2 Kings 21

Ilokano (Ti Biblia (1973))

← Chapter 20 Jump to: Chapter 22 →

1Agtawen idi iti sangapulo ket dua a tawen ni Manases idi a nangrugi a nagari; ket nagari idiay Jerusalem bayat iti limapulo ket lima a tawen: ket ti nagan ni inana Hapsiba.

2Ket inaramidna daydi a dakes iti imatang ni Jehova, a siaannurot cadagiti kinarimon dagiti nasnacion a ni Jehova pinagtalawna idi iti sango dagidi annac ti Israel.

3Ta isu binangonna manen dagiti nangato a disdisso a ni Ezekias nga amana rinugpuna idi; ket namatacder cadagiti al-altar a maipaay ken Baal, ket nangaramid iti maysa nga Asherah, a cas inaramid idi ni Acaz nga ari ti Israel, ket nagcararag iti isu-amin a buyot ti langit, ket nagservi cadacuada.

4Ket nangbangon cadagiti al-altar idiay balay ni Jehova, isu a ni Jehova nagcunaanna idi, Siac icabilconto ti naganco idiay Jerusalem.

5Ket nangbangon cadagiti al-altar a maipaay iti isu-amin a buyot ti langit iti dua a paraangan ti balay ni Jehova.

6Ket pinalasatna di anacna a lalaki iti apuy, ket nagaramid iti panagbuybuyon, ken nangaramat iti kinabaglan ket nakipagaramid cadagidi agan-anito, ken cadagiti managsalamangca: nagaramid iti adu a dakes iti imatang ni Jehova, a panggargarina kencuana nga agpungtot.

7Ket insaadna ti ladawan a kinitikitan di Asherah, nga isu inaramidna idi, idiay balay isu a ni Jehova kinunana idi ken David ken Salomon nga anacna, Ditoy a balay, ken ti Jerusalem, a pinilic cadagiti isu-amin a caputotan ti Israel, icabilconto ti naganco iti agnanayon;

8Uray caano diacto pagbariwasenen dagiti sacsaca ti Israel manipud iti daga nga intedco cadagiti ammada, no tungpalendanto la ket di nga aramiden ti mayalubog cadagiti isu-amin nga imbilinco cadacuada, ken ti mayalubog iti isu-amin a linteg a ni adipenco a Moises imbilinna cadacuada.

9Ngem isuda dida impangag: ket ni Manases sinulbogna ida a mangaramid iti daydi a dacdakes ngem cadagiti nasnacion a ni Jehova dinadaelna idi iti sango dagiti annac ti Israel.

10Ket ni Jehova nagsao a naaramat dagiti ad-adipenna a mammadto, a kinunana,

11Agsipud ta ni Manases nga ari ti Juda inaramidna dagitoy a kinarimon, ken inaramidna ti dacdakes ngem iti isu-amin nga inaramid dagiti Amorreo, nga immun-unada ngem isu, ken casta met a pinagbasolna ti Juda cadagiti ladladawanna;

12Gapuna a castoy ti cuna ni Jehova, a Dios ti Israel, Adtoy, a yegco iti casta a dakes iti Jerusalem ken iti Juda, nga uray asino a macangngegto kencuana, dagiti dua a laplapayagna masisilengdanto.

13Ket yunnatconto iti Jerusalem ti paltic ti Samaria, ken ti tinnag ti balay ni Acab; ket punasacto ti Jerusalem, a cas ti panangpunas ti tao iti maysa a malucong, nga isu ti punpunasanna ken balictadenna.

14Ket ibellengconto ti matda ti tawidco ket yawatconto ida cadagiti ima dagiti cabusorda; ket agbalindanto a kinayawan ken sinamsam cadagiti isu-amin a cabusorda;

15Agsipud ta inaramidda daydi a dakes iti imatangco, ket ginargaridac nga agpungtot, nanipud idi aldaw a dagidi ammada rimmuarda sadi Egipto inggana ita nga aldaw.

16Casta met a ni Manases imbucbocna ti dara nga awan basbasolna iti casta unay, agingga iti di napno ti Jerusalem iti igid ken igid; sabali laeng ti basolna a pinamagbasolna iti Juda, iti panangaramidna iti daydi a dakes iti imatang ni Jehova.

17Ti matda cadagiti ar-aramid ni Manases, ken isu-amin dagidi nga inaramidna, ken di basol nga inaramidna, saanda aya a naisurat iti libro dagiti cronicas dagiti ar-ari ti Juda?

18Ket ni Manases nakiturog cadagiti ammana, ket isu naitabon idi minuyungan ti balayna, idi minuyungan ni Oza: ket ni Amon nga anacna nagari iti saadna.

19Agtawen idi iti duapulo ket dua a tawen ni Amon idi a nangrugi a nagari, ket nagari bayat iti dua a tawen idiay Jerusalem: ket ti nagan ni inana Mealemet anac ni Harus a taga Joreba.

20Ket inaramidna daydi a dakes iti imatang ni Jehova, a cas iti inaramid ni Manases nga amana.

21Ket nagna iti isu-amin a dalan a nagnaan ni amana, ket nagservi cadagiti ladladawan isuda a nagservian ni amana, ket nagcararag cadacuada:

22Ket inidianna ni Jehova, a Dios dagidi ammana, ket saan a nagna iti dalan ni Jehova.

23Ket dagiti ad-adipen ni Amon immalsada a maibusor kencuana, ket pinatayda di ari idiay balayna met laeng.

24Ngem dagiti umili ti daga pinapatayda amin dagiti immalsa a maibusor ken ni Amon, ket dagiti umili ti daga incabilda iti saadna nga ari ni Josias nga anacna.

25Ti matda cadagiti ar-aramid ni Amon nga inaramidna idi, saanda aya a naisurat iti libro dagiti cronicas dagiti ar-ari ti Juda?

26Ket naitabon idi tanemna idiay minuyungan ni Oza: ket nagari iti saadna ni Josias nga anacna.

← Chapter 20 Jump to: Chapter 22 →