2 Kings 23

Ilokano (Ti Biblia (1973))

← Chapter 22 Jump to: Chapter 24 →

1Ket di ari nagbaon, ket inurnongda kencuana dagiti isu-amin a lallacay ti Juda, ken ti Jerusalem.

2Ket di ari immuli iti balay ni Jehova, ken isu-amin dagiti lallaki ti Juda, ken isu-amin nga agnaed iti Jerusalem a caduana, ken dagiti papadi, ken dagiti mammadto, ken isu-amin nga umili, bassit ken dackel agpadpada: ket imbasana cadagiti pagdengngegda dagiti isu-amin a sasao ti libro ti tulag a nasaracan iti balay ni Jehova.

3Ket ti ari agtatacder iti denna ti monmon, ket nagaramid ti tulag iti sango ni Jehova, iti pannagnana a siaannurot ken ni Jehova, ken ti panangsalimetmetna cadagiti bilbilinna, ken cadagiti panpanecnecna, ken cadagiti ipaannurotna, iti isu-amin a pusona, ken iti isu-amin a cararuana, tapno panecnecanna dagiti sasao ti tulag nga adda a naisurat iti daytoy a libro: ket isu-amin nga umili pinasingkedanda di tulag.

4Ket ti ari binilinna ni Helcias a nangato a padi, ken dagiti papadi iti maicadua a kita, ken dagiti agaywan ti dapian, nga ipanawda iti templo ni Jehova dagiti isu-amin nga al-alicamen, a naaramid idi nga agpaay ken ni Baal, ken agpaay iti Asherah, ken agpaay iti isu-amin a buyot ti langit, ket pinuuranna ida iti ruar ti Jerusalem cadagiti awaway ti Cedron, ket impanna dagiti dapdapuda idiay Bet-el.

5Ket iniccatna dagiti papadi a nagservi idi cadagiti ladladawan, isuda a binilin idi dagiti ar-ari ti Juda nga agpuurda iti incienso cadagiti nangato a disdisso cadagidiay il-ili ti Juda, ken cadagidiay disdisso nga aglicmut iti Jerusalem; casta met cadagidiay nga agpupuur idi iti incienso ken ni Baal, ken iti init, ken iti bulan ken cadagiti planetas, ken iti isu-amin a buyot ti langit.

6Ket impanawna di Asherah nanipud idi balay ni Jehova, iti ruar ti Jerusalem agingga iti waig a Cedron, ket isu pinuuranna idiay waig a Cedron, ket pinatapocna, ket impurruacna di tapocna iti rabaw dagiti tantanem ti sapasap a tattao.

7Ket dinupracna dagiti balbalay dagiti sodomitas, nga addada idi balay ni Jehova, a pagabablan dagiti babbai cadagiti abbong nga agpaay iti Asherah.

8Ket inyegna amin dagiti papadi nanipud cadagiti il-ili ti Juda, ket dinadaelna dagiti nangato a disdisso a dagiti papadi pagpupuuranda idi iti incienso, manipud Gabaa inggana iti Beer-seba; ket rinugpona dagiti nangato a disdisso dagiti ruruangan nga addada idi iti pagsercan ti ruangan ni Josue a gobernador ti ili, nga adda idi iti macatigid no ti maysa a tao sumbrec idiay ruangan ti ili.

9Nupay casta dagiti papadi cadagiti nangato a disdisso dida umuli iti altar ni Jehova idiay Jerusalem, ngem nanganda iti tinapay nga awan levadurana iti tengnga dagiti cacabsatda.

10Casta met a rinabngisna ti Tofet, nga adda iti lobong dagiti annac ni Ennom; tapno awan ti tao a mangpalasat iti anacna a lalaki ken babai iti apuy ken ni Moloc.

11Ket iniccatna dagiti cabcabayo a dagiti ar-ari ti Juda intedda idi iti init, iti pagsercan ti balay ni Jehova, iti sibay ti siled ni Natan-melec nga agaywan iti siled, nga adda idi cadagiti ar-arubayan: ket pinasgedanna iti apuy dagiti luglugan ti init.

12Ket dagiti al-altar nga adda idi iti rabaw ti pangatepan ti nangatngato a siled ni Acaz, a dagidi ar-ari ti Juda inaramidda idi, ken dagiti al-altar nga inaramid idi ni Manases iti dua a paraangan ti balay ni Jehova, ti ari rinugpona ket tinumecna ida sadiay, ket impurruacna di tapocda idiay waig a Cedron.

13Ket dagiti nangato a disdisso nga addada idi iti sango ti Jerusalem, nga addada iti macanawan ti bantay ti panagrupsa, a binangon idi ni Salomon nga ari ti Israel a maipaay idi ken ni Astarot a kinarimon dagiti Sidonio, ken ni Cemos a kinarimon ti Moab, ken ni Milcom a kinarimon dagiti annac ni Ammon ti ari rinabngisna.

14Ket binuracna dagiti monmon, ket pinucanna dagidi Asherah, ket pinunnona daydi dissoda cadagiti tultulang dagiti tattao.

15Casta met di altar nga adda idi idiay Bet-el, ken di nangato a disso a ni Jeroboam nga anac ni Nabat inaramidna idi, a pinamagbasolna iti Israel, daydi nga altar met laeng ken di nangato a disso dinupracna; ket pinuuranna di nangato a disso ket pinatapocna, ket pinuuranna di Asherah.

16Ket idi a ni Josias timmaliaw, nakitana dagiti tantanem nga adda idi sadiay iti bantay; ket nagbaon, ket innalana dagiti tultulang cadagiti tantanem, ket pinuuranna ida iti rabaw ti altar, ket isu rinugitanna, a mayalubog iti sao ni Jehova isu nga inwarragawag di lalaki ti Dios isu a nangiwarragawag cadagitoy a banbanag.

17Idin kinunana, Ania a monumento dayta a makitac? ket dagiti tattao ti ili kinunada kencuana, Daytoy isu ti tanem di lalaki ti Dios, a naggapu iti Juda, ket inwarragawagna dagitoy a banbanag nga inaramidmo a maibusor iti altar ti Bet-el.

18Ket isu kinunana, Isu baybay-anyo; awan ti manggaraw coma cadagiti tultulangna. Iti casta binay-anda dagiti tultulangna, agraman cadagiti tultulang di mammadto a naggapu idi sadi Samaria.

19Ket casta met nga isu-amin dagiti balbalay cadagiti nangato a disdisso nga addada idi cadagiti il-ili ti Samaria, nga inaramid idi dagiti ar-ari ti Israel a pinanggargarida ken ni Jehova nga agpungtot, iniccat ida ni Josias, ket inaramidna cadacuada ti mayannurot cadagiti amin nga ar-aramid nga inaramidna sadi Bet-el.

20Ket pinatayna amin dagiti papadi dagiti nangato a disdisso nga addada sadiay, iti rabaw dagiti al-altar, ket pinuuranna dagiti tultulang dagiti tattao iti rabawda; ket nagsubli sadi Jerusalem.

21Ket ti ari nagbilin iti isu-amin a umili, a kinunana, Ngilinenyo ti pascua ken ni Jehova a Diosyo, a cas naisurat iti daytoy a libro ti tulag.

22Awan duadua a saan idi a nangilin ti casta a pascua nanipud iti aldaw dagidi oc-ocom a nangocom iti Israel, uray cadagiti isu-amin nga aldaw dagiti ar-ari ti Israel, uray cadagiti ar-ari ti Juda;

23No di laeng idi maicasangapulo ket walo a tawen ni ari Josias ti pannacangilin daytoy a pascua ken ni Jehova idiay Jerusalem.

24Casta met dagidi baglan, ken manag salamangca, ken dagiti terafim, ken ladladawan, ken isu-amin dagiti kinarimon a naimatangan iti daga ti Juda, ken iti Jerusalem, imbelleng ni Josias, tapno mapanecnecan dagiti sasao ti linteg a naisurat iti libro a nasaracan ni Helcias a padi idi balay ni Jehova.

25Ket awan idi ti ari a cas kencuana iti casacbayanna, a nagsubli ken ni Jehova iti amin a pusona ken iti amin a cararuana; ken iti amin a pigsana, a cas mayalubog iti isu-amin a linteg ni Moises: uray iti calpasanna awan idi ti timmacder a cas kencuana.

26Nupay no casta ni Jehova saan a nagbawing iti rungsot ti dackel a pungtotna, a ti pungtotna simged idi a maibusor iti Juda, a gapu iti isu-amin a panggargari isu a pinanggargari kencuana ni Manases.

27Ket ni Jehova kinunana, Iccatecto met ti Juda iti imatangco, a cas panangiccatco ti Israel, ket ipurruacconto daytoy a ili a pinilic idi, iti Jerusalem met laeng, ken ti balay a nagcunaac idi, Ti naganco addanto sadiay.

28Ti matda cadagiti ar-aramid ni Josias, ken isu-amin nga inaramidna, saanda aya a naisurat iti libro dagiti cronicas dagiti ar-ari ti Juda?

29Cadagidi al-aldawna ni Faraon Necao nga ari sadi Egipto simmang-at a maibusor iti ari ti Asiria agingga iti carayan a Eufrates: ket ni ari Josias rimmuar a maibusor kencuana; ket isu pinapatay ni Faraon Necao idiay Megiddo, idi nga isu nakitana.

30Ket dagiti adipenna isu impanda a natay iti lugan nanipud Megiddo, ket isu inyegda iti Jerusalem, ket intabonda idi tanemna met laeng ket dagiti tattao ti daga innalada ni Joacaz nga anac ni Josias, ket isu ti pinulotanda, ket inaramidda nga ari iti saad ni amana.

31Ni Joacaz agtawen idi iti duapulo ket tallo a tawen idi a nangrugi a nagari; ket nagari bayat iti tallo a bulan idiay Jerusalem: ket ti nagan ni inana Amutal anac ni Jeremias a taga Libna.

32Ket inaramidna daydi a dakes iti imatang ni Jehova, a mayalubog iti isu-amin nga inaramid idi dagidi ammana.

33Ket ni Faraon Necao incabilna a balud idiay Ribla idiay daga ti Hamat, tapno saan nga agari idiay Jerusalem; ket pinagbuisna di daga iti sangagasut a talento a pirac, ken maysa a talento a balitoc.

34Ket ni Faraon Necao inaramidna nga ari ni Eliacim nga anac ni Josias iti saad ni Josias nga amana, ket sinuctanna ti naganna iti Joacim: ngem innalana ni Joacaz; ket isu immay iti Egipto, ket natay sadiay.

35Ket ni Joacim intedna ken ni Faraon ti pirac ken balitoc; ngem pinagbuisna ti daga tapno itedna di pirac a mayalubog iti bilin ni Faraon: isu siningirna ti pirac ken balitoc cadagiti tattao ti daga, iti tunggal maysa cas iti mayalubog iti buisna, tapno isu ti itedna ken ni Faraon Necao.

36Agtawen idi iti duapulo ket lima ni Joacim idi a nangrugi a nagari; ket nagari bayat iti sangapulo ket maysa a tawen idiay Jerusalem; ket ti nagan ni inana Zebuda, anac ni Pedaia a taga Ruma.

37Ket inaramidna daydi a dakes iti imatang ni Jehova, a mayalubog iti isu-amin nga inar-aramid idi dagidi ammana.

← Chapter 22 Jump to: Chapter 24 →