2 Kings 19

Ilokano (Ti Biblia (1973))

← Chapter 18 Jump to: Chapter 20 →

1Ket naaramid idi a ni ari Ezekias isu ti nangegna, a pinigisna dagiti cawesna, ket nagabong iti nakersang a lupot, ket simrec iti balay ni Jehova.

2Ket imbaonna ken ni Isaias a mammadto nga anac ni Amos da Eliacim nga mayordomo idi, ken ni Sebna nga escriba ken dagiti lallacay dagiti papadi, a siaabbongda iti nakersang a lupot.

3Ket kinunada kencuana, Castoy ti cuna ni Ezekias, Daytoy nga aldaw isu ti aldaw ti riribuc, ken ti babalaw, ken ti umsi; ta dagiti annac dumtengdan iti pannacayanac, ket awan ti pigsa nga agipasngay.

4Nalabit a ni Jehova a Diosmo denggennanto amin dagiti sasao ni Rabsaces, isu a ti ari ti Asiria nga apona imbaonna a mangcarit iti Dios a sibibiag, ket tubngarennanto dagiti sasao a nangeg ni Jehova a Diosmo: gapuna nga ipangatom coma ti cararagmo a maipaay iti tidda a mabati.

5Iti casta dagiti ad-adipen ni ari Ezekias immayda ken ni Isaias.

6Ket ni Isaias kinunana cadacuada, Castoyto ti cunaenyo ken ni apoyo, castoy ti cuna ni Jehova, Dica agbuteng cadagiti sasao a nangegmo, dagidiay a dagiti ad-adipen ti ari ti Asiria pinangtabbaawda caniac.

7Adtoy, icabilconto kencuana ti maysa nga espiritu, ket macangegto cadagiti damdamag, ket sumublinto iti dagana met laeng; ket pagpasagecto iti campilan idiay dagana met laeng.

8Iti casta ni Rabsaces nagsubli, ket nasaracanna ti ari ti Asiria a manggubgubat iti Lebna; ta nangngegna idin a naipanaw idiay Lakis.

9Ket idi a nangngegna a masasao iti maipapan ken ni Tiraca nga ari ti Etiopia, Adtoy, nga isu rimmuar a makibacal a maibusor kenca, isu nangibaon manen cadagiti babaonen ken ni Ezekias, a kinunana,

10Castoyto ti saoenyo ken ni Ezekias nga ari ti Juda, a cunayo, Dinaca coma allilawen ti Diosmo isu a pagtalcam, nga agcuna, Ti Jerusalem dinto naited iti ima ti ari ti Asiria.

11Adtoy, nangngegmo no ania ti inaramid dagiti ar-ari ti Asiria cadagiti isu-amin a dagdaga, iti panang dadaelda cadacuada a tinalipupus: ket sica maispalcanto?

12Dagiti didios dagiti nasnacion inispalda aya ida, dagidiay a dagidi ammac dinadaelda idi, ti Gozan, ken ti Haran, ken ti Resef, ken dagiti annac ti Eden, a nagyanda idi idiay Talassar?

13Sadino ti yan ti ari ti Hamat, ken ti ari ti Arfad, ken ti ari ti ili ti Sefarvaim, ti Hena, ken ti Hiva?

14Ket ni Ezekias inawatna di surat iti ima dagiti nabaon, ket isu ti binasana; ket ni Ezekias immuli idi balay ni Jehova, ket isu ti inyucradna iti sango ni Jehova.

15Ket ni Ezekias nagcararag iti sango ni Jehova, ket kinunana, O Jehova, a Dios ti Israel, nga agsaadca iti ngato dagiti querquerubin, sica ti Dios, sicsica laeng a maymaysa, cadagiti isu-amin a pagpagarian iti lubong; sica inaramidmo ti langit ken ti daga.

16Idumogmo, O Jehova, ta lapayagmo, ket denggem; luctam, O Jehova, dagita matam, ket kitaem; ket denggem dagiti sasao ni Sennakerib nga imbaonna a pangcarit iti Dios a sibibiag.

17Kinapudnona, Jehova, a dagiti ar-ari ti Asiria pinaglangalangda dagiti nasnacionda ken dagiti dagdagada,

18Ken impurruacda iti apuy dagiti didiosda: ta isuda saanda a dios, no di ket aramid dagiti im-ima dagiti tattao, a cayo ken bato, gapuna a dinadaelda ida.

19Ita ngarud, O Jehova a Diosmi, ispalennacami, gumawwawaac kenca, a mailapsutcami iti imana, tapno dagiti isu-amin a pagpagarian iti lubong ammoenda coma a sica Jehova ti maymaysa laeng a Dios.

20Idin ni Isaias nga anac ni Amos nagbaon ken ni Ezekias, a kinunana, Castoy ti cuna ni Jehova a Dios ti Israel, Iti daydiay nga indawatmo caniac a maibusor ken ni Sennakerib nga ari ti Asiria, impangagca, kenca.

21Daytoy ti sao a ni Jehova insaona a maipapan kencuana, Ti virgen nga anac a babai ti Sion linaisnaca ken kinatawaannaca a rinabngis; ti babai nga anac ti Jerusalem inngilangilna ti olona kenca.

22Siasino ti kinaritmo ken tinabbaawam? ket maibusor iti siasino ti nangyetbagam ti timecmo, ken nangitangadam sadi ngato cadagita matam? maibusor iti Santo ti Israel met laeng.

23Iti pannacaaramat dagiti imbaonmo kinaritmo ti Apo, ket kinunam, Iti kinaadu dagiti lugluganco simmang-atac iti ngato dagiti banbantay, cadagiti caunegan ti Libano; ket pucanecto dagiti natayag a cantingenna, ken dagiti casayaatan a parwana, ket sumrecacto iti caadaywan a pagdagusanna, iti bakir ti nabunga nga awayna.

24Nagcaliac ken imminumac cadagiti sabsabali a dandanum, ket iti dapan dagiti sacac pagmagaecto dagiti isu-amin a carcarayan ti Egipto.

25Dica nangngeg aya no casano ti inaramidco idi nabayagen, ken binalabalac cadagiti ugma? ita tinungpalco, tapno cucuam coma a pangrebba cadagiti il-ili a nasarikedkedan iti ginabgabsuon dagiti narnarba.

26Gapuna dagiti nagnaed cadacuada bassit ti mabaelda, nagcullayawda ken nariribucda; casda la idi iti root idiay away, ken casda la idi iti nateng a nalangto, casda la iti root cadagiti toctoc ti balay, ken casda la iti bukel nga agkesset iti sacbay ti panagtubona.

27Ngem ammoc ti panagtugawmo, ti panagruarmo, ken ti panagserrecmo, ken ti panagpungtotmo a maibusor caniac.

28Gapu iti panagpungtotmo a maibusor caniac, ken agsipud ta ti kinacuspagmo dimmanun cadagiti lapayagco, gapuna nga icabilconto ti lawinco ita agongmo, ken ti frenoc cadagiti bibigmo, ket pagsubliencanto iti dalan nga immayam.

29Ket daytoyto ti pagilasinan kenca: itoy a tawen mangancayto iti daydiay a tumubo latta, ket iti maicadua tawen iti daydiay nga aggapunto kencuana met laeng; ket iti maicatlo a tawen agmulacayo, ket aganicayo, ket agmulacayo cadagiti cauvuvasan, ket mangancayo iti bungana.

30Ket ti matda a mailiclic iti balay ni Juda agramutto manen iti agpababa, ket agbunganto iti agpangato.

31Ta rumuarto ti maysa a tidda iti Jerusalem, ken aggapu iti bantay Sion dagiti aglemmengto: ti regta ni Jehova aramidennanto daytoy.

32Gapuna a ni Jehova cunana ti castoy a maipapan iti ari ti Asiria, Isu dinto umay itoy nga ili, dinto met mangibeccas iti maysa a pana sadiay, dinto met umay iti sangona a sicacalasag, dinto met maicabil a maibusor kencuana ti maysa a turod.

33Iti dalan nga immayanna, isunto met laeng ti sumublianna, ket dinto umay iti daytoy nga ili, cuna ni Jehova.

34Ta siac ispalecto daytoy nga ili tapno isu isalacanco, a gapu caniac met laeng, ken gapu ken ni David nga adipenco.

35Ket naaramid iti daydi a rabii, a di angel ni Jehova rimmuar, ket nangcabil iti pacarso dagiti Asirios iti sangagasut walo pulo ket lima a ribu a tattao: ket idi a bimmangon dagiti tattao a nasapa iti bigat, adtoy, dagitoy bangbangcayda amin.

36Iti casta ni Sennakerib nga ari ti Asiria pimmanaw, ket napan ket nagsubli, ket nagyan idiay Ninive.

37Ket naaramid, idi nga isu agcarcararag idi balay ni Nisroch a diosna, a da Adramelech ken Saresear isu kinabilda iti campilan: ket nagtalawda agingga iti daga ti Ararat. Ket ni Esarhadon nga anacna nagari iti saadna.

← Chapter 18 Jump to: Chapter 20 →