2 Kings 18

Ilokano (Ti Biblia (1973))

← Chapter 17 Jump to: Chapter 19 →

1Naaramid idi maicatlo a tawen ni Oseas nga anac ni Ela nga ari ti Israel, a ni Ezekias, nga anac ni Acaz nga ari ti Juda nangrugi a nagari.

2Agtawen idi iti duapulo ket lima a tawen idi a nangrugi a nagari: ket nagari idiay Jerusalem bayat iti duapulo ket siam a tawen: ket ti nagan ni inana Abi, anac ni Zacarias.

3Ket inaramidna daydi a nalinteg cadagiti mata ni Jehova, a siaalubog cadagiti isu-amin nga inaramid ni amana a David.

4Isu iniccatna dagiti nangato a disdisso, ket binungtolna dagiti monmon, ket pinucanna ti Asherah; ket binuracna a pinispisi di sinan-uleg a gambang nga inaramid ni Moises ta cadagidi nga al-aldaw dagiti annac ti Israel isu ti ipupuuranda iti incienso; ket isu ti ninaganna iti Nehustan.

5Ket nagtalec ken ni Jehova a Dios ti Israel: iti casta nga iti calpasanna awan idi ti cas kencuana cadagiti isu-amin nga ar-ari ti Juda, uray cadagidi nga immun-una ngem isu.

6Ta kimpet ken ni Jehova; ket saan a pimmanaw iti isusurotna kencuana, no di ket tinungpalna dagiti bilbilin, a ni Jehova imbilinna ken ni Moises.

7Ket ni Jehova adda idi kencuana; iti uray sadinoman a disso a napananna nagrang-ay: ket immalsa a bimmusor iti ari sadi Asiria, ket saan a nagservi kencuana.

8Kinabilna met dagiti Filisteos inggana iti Gaza ken dagiti bedbeddengna, manipud iti torre dagiti agwanawan inggana iti ili a nasarikedkedan.

9Ket naaramid idi maicapat a tawen ni ari Ezekias, nga isu idi ti maicapito a tawen ni Oseas nga anac ni Ela nga ari ti Israel, a ni Salmanasar nga ari sadi Asiria simmang-at a maibusor iti Samaria, ket isu ti linacubna.

10Ket idi aggibus ti tallo a tawen isu ti innalada: idi maicanem a tawen ni Ezekias, nga isu ti idi ti maicasiam a tawen ni Oseas nga ari ti Israel, ti Samaria isu ti naala.

11Ket ti ari sadi Asiria inyallatiwna ti Israel idiay Asiria, ket incabilna ida idiay Hala, ken iti Habor, a carayan ti Gozan, ken cadagiti il-ili dagiti Medos,

12Agsipud ta dida nagtulnog iti timec ni Jehova a Diosda, no di ket linabsingda ti tulagna, isu-amin met laeng a ni Moises nga adipen ni Jehova imbilinna idi, ket dida impangag, isu ti dida inaramid.

13Iti maicasangapulo ket uppat a tawen ni ari Ezekias ni Sennakerib nga ari sadi Asiria simmang-at a maibusor cadagiti isu-amin a il-ili a nasarikedkedan ti Juda, ket innalana ida.

14Ket ni Ezekias nga ari ti Juda nagbaon iti ari ti Asiria idiay Lakis, a kinunana, Siac nacabasolac; agsublica a pumanaw caniac: nga isu-amin nga ipaannongmo coma caniac awitecto. Ket ti ari ti Asiria inkeddengna ken ni Ezekias nga ari ti Juda iti tallo gasut, a talento a pirac ken tallo pulo a talento a balitoc.

15Ket ni Ezekias intedna kencuana ti isu-amin a pirac a nasaracan idi balay ni Jehova, ken cadagiti gamgameng ti balay ti ari.

16Idi a tiempo ni Ezekias pinucanna di balitoc cadagiti ruangan ti templo ni Jehova, ken cadagiti adigi nga ni Ezekias nga ari ti Juda incalupcopna idi. Ket intedna ida iti ari ti Asiria.

17Ket ti ari ti Asiria imbaonna ni Tartan ken ni Rabsaris ken ni Rabsaces nanipud Lakis ken ni ari Ezekias agraman dackel a buyot inggana iti Jerusalem. Ket simmang-atda ket immayda iti Jerusalem. Ket idi a simmang-atda, immayda ket nagsardengda iti denna ti calasugan ti tanke a nangatngato, nga adda idiay napatac a dalan ti daga ti agpappapuscol iti lupot.

18Ket idi pinuccawanda di ari, rimmuarda cadacuada da Eliacim nga anac ni Hilcias a mayordomo, ken ni Sebna nga escriba, ken ni Joah nga anac ni Asaf a registrador.

19Ket ni Rabsaces kinunana cadacuada, Cunaenyo itatta ken ni Ezekias, Castoy ti cuna ti dackel nga ari, nga ari ti Asiria, Ania a pagtalcan daytoy a kencuana agtaleccayo?

20Sica cunaem (Ngem isu ti balicas a barengbareng met laeng), Adda patigmaan ken pigsa a maipaay iti gubat. Ita siasino aya ti pagtalcam, a sica immalsaca a maibusor caniac?

21Ita, adtoy, a sica agtalecca iti cayo daytoy runo a naparpar, a ti met laeng Egipto; isu a no ti maysa a lalaki agsadag, isu ti sumrecto iti imana, ken salputenna: casta ni Faraon nga ari ti Egipto cadagiti isu-amin nga agtalec kencuana.

22Ngem no cunaenyo caniac, Agtaleccami ken ni Jehova a Diosmi; saan aya nga isu daydi a dagiti nangato a disdissona ken dagiti al-altarna iniccat ni Ezekias, ket kinunana iti Juda ken iti Jerusalem, Agcararagcayto iti sango daytoy nga altar ditoy Jerusalem?

23Ita ngarud, agdawatac kenca, nga mangtedca coma cadagiti salda ken ni apoc nga ari ti Asiria, ket iccancanto cadagiti dua ribu a cabcabayo, no mabalinmo iti biangmo ti mangisaad cadagiti agsacay iti rabawda.

24Casano ngarud ti pannacabalinmo a mamasiasi iti rupa ti maysa a capitan dagiti cababassitan cadagiti ad-adipen ni apoc, ket isaadmo ti panagtalecmo iti Egipto a gapu cadagiti luglugan ken cadagiti tattao nga agcacabayo?

25Ket ita simmang-atac aya a diac kinaddua ni Jehova a maibusor itoy a disso tapno dadaelec? Ni Jehova kinunana caniac, Summang-atca a maibusor itoy a daga, ket dadaelem.

26Idin da Eliacim nga anac ni Hilcias, ken ni Sobna, ken ni Joah, kinunada ken ni Rabsaces, Agsaoca, agdawatac kenca, cadagiti ad-adipenmo iti sao ti Siria; ta isu ti maawatanmi, ket dica coma makisao cadacami iti sao dagiti Judio, cadagiti laplapayag dagiti tattao nga adda iti rabaw ti bacud.

27Ngem ni Rabsaces kinunana cadacuada, Ni apoc imbaonnac aya ken ni apom ken iti sica, a mangisao cadagitoy a sasao? saannac aya nga imbaon cadagiti tattao nga agtugaw iti rabaw ti bacud, a makicaan cadacayo iti iblengda, ken makicainum iti isbuda met laeng cadacayo?

28Idin ni Rabsaces timmacder, ket imkis iti natbag a timec iti sao dagiti Judio, ket nagsao, a kinunana, Denggenyo ti sao ti dackel nga ari, ti ari ti Asiria.

29Castoy ti cuna ti ari, Ni Ezekias dinacayo allilawen coma; ta dinacayto mabalin nga ispalen iti imana:

30Ket ni Ezekias dinacayo met coma pagcammatalken ken ni Jehova, a cunaenna, Ni Jehova ispalennatayto a di bumurong, ket daytoy a ili saanto a maited iti ima ti ari ti Asiria.

31Dicayo ipangag ni Ezekias: ta castoy ti cuna ti ari ti Asiria. Makicappiacayo caniac, ket rumuarcayo agingga caniac; ket mangancayo tunggal maysa iti uvasna, ken tunggal maysa iti higosna, ket uminumcayo tunggal maysa cadagiti dandanum iti tankena met laeng;

32Agingga iti umayac ket ipancayo iti maysa a daga a cas iti dagayo, maysa a daga ti bukel ken ti baro nga arac, daga ti tinapay ken dagiti cauvasan, daga dagiti oliva, ken ti diro, tapno agbiagcayto coma, ket dicayto matay; ket dicayo ipangag coma ni Ezekias, no ududannacayo, a cunana, Ni Jehova ispalennatayto.

33Adda aya siasinoman cadagiti didios dagiti nasnacion a nangisalacan iti dagana iti ima ti ari ti Asiria?

34Sadino aya ti yan dagiti didios ti Hamat ken ti Arfad? sadino aya ti yan dagiti didios ti Sefarvaim, ti Hena, ken ti Hiva? inispalda aya ti Samaria iti imac?

35Siasinoda aya cadagiti amin a didios dagiti dagdaga, a nangispal idi iti dagada iti imac, tapno ni Jehova ispalenna coma ti Jerusalem iti imac?

36Ngem ti umili nagulimec, ket isu dida sinungbatan iti maysa a balicas; ta imbilin idi ti ari, a kinuna, Dicayo sumungbat kencuana.

37Idin immayda ken ni Ezekias da Eliacim nga anac ni Hilcias nga isu ti mayordomo idi, ken ni Sebna nga escriba, ken ni Joah nga anac ni Asaf a registrador, a sigigisgis dagiti cawesda, ket imbagada kencuana dagiti sasao ni Rabsaces.

← Chapter 17 Jump to: Chapter 19 →