19Raka'e peve tu ndereipe'ai 'rã nderexa xegui? Raka'e peve 'rã nda'evei xerendyry amokõ aguã?

20Xapy'a rei ajejavy vy mba'e nunga ha'eve'ỹ va'e tu ajapo ndevy, ndee avakue re reikuaa pota va'e? Mba'e re tu xeapo hu'y rea'anga aguã, xejeupe ae ipoyi va'e apyta aguã rami?

21Mba'e re tu neremboguei xereko vaia, ha'e ndereipe'ai ajejavyague? Mba'eta aỹ ha'a ta ma yvy rupi. Ha'e va'e rire ndee xereka vy ndaxejouvei ma 'rã — he'i.

← Chapter 6 Jump to: Chapter 8 →