2 Kings 20

Ilokano (Ti Biblia (1973))

← Chapter 19 Jump to: Chapter 21 →

1Cadagidi nga al-aldaw ni Ezekias nagsakit iti macapatay. Ket ni Isaias a mammadto nga anac ni Amos immay kencuana, ket kinunana kencuana, Castoy ti cuna ni Jehova, Urnosem ti balaymo; ta mataycanto, ket dicanto agbiag.

2Idin intaliawna di rupana iti diding, ket kimmararag ken ni Jehova, a kinunana,

3Lagipem ita, O Jehova, gumawawaac kenca, no casano ti pannagnac idi ita saclangmo iti kinapudno ken iti maysa a puso a napalongdoan, ket inaramidco daydiay a naimbag ita imatangmo. Ket ni Ezekias nagsangit iti nasaem.

4Ket naaramid, iti sacbay a ni Isaias macaruar idi iti tengnga ti ili, a ti sao ni Jehova immay kencuana, a kinunana,

5Agsublica, ket cunaem ken ni Ezekias a pangulo ti ilic, Castoy ti cuna ni Jehova, a Dios ni David nga amam, Nangngegco ta cararagmo, nakitac dagita luluam: adtoy, a siac paimbagencanto; iti maicatlo nga aldaw umulicanto iti balay ni Jehova.

6Ket nayonacto dagita al-aldawmo iti sangapulo ket lima a tawen; ket ispalencanto ken daytoy nga ili iti ima ti ari ti Asiria; ket salacnibacto daytoy nga ili a gapu caniac met laeng, ken gapu ken ni David nga adipenco.

7Ket ni Isaias kinunana, Mangalacayo iti sangcatipkel nga higos. Ket nangalada ket isu ti incabilda iti rabaw di bosali, ket isu immimbag.

8Ket ni Ezekias kinunana ken ni Isaias, Ania ti pagilasinan a ni Jehova paimbagennacto, ket umuliacto iti balay ni Jehova iti maicatlo nga aldaw?

9Ket ni Isaias kinunana, Daytoyto ti pagilasinan kenca nga aggapu ken ni Jehova, a ni Jehova aramidennanto ti banag nga insaona: ti aniniwan mapanto iti sango iti sangapulo a gerger, wenno sumublinto iti nalicudanna iti sangapulo a gerger?

10Ket ni Ezekias simmungbat, Nalaca a banag a ti aniniwan agpababa iti sangapulo a gerger; saan, no di ket ti aniniwan agsubli coma a sumanud iti sangapulo a gerger.

11Ket ni Isaias a mammadto immasug ken ni Jehova; ket insublina di aniniwan iti sangapulo a gerger, a bimmabaanna idi iti cuadrante ni Acaz.

12Iti daydi a tiempo ni Berodac-baladan nga anac ni Baladan, nga ari sadi Babilonia, nangibaon cadagiti sursurat ken maysa a sagut ken ni Ezekias; ta nangegna idi nga ni Ezekias nagsakit.

13Ket ni Ezekias inimdenganna ida, ket imparangna cadacuada iti isu-amin a balay dagiti cucuana a napateg, ti pirac, ti balitoc, ken recrecado, ken ti napateg a lana, ken di balay dagiti gamigamna, ken isu-amin a nasaracan cadagiti gamgamengna: awan ti uray aniaman iti balayna, wenno iti isu-amin a pagturayanna, a ni Ezekias dina imparang cadacuada.

14Idin ni mammadto nga Isaias immay ken ni ari Ezekias, ket kinunana kencuana, Ania ti kinuna dagitoy a lallaki? ket sadino ti naggapuanda inggana kenca? Ket ni Ezekias kinunana, Naggapuda iti adayu a daga, sadi Babilonia met laeng.

15Ket isu kinunana, Ania ti nakitada iti balaymo? Ket ni Ezekias simmungbat, Nakitada amin nga adda iti balayco: awan ti uray aniaman cadagiti gamgamengco a diac imparang cadacuada.

16Ket ni Isaias kinunana ken ni Ezekias, Denggem ti sao ni Jehova,

17Adtoy, a dagiti al-aldaw umayda, nga isu-amin nga adda iti balaymo, ken daydiay a dagidi ammam indulinda agingga ita nga aldaw, maipandanto sadi Babilonia: awanto ti mabati, cuna ni Jehova.

18Ket cadagiti annacmo a lallaki nga agtaudto kenca, isuda a putotemto, alaendanto, ken isudanto dagiti eunucos iti palacio ti ari ti Babilonia.

19Idin ni Ezekias kinunana ken ni Isaias, Naimbag ti sao ni Jehova nga insaom. Kinunana pay met, Saan a casta, no ti talna ken kinapudno addadanto cadagiti al-aldawco?

20Ti matda cadagiti ar-aramid ni Ezekias, ken isu-amin a kinamaingelna, ken no casano ti panangaramidna idi tanke, ken di calasugan, ket inserrecna di danum iti ili, saanda aya a naisurat iti libro dagiti cronicas dagiti ar-ari ti Juda?

21Ket ni Ezekias nakiturog cadagiti ammana; ket ni Manases nga anacna nagari iti saadna.

← Chapter 19 Jump to: Chapter 21 →