2 Kings 10

Ilokano (Ti Biblia (1973))

← Chapter 9 Jump to: Chapter 11 →

1Ket ni Acab addaan idi sadi Samaria iti pitopulo nga annac a lallaki. Ket ni Jehu nagaramid cadagiti sursurat, ket imbaonna idiay Samaria, cadagiti agturturay iti Jezreel, cadagiti met laeng lallacay, ken cadagidi nga agaywan cadagiti annac ni Acab, a cunana,

2Ket ita apaman a dumteng daytoy a surat cadacayo, idinto nga adda cadacayo dagiti annac ni apoyo, ken adda cadacayo dagiti luglugan ken cabcabayo, ken maysa nga ili a nasarikedkedan met, ken cabal;

3Cumitacayo iti caimbagan ken catutopan cadagiti annac a lallaki di apoyo, ket isu ti isaadyo iti trono di amada, ket makigubatcayo a maipaay iti balay di apoyo.

4Ngem isuda nagbutengda idi iti napalalo unay, ket kinunada, Adtoy, a dua nga ari saanda idi a nagtacder iti sangona: casanonto ngarud ti panagtacdertayo?

5Ket ti pangolo ti balay, ken ti pangolo ti ili, ken castamet dagiti lallacay ken dagidi nga agaywan cadagiti annac, nagbaonda ken ni Jehu, a cunada, Dacami dagiti ad-adipenmo, ket tungpalenminto amin nga ibilinmo cadacami; dicamto mangaramid iti ari iti uray siasino a lalaki: aramidem daydiay a naimbag cadagiti matam.

6Idi casta nangsurat iti maysa a surat iti maicadua a daras cadacuada, a kinunana, No makicadduacayo caniac, ken no ipangagyonto ti timecco alaenyo dagiti ol-olo dagiti annac a lallaki di apoyo, ket umaycayo caniac no bigat ditoy Jezreel iti daytoy a tiempo. Ket dagiti annac ti ari, idinto a pitopuloda a lallaki, addada idi cadagiti camamainglan a lallaki ti ili, a nangaywan cadacuada.

7Ket naaramid, idi a ti surat dimteng cadacuada, nga innalada dagiti annac ti ari, ket pinapatayda ida, a pitopulo met laeng a lallaki, ket incabilda dagiti ol-oloda cadagiti lablabba, ket imbaonda kencuana idiay Jezreel.

8Ket maysa a naibaon immay, ket imbagana kencuana, a kinunana, Inyegda dagiti ol-olo dagiti annac ti ari. Ket isu kinunana, Icabilyo ida iti nagcadua a catuon iti pagsercan iti ruangan agingga iti bigat.

9Ket naaramid iti bigat, nga isu rimmuar, ket nagtacder, ket kinunana cadagiti isu-amin a tattao, Dacayo nalintegcayo: adtoy, immalsaac a maibusor iti apoc, ket isu ti pinatayco, ngem siasino ti nangcabil amin cadagitoy?

10Ammoenyo ita nga awanto ti maregreg iti daga iti sao ni Jehova, a ni Jehova insaona iti maipapan iti balay ni Acab: ta ni Jehova inaramidna daydi nga insaona a naaramat ni adipenna nga Elias.

11Casta ti panangcabil ni Jehu cadagiti isu-amin a Natda iti balay ni Acab idiay Jezreel, ken isu-amin dagiti natan-oc a lallakina, ken isu-amin a caingotna, ken papadina, ingana iti isu awan a pulos ti intiddana kencuana.

12Ket timmacder sadiay ket pimmanaw, ket napan sadi Samaria. Ket idi nga isu adda iti maysa a balay a pagpucpukisan dagiti agaywan cadagiti carcarnero iti dalan,

13Ni Jehu nasabetna dagiti, cacabsat ni Ocozias nga ari ti Juda, ket kinunana, Siasinocayo? Ket kinunada. Dacami dagiti cacabsat ni Ocozias: ket sumalogcami a cumablaaw cadagiti annac ti ari ken cadagiti annac ti reina.

14Ket isu kinunana, Alaenyo ida a sibibiag. Ket innalada ida a sibibiag, ket pinapatayda ida iti bito ti balay ti pagpucpukisan, uppat a puloda ket dua a lallaki met laeng; isu awan tiniddana iti uray asino cadacuada.

15Ket idi a pimmanaw sadiay, nagsaracda ken ni Jonadab nga anac ni Recab nga umay a sumabet kencuana, ket isu ti kinablaawanna, ket kinunana kencuana, Nalinteg ta pusom, a cas ti pusoc nalinteg ita pusom? Ket ni Jonadab kinunana, Isu ti casta. No nalinteg, yawatmo caniac ta imam. Ket isu inyawatna kencuana di imana; ket isu ti ingatona kencuana idi lugan.

16Ket kinunana, Cumuyogca caniac, ket kitaem ti regtac a maipaay ken ni Jehova. Iti casta isu ti pinaulida idi luganna.

17Ket idi a dimteng idiay Samaria, kinabilna amin dagiti natda ken ni Acab idiay Samaria, agingga iti nadadaelna, a mayalubog iti sao ni Jehova, nga insaona idi ken ni Elias.

18Ket ni Jehu inurnongna amin a tattao, ket kinunana cadacuada, Ni Acab bassit ti pinagservina idi ken ni Baal; ngem ni Jehu agservinto kencuana iti adu.

19Gapuna nga ita ayabanyo nga umayda caniac dagiti isu-amin a mammadles ni Baal, isu-amin nga agcarcararag kencuana, ken isu-amin a papadina; awan coma ti agcurang, ta aramidec ti dackel a panagidaton ken Baal; uray siasinonto nga agcurang, dinto agbiag. Ngem ni Jehu inaramidna a sisisicap, iti panggep a pangpucawna cadagiti agcarcararag ken ni Baal.

20Ket ni Jehu kinunana, Agngilincayo iti maysa a gimong a nadaeg ken ni Baal. Ket isu ti inwarragawagda.

21Ket ni Jehu nagbaon iti amin nga Israel; ket isu-amin dagiti agcarcararag ken ni Baal immayda, iti casta nga awan ti nagcurang nga uray maysa a lalaki a saan nga immay idi. Ket simrecda iti balay ni Baal; ket di balay ni Baal napusec iti igid ken igid.

22Ket isu kinunana idi iti daydi pangolo nga agaywan iti pagidulinan cadagiti cawcawes, Mangalaca cadagiti cawcawes a maipaay cadagiti isu-amin nga agcarcararag ken ni Baal. Ket isu inyeganna ida cadagiti cawcawes.

23Ket ni Jehu simrec, agraman ni Jonadab nga anac ni Recab, iti balay ni Baal; ket isu kinunana cadagiti agcarcararag ken Baal, Agsukimatcayo, ket kitaenyo nga awan coma ditoy cadacayo ti maysa cadagiti ad-adipen ni Jehova, no di laeng dagiti agcarcararag ken ni Baal.

24Ket simrecda a mangidatag cadagiti sacrificio ken datdatonn a mapuuran. Ket ni Jehu dinutucanna idi ruar dagiti walopulo a lallaki, ket kinunana cadacuada, No maysa cadagiti tattao nga inyegco cadacayo macatalaw, daydiay a mamalubos kencuana a pumanaw, ti biagna isunto ti agpaay iti biag daydiay.

25Ket naaramid idi apaman nga isu nagibusna nga indatag di daton a mapuuran, a ni Jehu kinunana idi agbantay ken cadagidi capcapitan, Sumreccayo, ket patayenyo ida; dicayo ipalubos nga adda macatalaw. Ket kinabilda ida iti tadem ti campilan; ket ti agbantay ken dagiti capcapitan impurruacda ida iti ruar, ket napanda iti ili ti balay ni Baal.

26Ket innalada dagiti monmon nga adda idi balay ni Baal, ket pinuuranda ida.

27Ket binongtolda di monmon ni Baal, ket dinupracda di balay ni Baal, ket isu ti inaramidda a pagiblengan, inggana ita nga aldaw.

28Casta ti panangdadael ni Jehu ken ni Baal iti Israel.

29Nupay casta cadagiti basol ni Jeroboam nga anac ni Nabat, a pinamagbasolna iti Israel, ni Jehu saan a simmina iti isusurotna cadacuada, nga ammoen, dagiti sinan-urbon a vaca, a balitoc nga adda idi idiay Bet-el, ken adda idi idiay Dan.

30Ket ni Jehova kinunana ken ni Jehu, Agsipud ta nagaramidca iti naimbag iti panangaramidmo iti daydi a nalinteg cadagiti matac, ket inaramidmo ti balay ni Acab a mayannurot iti isu-amin nga adda iti pusoc, dagiti annacmo agingga iti maicapat a caputotan agsaaddanto iti trono ti Israel.

31Ngem ni Jehu saan a nagannad iti pannagnana iti linteg ni Jehova, a Dios ti Israel, iti amin a pusona: saan a simmina cadagiti basbasol ni Jeroboam, a pinamagbasolna iti Israel.

32Cadagidi nga aldaw ni Jehova rinugianna ti nangkeltay iti Israel: ket ni Hazael kinabilna ida cadagiti isu-amin a bedbeddeng ti Israel;

33Manipud iti Jordan iti deppaar ti daya, isu-amin a daga ti Galaad, dagiti Gaditas, ken Rubenitas, ken Manasesitas, manipud Aroer, nga adda iti denna ti lobong ti Arnon, iti Galaad met laeng ken iti Basan.

34Ti matda cadagiti ar-aramid ni Jehu, ken isu-amin nga inaramidna, ken isu-amin di kinamaingelna, saanda aya a naisurat iti libro dagiti cronicas dagiti ar-ari ti Israel?

35Ket ni Jehu nakiturog cadagiti ammana; ket isu intabonda idiay Samaria. Ket ni Joacaz nga anacna nagari iti saadna.

36Ket iti cabayag ti panagari ni Jehu iti Israel idiay Samaria duapulo ket walo a tawen.

← Chapter 9 Jump to: Chapter 11 →