2 Kings 25

Ilokano (Ti Biblia (1973))

← Chapter 24 Jump to:

1Ket naaramid idi iti maicasiam a tawen ti panagarina, idi bulan a maicasangapulo, iti maicasangapulo nga aldaw ti bulan, a ni Nabucodonozor nga ari ti Babilonia immay agraman amin a buyotna a maibusor iti Jerusalem, ket nagpacarsoda a maibusor kencuana; ket namangonda a maibusor kencuana cadagiti sarsarikedked nga agliclicmut.

2Iti casta ti ili nalacub inggana iti maicasangapulo ket maysa a tawen ni ari Sedecias.

3Iti maicasiam nga aldaw ti maicapat a bulan ti bisin napalalo unay iti ili, iti casta nga awan idi ti tinapay nga agpaay ti umili ti daga.

4Idin maysa a gutbaw ti naaramid iti ili, ket isu-amin dagiti lallaki ti gubat nagtalawda iti rabii iti dalan ti ruangan nga adda idi iti nagbaetan dagiti dua a bacud, nga adda idi iti denna ti minuyungan ti ari (dagiti Caldeos addada a nailicmut a maibusor iti ili); ket di ari napan iti dalan ti Araba.

5Ngem ti buyot dagiti Caldeos kinamatna di ari, ket isu nacamacamda cadagiti tantanap ti Jerico; ket isu-amin a buyotna nawarada nanipud kencuana.

6Idin innalada di ari, ket impanda iti ari ti Babilonia idiay Rebla; ket impatoda iti panangocom kencuana.

7Ket pinatayda dagiti annac ni Sedecias iti saclang dagiti matana, ket sinuatda dagiti mata ni Sedecias, ket isu imbaludda, ket impanda sadi Babilonia.

8Idi maicalima a bulan, iti maicapito nga aldaw ti bulan, nga isu idi ti tawen a maicasangapulo ket siam ni ari Nabucodonozor, nga ari ti Babilonia, immay iti Jerusalem ni Nabuzaradan a capitan dagiti guardia, nga adipen ti ari ti Babilonia.

9Ket pinuuranna di balay ni Jehova, ket ti balay ti ari, ken isu-amin dagiti balbalay sadi Jerusalem, tunggal balay a dackel met laeng, pinuuranna iti apuy.

10Ket isu-amin a buyot dagiti Caldeos nga adda idi iti capitan ti guardia rinebbada di bacud ti Jerusalem iti aglicmut.

11Ket ti natda cadagiti umili a nabaybay-an idi ili, ken dagidi a simmiasi, a nagtinnag iti ari ti Babilonia, ken ti natda iti caaduan, ni Nabuzaradan a capitan ti guarda inyallatiwna ida a kinayawan.

12Ngem ti capitan ti guardia binay-anna idi dagiti capapanglawan unay ti daga tapno isuda dagiti agtartrabajo iti cauvasan ken agtartrabajo iti daga.

13Ket dagiti monmon a gambang nga addada idi iti balay ni Jehova, ken dagiti batbatay, ken ti baybay a gambang nga addada idi iti balay ni Jehova, dagiti Caldeos binuracda, ket di gambangda impanda sadi Babilonia.

14Ket dagiti caldero, ken dagiti soplad, ken dagiti pangarsang, ken dagiti cuchara, ken isu-amin dagiti al-alicamen a gambang a pagserservida idi, innalada.

15Ket dagiti pagiccan ti beggang, ken dagiti bacca, dagidi a balitoc, iti balitoc, ken dagidi a pirac, iti pirac; di capitan ti guardia impanna.

16Dagidi dua nga adigi, di maysa a baybay, ken dagiti batbatay, a ni Salomon inaramidna idi nga agpaay iti balay ni Jehova, ti gambang dagitoy amin nga al-alicamen saan a matimbeng idi iti caaduna.

17Ti catayag di maysa nga adigi sangapulo ket walo a sico, ket maysa a paratoc a gambang ti adda iti toctocna; ket ti catayag di paratoc tallo a sico, agraman iniket ken dagiti granada iti rabaw ti paratoc nga aglicmut, gambangda amin: capada dagitoy daydi maicadua nga adigi agraman iniket.

18Ket di capitan ti guardia innalana ni Saraias a pangolo a padi, ken ni Sofonias a maicadua a padi, ken tallo nga agaywan iti dapian:

19Ket iti ili nangala iti maysa nga agturay a pangoloen idi dagiti lallaki ti gubat; ket lima a lallaki cadagidi a nacakita iti rupa ti ari, isuda a nasaracan idi iti ili; ken ti escriba, ti capitan ti buyot, nga agumummong idi cadagiti umili ti daga; ken innem a pulo a lallaki ti ili ti daga nga isuda dagiti nasaracan iti ili.

20Ket ni Nabuzaradan a capitan ti guardia innalana ida, ket inyegna ida iti ari ti Babilonia idiay Rebla.

21Ket ti ari ti Babilonia kinabilna ida, ket pinapatayna ida idiay Rebla idiay daga ti Hamat. Castoy ti pannacaipanna a kayaw ti Juda nanipud iti dagana.

22Ket no maipapan cadagiti umili a nabaybay-an idi iti daga ti Juda, isuda a ni Nabucodonozor nga ari ti Babilonia binaybay-anna idi, cadacuada met laeng isu inaramidna a gobernador ni Geodalias nga anac ni Ahicam, nga anac ni Safan.

23Ket idi a dagiti isu-amin a capcapitan dagiti buybuyot, isuda ken dagiti lallakida, natimudda nga ti ari ti Babilonia inaramidna idi a gobernador ni Geodalias, immayda ken ni Geodalias idiay Mizpa, ni Ismael met laeng nga anac a lalaki ni Natanias, ken ni Johanan nga anac a lalaki ni Carea, ken ni Saraia nga anac a lalaki ni Tanhumet a Netofatita, ken ni Joazanias nga anac a lalaki ti Maacati, isuda ken dagiti lallakida.

24Ket ni Geodalias nagsapata cadacuada ken cadagiti lallakida, ket kinunana cadacuada, Dicayo agbutbuteng a gapu cadagiti ad-adipen dagiti Caldeos: agtaengcayo iti daga, ket agservicayo iti ari ti Babilonia, ket addanto imbag cadacayo.

25Ngem naaramid idi maicapito a bulan, a ni Ismael nga anac ni Natanias, nga anac ni Elisama iti naarian a caputotan immay, ket sangapulo a lallaki dagiti caduana, ket kinabilda ni Geodalias, iti casta a natay, ken dagiti Judios ken Caldeos nga addada idi a caduana idiay Mizpa.

26Ket isu-amin dagiti tattao, bassit ken dackel agpadpada, ken dagiti capcapitan dagiti buybuyot, timmacderda ket immayda iti Egipto; ta nagbutengda cadagiti Caldeos.

27Ket naaramid idi iti maicatlopulo ket pito a tawen ti pannacacayaw ni Joaquin nga ari ti Juda, idi bulan a maicasangapulo ket dua, iti maicaduapulo ket pito nga aldaw ti bulan, a ni Evil-merodach nga ari ti Babilonia, idi tawen a pinangrugina nga agari, inngatona ti olo ni Joaquin nga ari ti Juda nanipud iti pagbaludan;

28Ket nagsao a siiimbag kencuana, ket insaadna ti tronona iti ngato ti trono dagiti ar-ari a nakiadda idi kencuana idiay Babilonia.

29Ket sinuctanna dagiti cawesna iti pagbaludan. Ket ni Joaquin nangan a cancanayon iti sangona iti isu-amin dagiti al-aldaw ti panagbiagna:

30Ket agpaay iti taraonna, adda idi cancanayon a taraon a maited kencuana nga aggapu iti ari, iti tumunggal aldaw maysa nga apag, cadagiti amin nga al-aldaw ti panagbiagna.

← Chapter 24 Jump to: