2 Kings 11

Ilokano (Ti Biblia (1973))

← Chapter 10 Jump to: Chapter 12 →

1Ket ni Atalia nga ina ni Ocozias idi a nakitana a di anacna natay, timmacder ket dinadaelna amin ti naarian a putot.

2Ngem ni Josaba, nga anac a babai ni ari Joram, a cabsat a babai ni Ocozias, innalana ni Joas nga anac ni Ocozias, ket isu ti linibasna cadagiti annac ti ari a mapapatay idi, isu met laeng ken ti babai a mangsisiwa kencuana, ket incabilna ida iti siled a pagiddaan; ket isu ti inlemmengda gapu ken ni Atalia, iti casta saan a napapatay:

3Ket adda idi kencuana a silelemmeng idiay balay ni Jehova iti innem a tawen. Ket ni Atalia nagreina iti daga.

4Ket iti maicapito a tawen ni Joiada nagbaon ket nangala cadagiti capcapitan ti ginasut dagiti Cereteos ken ti guardia, ket inserrecna ida kencuana idiay balay ni Jehova; ket nakitulag cadacuada, ket pinagsapatana ida iti balay ni Jehova, ket imparangna cadacuada di anac ti ari.

5Ket binilinna ida, a kinunana, Daytoy ti aramidenyonto: ti apagcatloyo, a sumrecto iti aldaw ti panaginana, isudanto dagiti agbantay iti balay ni Jehova;

6Ket ti maysa nga apagcatlo agyanto iti ruangan a Sur; ket ti maysa nga apagcatlo iti ruangan iti licudan ti guardia: iti casta bantayanyonto ti balay, ken dacayto ti sarikedked.

7Ket dagiti dua a cabuyotan cadacayo, isu-amin met laeng a rumuar iti aldaw ti panaginana, bantayandanto ti balay ni Jehova iti aglawlaw iti ari.

8Ket alicubcubenyonto ti ari, tunggal lalaki agraman cadagiti igamna iti imana; ket ti sumrec iti uneg dagiti intar, matay coma: ket makicuyogcayo coma iti ari intono rumuar, ken sumrec.

9Ket dagiti capcapitan ti ginasut inaramidda ti mayannurot iti isu-amin nga imbilin ni padi Joiada; ket tunggal maysa innalana dagiti lallakina, dagidi a sumrec iti aldaw ti panaginana, ken dagidi a rumuar iti aldaw ti panaginana, ket immayda ken ni Joiada a padi.

10Ket ti padi inyawatna cadagiti capcapitan ti ginasut dagidi picpica ken calcalasag a cucua idi ni David, nga addada idi idiay balay ni Jehova.

11Ket ti guardia nagtacder, tumunggal lalaki agraman cadagiti igamna iti imana, manipud iti abay a canawan ti balay inggana iti abay a catigid ti balay, iti denna ti altar ken ti balay, iti sibay iti ari nga aglicmut.

12Idin inruarna di anac ti ari, ket incabilna kencuana di balangat, ken intedna kencuana di pammanecnec; ket isu ti inaramidda nga ari, ken isu ti pinulotanda; ket nagsisipatda cadagiti im-imada, ket kinunada, Agbiag coma a manayon ti ari.

13Ket idi a ni Atalia nangegna di daranudor ti guardia ken dagiti tattao, simrec cadagiti tattao iti balay ni Jehova:

14Ket kimmita, ket, adtoy, a di ari sitatacder iti denna ti monmon, a mayalubog iti cadawyan idi, ket dagiti capcapitan ken dagiti tangguyob iti denna ti ari; ket isu-amin a tattao ti daga agragragsacda idi, ket pagunienda idi dagiti tangtangguyob. Idin ni Atalia pinigisna dagiti cawesna, ket inyickisna, Liput! liput!

15Ket ni padi Joiada binilinna dagiti capcapitan ti ginasut a pangolo ti buyot, ket kinunana cadacuada, Isu ti iruaryo iti baet dagiti inintar; ket ti sumurotto kencuana isu ti papatayenyonto iti campilan. Ta di padi kinunana, Dicayo papatayen coma iti balay ni Jehova.

16Iti casta naglisida a maipaay kencuana, ket napan iti dalan ti sercan dagiti cabcabayo iti balay ti ari; ket idiay napapatay.

17Ket ni Joiada nangaramid iti tulag cada Jehova ken iti ari ken cadagiti tattao nga isuda coma dagiti tattao ni Jehova; iti ari met ken dagiti tattao.

18Ket isu-amin a tattao ti daga simrecda iti balay ni Baal, ket dinupracda; dagiti al-altarna ken dagiti ladawanna binuracda nga inkisap, ket pinatayda ni Matan a padi ni Baal iti sango dagiti altar. Ket di padi nangdutoc cadagiti agturay iti balay ni Jehova.

19Ket innalana dagiti capcapitan ti ginasut, ken dagiti Cereteos, ken ti guardia, ken dagiti isu-amin a tattao ti daga, ket insalogda di ari nga ingapu iti balay ni Jehova, ket immayda iti dalan ti ruangan ti guardia iti balay ti ari. Ket nagtugaw iti trono dagiti ar-ari.

20Iti casta isu-amin a tattao ti daga nagragragsacda, ket ti ili nagtalna idi. Ket pinapatayda ni Atalia iti campilan idiay balay ti ari.

21Ni Joas agtawen idi iti pito a tawen idi a nangrugi a nagari.

← Chapter 10 Jump to: Chapter 12 →