2 Kings 12

Ilokano (Ti Biblia (1973))

← Chapter 11 Jump to: Chapter 13 →

1Idi maicapito a tawen ni Jehu ni Joas nangrugi a nagari: ket nagari bayat iti uppat a pulo a tawen idiay Jerusalem. Ket ti nagan ni inana Sibia taga Beerseba.

2Ket ni Joas inaramidna daydi a nalinteg cadagiti mata ni Jehova iti isu-amin nga aldaw a pananggidalan ni padi Joiada kencuana.

3Nupay casta dagidi nangato a disdisso saanda a naiccat; ti umili nagtuloy a nagidaton ken nagpupuur iti incienso cadagidi nangato a disdisso.

4Ket ni Joas kinunana cadagiti papadi, Isu-amin a cuarta dagiti naipaay a banbanag a nayeg iti balay ni Jehova, iti cuarta nga agpagna, ti cuarta dagiti tattao a tunggal lalaki nacagatadanna, ken isu-amin a cuarta a yeg ti uray asino a tao iti sibubulos a pusona iti balay ni Jehova,

5Alaen coma ida dagiti papadi cadacuada, tunggal lalaki iti am-ammona; ket isuda tarimaanenda coma dagiti gutgutbaw ti balay, iti uray sadinoman a pacasaracanto iti gutbaw.

6Ngem casta idi, nga idi tawen a maicaduapulo ket tallo ni ari Joas dagiti papadi dida pay laeng natarimaan dagiti gutgutbaw ti balay.

7Idin ni ari Joas inayabanna ni padi Joiada, ken dagiti sabali a papadi, a kinunana cadacuada, Apayapay a dicayo tinarimaan dagiti gutgutbaw ti balay? ita ngarud dicayo manggalan iti cuarta iti am-ammoyo, no di ket itedyo ida a maipaay cadagiti gutgutbaw ti balay.

8Ket dagiti papadi inanamunganda a dida mangalan iti cuarta iti umili, dida tarimaanen dagiti gutgutbaw ti balay.

9Ngem ni padi Joiada nangala iti maysa a lacasa, ket linussocanna di calubna, ket incabilna iti abay ti altar, iti sikig a canawan no cas asinoman sumrec iti balay ni Jehova: ket dagiti papadi nga agaywan iti dapian icabilda sadiay ti isu-amin a cuarta a maiserrec idi balay ni Jehova.

10Ket casta idi, idi a nakitada nga adu ti cuarta idi lacasa, a ti escriba ti ari ken di nangato a padi sumang-atda, ket icabilda cadagiti supsupot ket bilangenda di cuarta a masaracanda iti balay ni Jehova.

11Ket inyawatda di cuarta a nagantingda cadagiti im-ima dagidi nga agaramid iti trabajo, dagidiay agaywan iti balay ni Jehova: ket isu ti pinagtangdanna cadagiti allawagi ken agbangbangon, a nagtrabajo iti balay ni Jehova.

12Ken cadagiti agcavcaviti, ken agtagtaga iti bato, ken maipaay a paggatang iti cayo ken bato a tinagaan tapno pangtarimaan cadagiti gutgutbaw ti balay ni Jehova, ken iti isu-amin a nagasto iti balay a pangtarimaan kencuana.

13Ngem awan idi ti naaramid a maipaay iti balay ni Jehova a tagtagayan a pirac, pangar-arsang, bacbacca, tangtangguyob, uray aniaman nga al-alicamen a balitoc, wenno al-alicamen a pirac, iti cuarta a nayeg idi iti balay ni Jehova;

14Ta isu ti intedda cadagidi nagaramid iti trabajo, ket isu ti pinangtarimaanda iti balay ni Jehova.

15Casta met a dida nakibinnilang cadagidi lallaki, a nan-gipaimaanda idi cuarta tapno isu ti itedda cadagiti nagtrabajo, ta nagaramidda a matalec.

16Ti cuarta a maipaay cadagiti datdaton ti salungasing, ken ti cuarta a maipaay cadagiti datdaton ti basol, saan idi a maiserrec iti balay ni Jehova: cucua idi dagiti papadi.

17Idin ni Hazeel nga ari ti Siria simmang-at, ket nakibacal a maibusor iti Get, ket isu ti innalana; ket ni Hazeel insangona di rupana tapno sumang-at idiay Jerusalem.

18Ket ni Joas nga ari ti Juda innalana amin a banbanag a nasantoan nga indaton da Josafat, Joram, ken Ocozias, nga ammana, nga ar-ari ti Juda, ken isu-amin a banbanag a nasantoan nga impaayna idi, ken isu-amin a balitoc a nasaracan cadagiti gamgameng ti balay ni Jehova, ken iti balay ti ari, ket pinaipanna ida ken ni Hazeel nga ari ti Siria: ket isu pimmanaw idiay Jerusalem.

19Ti matda cadagiti ar-aramid ni Joas, ken isu-amin nga inaramidna, saanda aya a naisurat iti libro dagiti cronicas dagiti ar-ari ti Juda?

20Ket dagiti ad-adipenna timmacderda, ket nangaramidda iti maysa a panangliput, ket kinabilda ni Joas idiay balay sadi Millo, iti dalan a sumaloganna nga agpa-Silla.

21Ta ni Josacar nga anac a lalaki ni Semaat, ken ni Jozabad nga anac a lalaki ni Somer, nga ad-adipenna, isu kinabilda ket natay; ket isu ti intabonda a naidinna cadagiti ammana idiay ili ni David: ket ni Amasias nga anacna nagari iti saadna.

← Chapter 11 Jump to: Chapter 13 →