bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Gussi
/
Gussi (EBIBILIA ENCHENU) 2020
/
Jeremiah 29
Jeremiah 29
Gussi (EBIBILIA ENCHENU) 2020
← Chapter 28
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 30 →
1
Yeremia omobani agatoma rirube korwa Yerusalemu gochia ase abagaaka b’abanto barenge ase obosomba na ase abakuani, na ababani, na abanto bonsi aba Nebukadinesaro oosete korwa Yerusalemu, akabaira Babeli ase obosomba.
2
Erio nigo riarigetwe nyuma y’omoruoti Yekonia, na ng’ina, na abasomba b’enyomba y’oboruoti abagombaetigwe, na abanene b’oboruoti bw’Abayuda na aba Yerusalemu, na abaroisia b’ebinto, na abaturi b’ebioma, kobarure Yerusalemu.
3
Rirube erio rikaegwa Elasa, mosinto o Safani, na Gemaria, mosinto o Hilikia, abwo Zedekia, omoruoti bw’Abayuda, atomete Babeli ase Nebukadinesaro omoruoti. Aya naro amang’ana arikire ase rirube erio:
4
“Aya naro Omonene bw’Emeganda, Nyasae bw’Abaisraeli, atebire ase abanto bonsi narusetie Yerusalemu nkaira Babeli ase obosomba:
5
Moagache chinyomba agwo, momenyeo. Rema emegondo, mosimeke endagera, morie okwama okwo.
6
Monyuome abakungu babaiborere abana, abamura na abaiseke. Nyuomeria abamura baino abakungu, na abaiseke baino mobasokie, erinde baibore abana, abamura na abaiseke. Momentekane mobuche agwo, gose omobaro oino tobaisa gokea.
7
Morigerie omochie oyio ase nabatomire gochia amaya; sabera omochie oyio ase Omonene, ekiagera obuya bwaye nabwo bore obwaino.
8
Aya naro Omonene bw’Emeganda, Nyasae bw’Abaisraeli, agoteba: Timobaisa kong’ainwa nababani baino, na abaringoria baino, abwo bare ase egati yaino, gose timobaisa korengereria igoro ye chindoto chiaino mokorota.
9
Abwo nigo bakobabanera oborimo ase erieta riane, ekiagera inche timbatometi. Nabo Omonene atebire.
10
“Aya naro Omonene atebire: Ekero emiaka emerongo etano na ebere echikire mokobeera agwo Babeli eraere, erio nimbachere, ning’ikeranie eira yane asemore, mbairanie aase aiga.
11
Naki inche nimanyete emeroberio mbwate asemore, emeroberio y’obuya na omorembe, gose tari ey’amabe, na emeroberio y’okobaa ogosemeria ase amatuko aino agochi‐gocha.
12
Erio namondangerie mochiche asende mosabe, nainche nimbaigwe.
13
Namondigie monyoore, komorandigie ne chinkoro chiaino chionsi.
14
Inche Omonene natebire iga: Namondigie monyoore, nainche nimbairanerie amaya aino. Nimbasangererie korwa ase ebisaku bionsi ne chinsemo chionsi ase nabaseretie gochia, mbarente gocha aase nabarusetie nkabaira ase obosomba.
15
“Aya naro narikire, ekiagera inwe mwatebire ng’a Omonene obaeire ababani agwo ase ense ya Babeli.
16
Aya naro Omonene atebire igoro y’omoruoti oikaransete ase ekerogo ki’obonene gia Daudi, na igoro y’abanto bonsi bamenyete ase omochie oyo, abamino baria batairetwe ase obosomba amo nainwe,
17
ee, aya naro Omonene bw’Emeganda agoteba: Rora, abwo nkobatomera nde esegi, na enchara, na oborwaire bogoita. Nimbakore babe buna amako are amabe mono atanyare koriegwa.
18
Nimbatunyanerie esegi na enchara, na oborwaire bogoita. Nimbakore babe okoirokia ase amaruoti onsi are ase ense na abanto b’ebisaku bionsi ase ndabe nabaseririe gochia. Abanto nigo barabe bakoragereria ase erieta riaino, naende babe bagoichana na gokumia, babachaye.
19
Ayio nigo arakoreke, ekiagera bangete koigwera amang’ana aane goetera ase abasomba baane ababani, abwo nabete ngotoma asebare naende naende. Nabo Omonene atebire.
20
Inwe abanto bonsi narusetie Yerusalemu nkabaira Babeli ase obosomba, tegerera moigwe ring’ana ri’Omonene!
21
“Aya naro Omonene bw’Emeganda, Nyasae bw’Abaisraeli, agoteba igoro y’Ahabu, mosinto o Kolaya, na igoro ya Zedekia, mosinto o Maaseya, abwo bakobabanera oborimo ase erieta riane: Naama! Nimbabeke ase okoboko kwa Nebukadinesaro, omoruoti o Babeli, ere nabaitere agwo ase amasio aino.
22
Ase engencho yabo abanto barusetigwe ase ense y’Abayuda, bakairwa Babeli ase obosomba, ekero barabe bakoragereria na gokwana amang’ana ’okoragererigwa okwo: Tiga Omonene agokore obe buna Zedekia na Ahabu, abwo omoruoti o Babeli agekerete ase omorero.
23
Barabwo bakorire obonyaka ase egati y’Abaisraeli, ekiagera batomanire nabakungu b’abagisangio babo, naende bakwanire amang’ana ’oborimo ase erieta riane, ayio inche ntabachigete. Ninche omonyene imanyete ayio, naende ninche inde kirori. Nabo Omonene atebire.”
24
Amang’ana aya naro oratebie Semaya, omonto o Nehelamu:
25
“Aya naro Omonene bw’Emeganda, Nyasae bw’Abaisraeli, agoteba: Aye gwatomire rirube ase erieta riao gochia ase abanto bonsi bare Yerusalemu, na ase Sefania, mosinto o Maaseya omokuani, na ase abakuani bonsi. Ase rirube erio kwarikire iga:
26
Omonene okobekire aye Sefania obe omokuani ribaga ria Yehoyada. Bono aye obe omoteneneri ase enyomba y’Omonene obe igoro ya kera omonto okobaboka kobana ng’a omobwate na komosoyia ase rikorogoto na komobekera engataare y’ekioma ase rigoti riaye.
27
Bono naki rende otaratogonyera Yeremia oyio okorwa Anatoti ogendererete kobabanera inwe?
28
Yeremia otomire amang’ana gocha aiga Babeli, ogoteba: Namobeere ase obosomba ase engaki entambe; ase ayio agacha chinyomba momenye, moreme emegondo na mosimeke chindagera, morie okwama kwabo.”
29
Sefania omokuani agasoma rirube erio ekero Yeremia omobani ategererete.
30
Erio ring’ana ri’Omonene rigacha ase Yeremia, rikamotebia:
31
“Toma amang’ana gochia ase abanto bonsi bare ase obosomba, obatebie: Aya naro Omonene agoteba igoro ya Semaya Omonehelamu: Ekiagera Semaya obabaneire ntamotometi, ere ogerire inwe kwegena oborimo.
32
Ase ayio, aya naro Omonene atebire: Naama! Ning’ee Semaya Omonehelamu egesusuro, ere amo nororeria rwaye. Omonto takonyorekana ore moyo ase abanto baye, oyio orarore amang’ana amaya aya ndakorere abanto baane, ekiagera ere ogerire abanto basaririe ase Omonene!” Nabo Omonene atebire.
← Chapter 28
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 30 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50
51
52