2 Kings 14

Ilokano (Ti Biblia (1973))

← Chapter 13 Jump to: Chapter 15 →

1Idi maicadua a tawen ni Joas nga anac ni Joacaz nga ari ti Israel ni Amasias nga anac ni Joas nga ari ti Juda nangrugi a nagari.

2Agtawen idi iti duapulo ket lima a tawen idi isu nangrugi nga agari; ket nagari idiay Jerusalem bayat iti duapulo ket siam a tawen: ti nagan ni inana Joaddan taga Jerusalem.

3Ket inaramidna daydi a nalinteg cadagiti mata ni Jehova, nupay saan a cas ken ni David nga amana; nagaramid iti mayalubog cadagiti isu-amin nga inaramid idi ni Joas nga amana.

4Nupay casta dagiti nangato a disso saanda idi a naiccat; dagiti tattao agidatdaton ken agpuurda pay laeng iti incienso cadagiti nangato a disso.

5Ket naaramid, nga apaman a napasingkedan ti pagarian iti imana, a pinatayna dagiti ad-adipenna a namapatay idi iti ari nga amana:

6Ngem cadagiti annac dagidi a namapatay saanna a pinapatay; a mayalubog iti naisurat iti libro ti linteg ni Moises, a cas imbilin ni Jehova a kinunana, Dagiti amma saandanto a mapapatay a gapu cadagiti annac; uray dagiti annac saandanto a mapapatay gapu cadagiti amma; no di ket tunggal tao matayto a gapu iti basolna met laeng.

7Namatay idi iti Edom idiay Lobong ti Asin iti sangapulo a ribu, ket innalana ti Sela a gapu iti gubat, ket isu ti ninaganna iti Jecteel inggana iti daytoy nga aldaw.

8Idin ni Amasias nangibaon cadagiti babaonen ken ni Joas, nga anac ni Joacaz nga anac ni Jehu, nga ari ti Israel, a kinunana, Umayca, agkinnitankitata coma iti rupanrupa.

9Ket ni Joas nga ari ti Israel nagbaon ken ni Amasias nga ari ti Juda, a cunana, Ti casumba nga adda idiay Libano nagbaon ken ni cantingen nga adda idiay Libano, a kinunana, Itedmo ta anacmo a babai nga asawaen ti anacco a lalaki: ket immallatiw ti maysa a naranggas nga animal nga adda idi idiay Libano, ket binaddecna ni casumba.

10Pudno unay a sica kinabilmo idi ti Edom, ket ta pusom impangatonaca: madayawca, ket agyanca ita balaymo, ta apay aya a mangiballaetca iti pacaranggasam, tapno sica mapasagca coma, sica met laeng, ken ti Juda a maicanunong kenca?

11Ngem ni Amasias dina kinayat nga impangag. Iti casta ni Joas nga ari ti Israel simmang-at; ket isu ken ni Amasias nga ari ti Juda nagkinnitada iti rupanrupa idiay Bet-semes, a cucua ti Juda.

12Ket ti Juda naicabil iti dacdakes iti sango ti Israel; ket nagtalaw ti tunggal lalaki agingga iti toldana.

13Ket ni Joas nga ari ti Israel innalana ni Amasias nga ari ti Juda, nga anac ni Joas nga anac ni Ocozias idiay Bet-semes, ket immay iti Jerusalem, ket dinupracna ti bacud ti Jerusalem manipud iti ruangan ti Efraim inggana iti ruangan ti suli, nga uppat a gasut a sico.

14Ket innalana amin a balitoc ken pirac, ken isu-amin nga al-alicamen a nasaracan idiay balay ni Jehova, ken cadagiti gamgameng ti balay ti ari, ken castamet dagiti tattao a pannacatanda, ket nagsubli idiay Samaria.

15Ti matda cadagiti ar-aramid ni Joas nga inaramidna idi, ken ti kinamaingelna, ken no casano ti pannakigubatna ken ni Amasias nga ari ti Juda, saanda aya a maisurat iti libro dagiti cronicas dagiti ar-ari ti Israel?

16Ket ni Joas nakiturog cadagiti ammana, ket naitabon idiay Samaria a naidinna cadagiti ar-ari ti Israel; ket ni Jeroboam nga anacna nagari iti saadna.

17Ket ni Amasias nga anac ni Joas nga ari ti Juda nagbiag iti calpasan ti ipapatay ni Joas nga anac ni Joacaz nga ari ti Israel iti sangapulo ket lima a tawen.

18Ti matda cadagiti ar-aramid ni Amasias, saanda aya a naisurat iti libro dagiti cronicas dagiti ar-ari ti Juda?

19Ket nagaramidda iti panangliput a maibusor kencuana idiay Jerusalem; ket nagtalaw agingga iti Lakis: ngem nagbaonda ti nagsurot kencuana idiay Lakis, ket isu pinatayda sadiay.

20Ket isu inyegda iti rabaw dagiti cabayo; ket isu naitabon idiay Jerusalem a naidenna cadagiti ammana idiay ili ni David.

21Ket isu-amin a tattao ti Juda innalada ni Azarias, nga agtawen idi iti sangapulo ket innem, ket isu ti inaramidda nga ari iti saad ni Amasias nga amana.

22Isu binangonna ti Elat ket isu ti insublina iti Juda, iti calpasan a ti ari nakiturog cadagiti ammana.

23Idi tawen a maicasangapulo ket lima ni Amasias nga anac ni Joas nga ari ti Juda ni Jeroboam nga anac ni Joas nga ari ti Israel nangrugi a nagari idiay Samaria, ket nagari bayat iti uppat a pulo ket maysa a tawen.

24Ket inaramidna daydi a dakes iti imatang ni Jehova: ket saan a pimmanaw cadagiti isu-amin a basbasol ni Jeroboam nga anac ni Nabat, isuda a pinamagbasolna iti Israel.

25Isu insublina ti beddeng ti Israel manipud iti sercan ti Amat agingga iti baybay ti Araba, a mayalubog iti sao ni Jehova, a Dios ti Israel, isu nga insaona idi iti pannacaaramat ni adipenna a Jonas nga anac ni Amittai, a mammadto, nga taga Gat-hefer.

26Ta ni Jehova nakitana ti pannacaparigat ti Israel, a napait unay ta sadiay awan idi ti mabalud wenno agwayawaya, awan idi sadiay ti uray siasinoman a tumulong a maipaay iti Israel.

27Ket ni Jehova saanna nga imbaga a cayatna a punasen ti nagan ti Israel iti baba ti langit; no di ket insalacanna ida a gapu iti ima ni Jeroboam nga anac ni Joas.

28Ket ti matda cadagiti ar-aramid ni Jeroboam, ken isu-amin nga inaramidna, ken ti kinamaingelna, no casano ti pananggubatna, ken no casano ti panangsubbotna iti Damasco ken ti Amat, a cucua idi ti Juda, nga agpaay iti Israel, saanda aya a naisurat iti libro dagiti cronicas dagiti ar-ari ti Israel?

29Ket ni Jeroboam nakiturog cadagiti ammana, cadagiti met laeng ar-ari ti Israel; ket ni Zacarias nga anacna nagari iti saadna.

← Chapter 13 Jump to: Chapter 15 →